އަހަރަކުން 400 މިލިއަން ޑޮލަރު ލިބޭނެ ކަމަށް ބުނި އިންޓަނޭޝަނަލް ބަންކަރިންގެ ހިދުމަތުން 19 މަހުން ރާއްޖެއަށް ލިބުނީ 47 މިލިއަން ޑޮލަރު ކަމަށް މިދިޔަ ބުދަ ދުވަހު އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ސައީދު ވިދާޅުވީ ބަންކަރިންގެ ހިދުމަތް ސެޕްޓެމްބަރު، 2024، ގައި ފެށި ފަހުން މިދިޔަ މަހުގެ ނިޔަލަށް ލިބުނީ 730 މިލިއަން ރުފިޔާ ކަމަށެވެ. އެއީ ޑޮލަރުގެ ގޮތުން ބަލާނަމަ 47.3 މިލިއަން ޑޮލަރެވެ.
"31 މާޗު 2026 އާ ހަމައަށް 730 މިލިއަން ރުފިޔާ އިންޓަނޭޝަނަލް ބަންކަރިންގެ ވިޔަފާރި ފެށިފަހުން ލިބިފައި އޮތްކަމަށް އަޅުގަނޑަށް މައުލޫމާތު ލިބެނީ އެނގޭތޯ،" ސައީދު ވިދާޅުވި އެވެ.
ބަންކަރިން ހިދުމަތުން އަހަރަކު 400 މިލިއަން ޑޮލަރު ލިބޭނެ ކަމަށް ސައީދު ވިދާޅުވީ ވެރިކަން ހިންގާ ޕީއެންސީގެ ހަރުގޭގައި ޖުލައި 7، 2024، ގައި ބޭއްވި ޖަލްސާއެއްގަ އެވެ.
ސައީދު އޭރު ވިދާޅުވީ ސަރުކާރުން އަންދާޒާކުރާ ގޮތުގައި ބަންކަރިން ހިދުމަތުން މިދިޔަ އަހަރުގެ ޖުލައި މަހުން ފެށިގެން މި އަހަރުގެ ޖުލައި މަހުގެ ނިޔަލަށް 400 މިލިއަން ޑޮލަރު ހޯދޭނެ ކަމަށެވެ.
"ކޮބައިތޯ މިކަމުން [ބަންކަރިން އިން] އިކޮނޮމީއަށް އަންނަ ބަދަލަކީ. ހަމައެކަނި ފުރަތަމަ. މި ޖުލައި މަސް ނިމޭއިރުގަ ބަންކަރިންގެ ހިދުމަތް ފަށައިގެން އަންނަ އަހަރުގެ ޖުލައި އަންނަން ވާއިރު. އަޅުގަނޑުމެން އަންދާޒާކޮށްލިއިރު. އަޅުގަނޑު ދެންމެ މި ދެންނެވި ރާއްޖޭގެ ޖީޑީޕީ އަކީ 6.5 ބިލިއަން އެމެރިކާ ޑޮލަރު. އޭގެތެރެއަށް އިރާދަކުރެއްވިއްޔާ މުޅިން އައު 400 މިލިއަން ޑޮލަރު ވަދެގެން ދާނެ،" ސައީދު އޭރު ވިދާޅުވި އެވެ.
މިދިޔަ އަހަރުގެ އޮކްޓޯބަރުގައި ސައީދު މަޖިލީހަށް ހާޒިރުކުރުމުން ބަންކަރިންގެ އަދާހަމަ ހޯދުމަށް ގަލޮޅު ދެކުނު ދާއިރާގެ މެންބަރު މީކާއިލް ނަސީމް ކުރެއްވި ސުވާލަށް ޖަވާބު ދެއްވަމުން އޭރު ވިދާޅުވީ ބަންކަރިންގެ ހިދުމަތަށް އެހާ ހިސާބަށް 192 މިލިއަން ރުފިޔާ ލިބިފައިވާ ކަމަށެވެ.
މިގޮތުން މިދިޔަ އޮކްޓޯބަރު މަހުގެ ނިޔަލަށް ބަންކަރިންގެ ހިދުމަތުން ރާއްޖެއަށް ލިބިފައިވަނީ 12.4 މިލިއަން ޑޮލަރު ކަމަށްވާއިރު، ސައީދު ވިދާޅުވީ ޓެކްސްގެ ގޮތުގައި ބަންކަރިން އިން 17 މިލިއަން ރުފިޔާ އޭރު ލިބުނު ކަމަށެވެ. އެއީ ބޭންކު ރޭޓުން ބަލާނަމަ 1.1 މިލިއަން ޑޮލަރެވެ.
ބަންކަރިންގެ ހިދުމަތާއެކު ވަރަށް ބައިވަރު ހިދުމަތްތައް ފަށާނެ ކަމަށް މީގެ ކުރިން ސަރުކާރުން ބުނެފައިވެ އެވެ. އޭގެތެރޭގައި ޝިޕް ޓު ޝިޕް ސާވިސް އާއި ކްރޫ ޗޭންޖު ހިދުމަތުގެ އިތުރުން ވޯޓާ ބަންކަރިން އާއި މެއިންޓެނެންސް ހިދުމަތް އަދި ބޯޓުފަހަރަށް ޕްރޮވިޝަންސް ސަޕްލައި ކޮށްދިނުން ހިމެނެ އެވެ.
ބަންކަރިން ހިދުމަތުގެ ސިޔާސަތު ސަރުކާރުން ކަނޑައެޅުމަށްފަހު އެ މަސައްކަތް ހަވާލު ކޮށްފައި ވަނީ އެސްޓީއޯއާ އެވެ.
