ޓެކްސީ ދުއްވަން ކާރު ގަތުމަށް އެސްޑީއެފްސީން ދޫކުރި ޓެކްސީ ނަފާ ލޯނު ގެ ދަށުން ކާރު ލިބުނު ބައެއް މީހުންނަށް ކާރު ރަޖިސްޓާ ނުކުރެވެނީސް، އެ ލޯނު އަނބުރާ ދައްކަން ބާރު އަޅަމުންދާތީ އެކަމާ ގުޅިގެން ލޯނު ނެގި މީހުންގެ ހުރި ކަންބޮޑުވުންތައް ބަލާނެ ކަމަށް އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެ އެވެ.
މިކަމާ ގުޅިގެން އާންމު މީހަކު އެކްސް ގައި އާންމުކޮށްފައިވާ ސިޓީއަކަށް ރައްދު ދެއްވައި ސައީދު ވިދާޅުވީ ސިޓީގައި ފާހަގަކޮށްފައިވާ ކަންކަން އިންސާފުވެރިކަމާއެކު ބަލައި ކުރިއަށްދެވޭނެ އެންމެ މަގުތަކާއި ހައްލުތައް ހޯދަން މަސައްކަތް ކޮށްދޭނެ ކަމަށެވެ.
"އާއްމު ކުރައްވާފައި އެވާ ސިޓީގައި ފާހަގަކުރައްވާފައިވާ އެންމެހާ ކަންކަން ބަލައި ދިނުމަށް އެދި ޓްރާންސްޕޯޓްގެ ކަންކަން ބެލެހެއްޓެވުމަށް މަސްއޫލުވެ ތިއްބެވި ބޭފުޅުންނަށް މިހާރު ވާނީ ދަންނަވައިފަައި،" ސައީދު ވިދާޅުވި އެވެ.
އެކްސްގައި ސިޓީ އާންމުކުރި މީހާ ބުނީ ލޯނު ސްކީމްގެ ދަށުން ގެނައި ކާރުތައް ރަޖިސްޓްރީ ނުކުރެވި ލަސްވަނީ ޓްރާންސްޕޯޓުގެ ސަބަބުން ކަމަށްވާއިރު، ލޯނު ދައްކަން ބާރު އަޅަމުންދިޔުމަކީ އެކަމުގެ ސަބަބުން ލޯނު ނެގި މީހުންގެ އޮތް ކަންބޮޑުވުމެއް ކަމަށެވެ.
"ލޯނު ސްކީމްގެ ދަށުން ލިބިފައިވާ ކާރުތައް ރަޖިސްޓާ ކުރުމުގެ އަމަލީ މަސައްކަތް ލަސްވެ، ބައެއް ކާރުތައް ރަޖިސްޓާ ނުވެ ހުއްޓައި ލޯނުދެއްކުމަށް ލޯނު ދޫކުރި ފަރާތްތަކުން ތަކުރާރުކޮށް ތާއީދު ކުރަމުންދާ ކަމީ، ލޯނު ނެގި ފަރާތްތަކަށްވަރަށް ބޮޑު ތަކްލީފަކާ ކަންބޮޑުވުންތަކެއް ކުރިމަތިވެފައިވާ ކަމެކެއް،" އޭނާ ބުންޏެވެ.
އޭނާ އެދުނީ ކާރުތައް ރަޖިސްޓްރީ ކުރެވެންދެން ލޯނު އަނބުރާ ދެއްކުން ފަސްކޮށް، ކާރުތައް ރަޖިސްޓްރީ ކުރެވޭނެ އަވަސް ގޮތްތަކެއް ފަހިކޮށްދިނުމަށެވެ. އޭގެއިތުރުން ލޯނު ނެގި ހުރިހާ އެންމެންނަށް ހަމަހަމަކޮށް އެކަމުގައި ގޮތެއް ނިންމުމަށްވެސް އޭނާ އެދިފައިވެ އެވެ.
ނިމިދިޔަ އެމްޑީޕީ ސަރުކާރުން ފެށި ޓެކްސީ ނަފާ ލޯނުގެ ދަށުން ޓެކްސީ ގަންނަން ތިން ލައްކަ ރުފިޔާއާ ހަމައަށް ލޯނު ދޫކުރި އެވެ. އޭރު ލޯނު ދޫކުރީ ޓެކްސީ އައު ކުރަން ބޭނުންވެފައި ތިބި މީހުންނަށާއި އަލަށް ޓެކްސީކުރަން ބޭނުންވާ މީހުންގެ އިތުރުން އަމިއްލަ ޓެކްސީއެއް ނެތް މީހުންނަށެވެ.
ގިނަ ވެގެން ފަސް އަަހަރުގެ ތެރޭގައި އަނބުރާ ދައްކާ ހަލާސްކުރާ ގޮތަށް އެ ސްކީމްގެ ދަށުން ލޯން ދޫކުރީ އެއްވެސް އިކުއިޓީއަކާއި ކޮލެޓްރަލްއަކާ ނުލަ އެވެ. ނަމަވެސް ލޯނު ފައިސާއަށް ގަންނަ ޓެކްސީ އެ ސްކީމްގެ ދަށުން ރަހުނު ކުރެ އެވެ.
