ގެދޮރުވެރިޔާ ބޯހިޔާވަހިކަމުގެ ސްކީމްގެ ދަށުން ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭ ދެވަނަ ފިޔަވަހީގައި އިމާރާތްކުރި ފްލެޓުތަކަށް ކުރީ ސަރުކާރުން ކަނޑައެޅި ކުލިން ހަރަދުުތައް ފޫނުބެދޭ ކަމަށް ބުނެ ފްލެޓުތަކުގެ ކުލި ބޮޑުކުރަން ސަރުކާރުން މިއަދު ނިންމައިފި އެވެ.

ފްލެޓު ލިސްޓާ ގުޅޭ މައުލޫމާތު ދޭން ބޭއްވި ނޫސްވެރިންގެ ބައްދަލުވުމުގައި ހައުސިން މިނިސްޓަރު ޑރ. އަބްދުالله މުއްތޮލިބު ވިދާޅުވީ, ކުރީ ސަރުކާރުން ފްލެޓުތަކުގެ އަގުތައް ކަމުގައި ކަނޑައެޅި އަދަދުތަކަކީ, ފްލެޓުތައް އިމާރާތްކުރަން ނެގި ލޯނުތައް ދެއްކޭ ވަރުގެ އަދަދެއް ނޫން ކަމަށެވެ.

"މި އަދަދުތަކަކީ ދައުލަތުން ލޯނު ދައްކަން ޖެހޭ ފައިސާއަށް ބަލައި, އެސެސްމަންޓު ހަދާފައި ކަނޑައަޅާފައި ހުރި އަދަދުތަކެއް ނޫން. އަދި ސަރުކާރުން [] މިހާތަނަށް ކުރިއަށް ގެންގޮސްފައި ހުރި މަޝްރޫއުތަކުން ނަގަން ކަނޑައަޅާފައި ހުރި އަދަދަށް ބަލާފައި ވެސް, ކަނޑައަޅާފައި ހުރި އަދަދުތަކެއް ނޫން," މުއްތޮލިބު ވިދާޅުވި އެވެ.

ކުރީ ސަރުކާރުން ކުރި އިއުލާނުގައި އޮތީ ދެ ކޮޓަރި އެޕާޓަމަންޓަކަށް 5,000ރ. އަދި މެއިންޓެނަންސް ފީއަށް 1000ރ. އަދި ތިން ކޮޓަރި އެޕާޓްމަންޓަކަށް 7,000ރ. އަދި މެއިންޓެނަންސް ފީއަށް 1,000ރ. އެވެ. މުއްތޮލިބު ވިދާޅުވީ މިއީ އިންސާފުވެރިކޮށް ކަނޑައަޅާފައި ހުރި އަދަދުތަކެއް ކަމަށް ގަބޫލުނުކުރައްވާ ކަމަށެވެ.

އެފްޑީސީގެ ދެ ކޮޓަރީގެ ފްލެޓުތަކުން ނަގާ އަގު

• މަހު ކުލި - 7,000ރ
• މެއިންޓެނަންސް ފީ - 1,000ރ.
• މަހަކު ދައްކަން ޖެހޭ ޖުމްލަ - 8,000ރ.
• ސެކިއުރިޓީ ޑިޕޮސިޓި - 15,000ރ.

ތިން ކޮޓަރީގެ ފްލެޓުތަކުން ނަގާ އަގު

• މަހު ކުލި - 9,000ރ.
• މެއިންޓެނަންސް ފީ - 1,500ރ.
• މަހަކު ދައްކަން ޖެހޭ ޖުމްލަ - 10,500ރ.
• ސެކިއުރިޓީ ޑިޕޮސިޓު - 25,000ރ.

މިކަމަށް ބާރު ދޭން އޭނާ މިސާލަކަށް ނެންގެވީ ހިޔާ ފްލެޓުތަކުގެ ކުލީގެ ގޮތުގައި ކުރިން ނަގަމުން އައި 7,000ރ. އެވެ. މި ސަރުކާރުން އެ އަދަދު 3,984ރ. އަށް ކުޑަކޮށްފަައިވާއިރު, މުއްތޮލިބުގެ ވާހަކައިގައި މި އަގަށް އެއްވެސް ވަރަކަށް ރިއާޔަތްނުކުރަައްވަ އެވެ.

މިނިސްޓަރު ވިދާޅުވި ގޮތުން ނަމަ މިހާރު ކަނޑައަޅާފައި ހުރި އަދަދުތަކަކީ ވެސް, ލޯނު ދެއްކޭ ވަރުގެ އަދަދުތަކެއް ނޫނެވެ. އަދި ލޯނު ދެއްކޭ ވަރަށް ފައިސާ ހޯދާ ނަމަ ދެ ކޮޓަރީގެ ފްލެޓަކުން މަހު ކުއްޔަށް 9,000ރ. އަދި ތިން ކޮޓަރީގެ ފްލެޓުތަކުން މަހު ކުއްޔަށް 13,000ރ. ނަގަން ޖެހޭ ކަމަށް އޭނާ ވިދާޅުވި އެވެ.

"ދައުލަތުން ހިންގާ މިފަދަ ބޯހިޔާވަހިކަމުގެ މަޝްރޫއުތަކަކީ ހިންގަން ޖެހޭނީ ވީހާ ވެސް ބަޖެޓަށް ބުރަ ނުވާ ގޮތަށް, ދެމެހެއްޓެނިވި ގޮތެއްގައި ކަމުގައި ވާތީ މި އަގުތައް ކަނޑައެޅީ" ކުލި ބޮޑު ކުރަން ނިންމި ސަބަބާ ގުޅޭ ގޮތުން މުއްތޮލިބު ވިދާޅުވި އެވެ.

މިހާރު ކަނޑައަޅާފައިވާ އަގުތަކަކީ ސަރުކާރުން ހަރަދުގެ ބައެއް ސަބްސިޑައިޒް ކުރާ ގޮތަށް ކަނޑައަޅާފައި ހުރި އަގުތަކެކެވެ. މިނިސްޓަރު ވިދާޅުވި މި އަގުގައި ވެސް ލޯނު ދެއްކުމަށް ޓަކައި އަހަރަކު ގާތްގަނޑަކަށް 100 މިލިއަނެއްގައި ރުފިޔާ ސަރުކާރުން ހަރަދު ކުރަން ޖެހޭނެ ކަމަށެވެ.

އެފްޑީސީގެ ފްލެޓު މަޝްރޫއަކީ އިންޑިއާ އެގްޒިމް ބޭންކުން ލޯނު ނަގައިގެން ހިންގާ މަޝްރޫއެކެވެ. މި މަޝްރޫއުގެ 15 ޕަސެންޓު އިކުއިޓީ ފިޔަވައި ބާކީ ހުރިހާ ހަރަދެއް ކުރަނީ ލޯނުންނެވެ. މުޅި ޖުމްލަ ޕްރޮޖެކްޓުގެ އަގަކީ, އިންޓްރެސްޓާ ނުލައި, 267 މިލިއަން ޑޮލަރު (4.1 ބިލިއަން ރުފިޔާ) އެވެ.