ޔަމަނުގެ ހޫތީ ހަނގުރާމަވެރިން ސައުދީ އަރަބިއްޔާއަށް އަމާޒުކޮށް ދެމުންދާ ހަމަލާތަކާ ގުޅިގެން، މައްކާގައި "ނުރައްކަލެއް ކުރިމަތިވެދާނެ ކަމުގެ" ކުއްލި އިންޒާރު އަންގާރަ ދުވަހު ނެރެފި އެވެ.
މިއީ ހޫތީން ސައުދީއަށް ހަމަލާދޭން ފެށި ފަހުން މުގައްދަސް މައްކާ ސިޓީގައި މިފަދަ އިންޒާރެއް ނެރުނު ފުރަތަމަ ފަހަރެވެ.
ސައުދީ ސިވިލް ޑިފެންސުން ބުނި ގޮތުގައި، މި އިންޒާރު ނެރުނީ ކުއްލި ހާލަތްތަކުގައި އާންމުން ހޭލުންތެރިކުރުވާ ގައުމީ ޕްލެޓްފޯމް މެދުވެރިކޮށެވެ. ނަމަވެސް ކުރިމަތިވެދާނެ ނުރައްކަލުގެ ތަފުސީލެއް އެ އިދާރާއަކުން ހާމައެއް ނުކުރެ އެވެ.
އެ އިދާރާއިން ވަނީ މީހުން ގިނަ ތަންތަނާއި ހާމަ ތަންތަނަށް ނުދިއުމަށާއި، ވަގުތުން ރައްކާތެރި އިމާރާތްތަކުގެ ތެރެއަށް ވަނުމަށް އާންމުންނަށް އިލްތިމާސްކޮށްފަ އެވެ.
އޭގެ ފަހުން ސިވިލް ޑިފެންސުން ބުނީ ކުރިމަތިވި ނުރައްކާ މިހާރު ފިލާފައިވާ ކަމަށެވެ. އެހެންނަމަވެސް، މީހުން އެއްވެ އުޅޭ ތަންތަނަށް ނުދިއުމަށާއި، ހާދިސާ ހިނގާ ސަރަހައްދުތަކުގައި ފޮޓޯ ނެގުމާއި ވީޑިއޯ ކުރުމުން ދުރުހެލިވުމަށް އެ އިދާރާއިން ވަނީ އާންމުންގެ ކިބައިން އެދިފަ އެވެ.
މައްކާގެ އިތުރުން ޖިއްދާ އާއި ތާއިފްގެ ގަވަރުނަރޭޓްތަކަށް ވެސް އަންގާރަ ދުވަހުގެ ހެނދުނުގެ ވަގުތެއްގައި މިފަދަ ކުއްލި އިންޒާރުތަކެއް ނެރުނެވެ. ނަމަވެސް އޭގެ ކުޑަވަގުތުކޮޅެއް ފަހުން އެ ސަރަހައްދުތަކަށް ނެރުނު އިންޒާރުތައް ވަނީ އުވާލާފަ އެވެ.
ސައުދީގެ އެކި ސަރަހައްދުތަކަށް މިފަދަ ކުއްލި އިންޒާރުތަކެއް ދީފައި މިވަނީ، ހޫތީން އެ ގައުމަށް ދޭ ހަމަލާތައް ވަރުގަދަކޮށްފައިވާ ދަނޑިވަޅެއްގަ އެވެ.
އެގޮތުން ހޫތީން ސައުދީގެ ޚަމީސް މުޝައިތު ފަދަ ސިޓީތަކަށް އަމާޒުކޮށް ފޮނުވާލި މިސައިލްތަކާއި ޑްރޯން ހަމަލާތަކުގައި މިހާތަނަށް މަދުވެގެން 13 އާންމުން ވަނީ ޒަޚަމްވެފަ އެވެ.
