މައްކާގެ ދެކުނުން ހޫތީން ފޮނުވާލި ޑްރޯނެއް، އެ ސިޓީގެ އުދުހުން މަނާ ސަރަހައްދަށް ވަނުމުގެ ކުރިން ސައުދީ އަރަބިއްޔާގެ އެއާ ޑިފެންސް ސިސްޓަމްތަކުން ގޮއްވާލައިފި އެވެ.
އަންގާރަ ދުވަހުގެ އިރުއޮއްސުނު ވަގުތު ހުއްޓުވި މި ޑްރޯނަކީ، ޖުލައި 2017 ގައި ފޮނުވާލި ބެލިސްޓިކް މިސައިލަށް ފަހު، މައްކާއަށް އަމާޒުކޮށް ހޫތީން ދިން ދެވަނަ ހަމަލާ ކަމަށް ސައުދީ ކޯލިޝަނުގެ ތަރުޖަމާނު ތުރުކީ އަލް މާލިކީ ނެރުއްވި ބަޔާނެއްގައި ވިދާޅުވި އެވެ.
މިއީ އީރާނަށް ތާއީދުކުރާ ހޫތީ ހަނގުރާމަވެރިން ދިން ހަމަލާއެއް ކަމަށާއި، މިކަމުގެ ސަބަބުން ސައުދީ އަރަބިއްޔާ މި ހަނގުރާމައިގެ ތެރެއަށް އިތުރަށް ވަދެފައިވާ ކަމަށް ވެސް އޭނާ ވިދާޅުވި އެވެ.
އިސްލާމްދީނުގެ އެންމެ މުގައްދަސް ބައެއް ބިނާތައް ހުންނަ އަދި ހައްޖުގެ އަޅުކަން އަދާކުރާ މައި މަރުކަޒަކީ މައްކާ ކަމަށްވާއިރު، އެ ސިޓީގެ ސަލާމަތާއި ރައްކާތެރިކަމަކީ "ރަތް ރޮނގެއް" ކަމަށް ކޯލިޝަނުގެ ތަރުޖަމާނު އަލް މާލިކީ ވިދާޅުވި އެވެ.
ނަމަވެސް، ހޫތީންގެ އިސްވެރިން ވަނީ މައްކާއަށް އަމާޒުކޮށް އެއްވެސް ހަމަލާއެއް ދިން ކަމަށް އިންކާރުކޮށްފަ އެވެ.
އެމެރިކާ އާއި އީރާނާ ދެމެދު ހަ މަސް ދުވަހަށް ދެމިގެން ގޮސްފައިވާ ހަނގުރާމައިގެ ސަބަބުން ހޯރްމޫޒް ކަނޑުއޮޅިން މުދާ އުފުލުން ވަރަށް ބޮޑަށް މަޑުޖެހިފައިވާ ދަނޑިވަޅެއްގައި، ސައުދީ އަރަބިއްޔާއަށް ދެމުންދާ މި ހަމަލާތަކުގެ ސަބަބުން ދުނިޔޭގެ ހަކަތައިގެ ބާޒާރަށް ވަނީ ބޮޑު ލޮޅުމެއް އައިސްފަ އެވެ.
ދުނިޔޭގެ އެންމެ މުހިންމު އެއް ކަނޑުއޮޅި ކަމަށްވާ ބާބުލް މަންދަބަށް ފެންނަ ގޮތަށް އޮންނަ ޔަމަނުގެ ރަތްކަނޑުގެ އައްސޭރިފަށުގެ ބައެއް ސަރަހައްދުތައް ފާއިތުވި ދުވަސްތަކުގައި ހޫތީންގެ ބާރުގެ ދަށަށް ގެންގޮސްފައިވާއިރު، މީގެ ސަބަބުން ހޯރްމޫޒް ކަނޑުއޮޅީގެ ބަދަލުގައި އެހެން މަގުތަކުން ސައުދީން ބޭރުކުރާ ތެލަށް ވަނީ ނުރައްކާ ކުރިމަތިވެފަ އެވެ.
މައްކާގެ ސަލާމަތީ ކަންކަމާ ގުޅޭގޮތުން ސައުދީ އަރަބިއްޔާއިން އަންގާރަ ދުވަހު އިންޒާރު ނެރެފައިވީ ނަމަވެސް، ހޫތީންގެ ސިޔާސީ ބިއުރޯގެ މެންބަރު މުހައްމަދު އަލް ފަރާހް ވަނީ އެ ސިޓީއަށް ހަމަލާދިން ކަމަށް ބުނާ ވާހަކަތައް ދޮގުކޮށްފަ އެވެ.
ފާއިތުވި ހަފުތާގައި ސައުދީ އަރަބިއްޔާއަށް އަމާޒުކޮށް ބޮޑެތި ހަމަލާތަކެއް ދީފައިވާ ކަމަށް ހޫތީން ވަނީ އިއުލާންކޮށްފަ އެވެ. މީގެ ތެރޭގައި ހޯމަ ދުވަހު ވައިގެ މަރުކަޒަކަށް ދިން ހަމަލާ ހިމެނޭއިރު، އެއީ ޔަމަނަށް ދެމުންދާ ވައިގެ ހަމަލާތަކުގެ ބަދަލުހިފުމެއް ކަމަށް އެ ޖަމާއަތުން ބުނެ އެވެ. ސައުދީ އިސްވެ އޮންނަ ކޯލިޝަނުން ބުނި ގޮތުގައި، ވައިގެ މަރުކަޒަށް ދިން އެ ހަމަލާގައި އާންމުންގެ 13 މީހަކު ވަނީ ޒަހަމްވެފަ އެވެ.
މީގެ އިތުރުން، އަރަބި ހަނަފަސް ސަހަރާ ހުރަސްކޮށް އޮންނަ ސައުދީގެ އެންމެ މުހިންމު ތެޔޮ އުފުލާ މަގު ކަމަށްވާ "އީސްޓް-ވެސްޓް ޕައިޕްލައިން" އަށް ހުކުރު ދުވަހު ދިން ހަމަލާގެ ޒިންމާ، އިރާގުގައި ހަރަކާތްތެރިވާ އީރާނަށް ތާއީދުކުރާ އެހެން ގްރޫޕެއްގެ ބޮލުގައި ސައުދީން ވަނީ އަޅުވާފަ އެވެ.
ޕައިޕްލައިންގެ މަސައްކަތްތައް އަލުން ފެށޭނީ ކޮން އިރަކު ކަމެއް ސައުދީ އަރަބިއްޔާއިން އަދި ހާމަކޮށްފައެއް ނުވެ އެވެ.
މިދިޔަ ހަފުތާގައި ސައުދީ އަރަބިއްޔާގެ ވަލީއަހުދު މުހައްމަދު ބިން ސަލްމާން ވަނީ އެމެރިކާގެ ރައީސް ޑޮނަލްޑް ޓްރަމްޕަށް ފޯނުން ގުޅުއްވައި އަސްކަރީ އެހީތެރިކަމަށް އެދިވަޑައިގެންފަ އެވެ. ނަމަވެސް، މިހާތަނަށް އެމެރިކާއިން ފޯރުކޮށްދެމުންދަނީ ޖާސޫސީ މައުލޫމާތު އެކަންޏެވެ.
