ރާއްޖޭގެ ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަން ކުންފުނީގެ ހިންގުން ބޮއްސުންލައި، މާލީ ގޮތުން އެތަކެއް ގެއްލުމެއް ލިބެމުން އަންނަ ކަމަށް ރައްޔިތުންގެ މަޖިލީހަށް، މާވަށު ދާއިރާގެ މެންބަރު މުހައްމަދު ސައީދު މިއަދު ހުށަހެޅި ކުއްލި މައްސަލައަށް ބަހުސް ނުކޮށް، މަޖިލިސް ތަޅުމުން ބޭރުކޮށްލައިފި އެވެ.
ސައީދު މިއަދު ހުށަހެޅުއްވި ކުއްލި މައްސަލައިގައި ވަނީ 2020 ވަނަ އަހަރު އެ ކުންފުންޏަށް 400 މިލިއަން ރުފިޔާގެ ގެއްލުން އަދި ފާއިތުވީ އަހަރު 159 މިލިއަން ރުފިޔާގެ ގެއްލުން ވެފައިވާ ކަމަށް ބުނެފަ އެވެ. އަދި، މިހާރު ވެސް ކުންފުނި ހިންގަމުން އަންނަނީ ފިނޭންސުން އިތުރަށް 18 މިލިއަން ނަގައިގެން ކަމަށް ބުނެފައިވެ އެވެ.
"ކުންފުނީގެ ހާލަތު މިހާ ދަށު ދަރަޖައަކަށް ވެއްޓުމުގެ ސަބަބުން، މޯލްޑިވިއަންގެ މަތިންދާބޯޓުތަކުގައި ޓެކްނިކަލް ގޮތުން ބައިނަލްއަގްވާމީ މިންގަނޑުތަކުން ދަމަހައްޓަން ޖެހޭ އަދި ހިފަހައްޓަން ޖެހޭ ކަންކަން ނުހިފެހެއްޓި، ފަހަކަށް އައިސް މަތިންދާބޯޓުގެ ޓަޔަރު ވެސް ބަދަލުކުރަން ޖެހޭ މުއްދަތަށް ނުކުރެވި، ބައެއް ބޯޓުތަކުގެ ސްޕެއާ ނުލިބި ގްރައުންޑު ކުރުމުގެ މައްސަލަ ކުރިމަތިވާތީ،" ކުއްލި މައްސަލައިގައި ބުނެފައިވެ އެވެ.
މައްސަލައިގައި ވަނީ ކުންފުނީގެ މަތިންދާބޯޓުތަކުގައި ހުންނަން ޖެހޭ ސަލާމަތީ ކަންކަން ކަށަވަރު ކުރުމަށް ސަރުކާރަށް ގޮވާލާފަ އެވެ.
މެންބަރު ސައީދު ކުއްލި މައްސަލަ ހުށަހަޅުއްވަމުން ދިޔަ ވަގުތު، ބައެއް މެންބަރުން މަޖިލިސް ތެރޭގައި ނިޒާމީ ނުކުތާ ނަންގަވައި، އަޑުގަދަ ކުރައްވާފައި ވެސް ވެ އެވެ.
މިގޮތުން ނިޒާމީ މައްސަލައެއް ނަންގަވައި ތިނަދޫ އުތުރު ދާއިރާގެ މެންބަރު އަބްދުލްމުގުނީ ވަނީ އައިލެންޑު އޭވިއޭޝަނަށް ދިމާވެގެން އުޅެނީ ކޮން ކަމެއްތޯ ސުވާލުކުރައްވާފަ އެވެ.
އަދި، ހެންވެއިރު ދެކުނު ދާއިރާގެ މެންބަރު ހުސައިން ޝަހީމް ވަނީ މަޖިލީހުގައި ސަރުކާރު ކުންފުނިތަކާ ގުޅޭ ކޮމިޓީއެއް މަޖިލީހުގައި އޮންނައިރު، އެ ކޮމިޓީގެ ބަހެއް ނެތި އެ ކުއްލި މައްސަލަ ހުށަހަޅައިފައިވުމުން އެކަމާ ސުވާލު އުފައްދަވާފަ އެވެ.
ސައީދުގެ ކުއްލި މައްސަލަ މަޖިލީހަށް ބަލައިގަތުމާމެދު ނެގި ވޯޓުގައި 33 މެންބަރުންގެ ވޯޓުން މައްސަލަ ވަނީ ބޭރުކޮށްލާފަ އެވެ. މައްސަލަ ބަލައިގަތުމަށް ފެންނަ ކަމަށް ވޯޓު ދެއްވީ ފަސް މެންބަރުންނެވެ.
