ނޮވެމްބަރު 2024، ގައި ހުޅުވި ޑިވެލޮޕްމަންޓު ބޭންކް އޮފް މޯލްޑިވްސް (ޑީބީއެމް) އިން އެއްވެސް ހިދުމަތެއް ފޯރުކޮށް ނުދޭތީ އެ ބޭންކުގެ ދޮރު ހުޅުވޭނެ ތާރީހެއް ހޯދުމަށް މިއަދުގެ މަޖިލިސް ޖަލްސާގައި ކުރި ސުވާލަށް ޖަވާބު އިކޮނޮމިކް މިނިސްޓަރު މުހައްމަދު ސައީދަށް ޖަވާބު ނުދެއްވުނެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ސައީދުއާ މި ސުވާލު އަމާޒުކުރެއްވީ އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޕާލިމެންޓަރީ ގްރޫޕްގެ ލީޑަރު އިބްރާހިމް ނާޒިލް އެވެ. އޭނާ ސައީދުގެ އަރިހުން އެދުނީ ޑީބީއެމްގެ އޮފީހުގެ ދޮރު ހުޅުވޭނެ ސީދާ ތާރީހެއް ދިނުމަށެވެ.
"ޑިވެލޮޕްމަންޓު ބޭންކަކީ މުހިންމު ބޭންކެއް، އެ ބޭންކު އޮޕަރޭޝަނަލައިޒް ކުރުމަށް ކުރަން ޖެހޭ މަސައްކަތްތައް އެ ދަނީ ކުރަމުން. އަޅުގަނޑު ހަމަ އިއްޒަތްތެރި މެންބަރު މި ސުވާލު ކުރެއްވީމާ އެބަ ހިތަށް އަރާ މީ ހަމަ މުޅިން އާ ކަންތައްތަކުގެ ވާހަކައޭ މި ދައްކަނީ،" އެ ސުވާލަށް ސީދާ ޖަވާބު ނުދެއްވައި ސައީދު ވިދާޅުވި އެވެ.
އެއަށްފަހު ސައީދު ވަނީ އެމްޑީޕީގެ ސަރުކާރުގައި އެންމެ ގެދޮށު މަސް ފެކްޓްރީއެއް ވެސް ގާއިމުނުކުރެވޭ ކަމަށް ވިދާޅުވެފަ އެވެ. އެމްޑީޕީގެ ސަރުކާރުގައި ނުފުއްދާ ވައުދުތަކުގެ ވާހަކަ ދައްކަން ޖެހެނީ ތަކުރާރުކޮށް ޑީބީއެމްގެ ވާހަކަ ދައްކަވާތީ ކަމަށް ސައީދު ވިދާޅުވި އެވެ.
އޭނާ ޖަވާބު ދެއްވުމުން ޗެމްބަރުގައި ތިއްބެވި ވެރިކަން ކުރާ ޕާޓީގެ މެންބަރުން ތަރުހީބު ދެއްވި އެވެ.
ދެމެހެއްޓެނިވި އިގްތިސާދީ އަދި އިޖުތިމާއީ ތަރައްގީއަށް އިންވެސްޓުކުރުމާއި އުމްރާނީ ތަރައްގީއަށް ބޭނުންވާ ފައިސާ ހޯދުމުގެ އަމާޒުގައި މި ސަރުކާރުން އުފެއްދި ޑިވެލޮޕްމެންޓް ބޭންކު ހުޅުވީ މިދިޔަ ނޮވެމްބަރު 16، 2024 ގައި ރައީސް ޑރ، މުހައްމަދު މުއިއްޒު އެވެ. މި ސަރުކާރުގެ ފުރަތަމަ އެއް އަހަރުދުވަހުގެ ކާމިޔާބީތަކުގެ ތެރޭގައި ވެސް އެކަން ފާހަގަކުރި އެވެ.
ނަމަވެސް މިއަދާ ހަމައަށް ވެސް އެތަނުން އެއްވެސް ހިދުމަތެއް ދޭން ފަށައިފައެއް ނުވެ އެވެ.
ސަރުކާރުން މީގެ ކުރިން ބުނެފައި ވަނީ މިހާރު އޮތް ބޭންކިން ނިޒާމުގެ ތެރެއިން ރައްޔިތުން ބޭނުންވާ ތަރައްގީ ގެނެވޭނެ ޖާގައެއް ނެތް ކަމަށާއި ބޭންކިން ނިޒާމުގެ ތެރެއަށް ޑިވެލޮޕްމެންޓް ބޭންކެއް ވައްދަން ޖެހުނީ އެ ސަބަބާ ހުރެ ކަމަށެވެ. އަދި އެ ބޭންކު ގާއިމު ކުރުމުން ތަރައްގީއަށް ބޭނުންވާ ލޯނާއި ފައިސާ ދިނުމުގަ މިހާރަށް ވުރެ މާ ލުއި ގޮތްތަކެއް ފަހިވެގެންދާނެ ކަމަށް ސަރުކާރުން ބުނެފައިވެ އެވެ.
އެކަމަކު މިއަދާ ހަމައަށް އެ ބޭންކުން ލޯނުގެ ގޮތުގައި ލޯ ލާރިއެއް ލިބުނު ދިވެއްސަކު ވެސް ނެތެވެ. ނަމަވެސް އެ ބޭންކަށް އެތައް މިލިއަން ރުފިޔާއެއް ސަރުކާރުން ވަނީ ހަރަދުކޮށްފަ އެވެ.
