ހުޅުމާލޭގެ ދެވަނަ ފިޔަވަހިން ނުއަގުގައި މީހަކަށް ގޯއްޗެއް ވިއްކި މައްސަލައަށް އާންމުންގެ ފާޑުކިޔުން އަމާޒުވުމުން، ދެން އެގޮތަށް ގޯތި ނުދޭން ހައުސިން މިނިސްޓްރީން މިއަދު ބުނެފި އެވެ.
ހައުސިން މިނިސްޓަރު ޑރ. އަބްދުﷲ މުއްތަލިބު ވިދާޅުވީ ބޯހިޔާވަހިކަމާ ގުޅޭ ގޮތުން އެކި ސަބަބުތަކާ ހުރެ ހައްލު ނުވެ ދުވަސްވެފައިވާ މައްސަލަތަކުގައި ސީދާ މިނިސްޓްރީން ގޮތް ކަނޑަނާޅައި އެފަދަ މައްސަލަތައް އެޓާނީ ޖެނެރަލް އޮފީހުގެ ދަށުން ހިންގާ އޮފީސް ފޯ ސިވިލް ރައިޓްސްއަށް ހުށަހެޅުމަށް ނިންމާފައިވާ ކަމަށެވެ.
"ބޯހިޔާވަހިކަމާ ގުޅުން ހުރި މައްސަލަތަކަކީ އާންމު ފަރުދުންނާ ނުހަނު ބޮޑަށް ގުޅިފައިވާ ހައްސާސް ކަމަކަށް ވާތީ، އެފަދަ މައްސަލަތައް ހައްލުކުރުމުގައި ވީހާވެސް ހާމަކަން ބޮޑު އިންސާފުވެރި ގޮތެއްގައި އަމަލުކުރުމަށް މީގެ ފަހުން ފޮނުވާނީ ބަންޑާރަ ނައިބުގެ އޮފީހުގެ ދަށުން ހިންގާ އޮފީސް ފޯ ސިވިލް ރައިޓްސް އަށް،" މުއްތަލިބު ވިދާޅުވި އެވެ.
މިގޮތުން ހައުސިން މިނިސްޓްރީން މީގެ ފަހުން މިފަދަ މައްސަލަތަކުގައި ދެން އަމަލުކުރާނީ އޮފީސް ފޯ ސިވިލް ރައިޓްސް އިން އަންގާ ގޮތެއްގެ މަތިން ކަމަށްވެސް މުއްތަލިބު ވިދާޅުވި އެވެ.
ސޯޝަލް މީޑިއާގައި ލީކުވެފައިވާ ހައުސިން މިނިސްޓްރީގެ މެމޯއެއްގައި ބުނެފައިވާ ގޮތުން ޒާހިރު އަށް ހުޅުމާލެއިން 1250 އަކަފޫޓުގެ ބިމެއް ވިއްކަން ނިންމާފައި ވަނީ 468،750ރ. އަށެވެ. އެއިރުން އަކަފޫޓަކަށް ޖެހެނީ އެންމެ 375ރ. އެވެ.
ހުޅުމާލޭގައި އެންމެ ފަހުން ވިޔަފާރި އުސޫލުން ބިން ވިއްކާފައި ވަނީ 4000ރ. އާއި 4500ރ. ދެމެދުގެ އަގެއްގަ އެވެ. އެހެންކަމުން އަހުމަދު ޒާހިރަށް ބިން ވިއްކާފައި ވަނީ މާކެޓު އަގަށް ވުރެ ބޮޑު ޑިސްކައުންޓެއް ދީފަ އެވެ.
އެކަމުގެ މައުލޫމާތު އެނގޭ މީހަކު ނަން ނުޖެހުމަށް އަދި އަދަދު އާ ވާހަކަ ދައްކަމުން ބުނީ ޒާހިރަށް ނުއަގުގައި ގޯތި ވިއްކަން ހައުސިން މިނިސްޓްރީއަށް އެންގީ ރައީސުލްޖުމްހޫރިއްޔާގެ އޮފީހުން ކަމަށެވެ. ޒާހިރަކީ ވެރިކަން ހިންގާ ޕީޕަލްސް ނެޝަނަލް ކޮންގްރެސް (ޕީއެންސީ) ގެ މެންބަރެކެވެ.
މިކަން ދިފާއުކޮށް ހައުސިން މިނިސްޓްރީން ކުރިން ބުނީ އަހުމަދު ޒާހިރުއަށް އަގުހެޔޮކޮށް ހުޅުމާލެއިން ގޯއްޗެއް ވިއްކީ، 2003 ވަނަ އަހަރު އޭނާއަށް ހުޅުމާލޭގެ އެއްވަނަ ފިޔަވަހިން ގޯއްޗެއް ވިއްކަން އޭރުގެ ސަރުކާރުން ނިންމާފައި އޮތް ނިންމުމަކާ އެއްގޮތަށް ކަމަށެވެ.
އެގޮތުން، ޒާހިރުއަށް ގޯއްޗެއް ވިއްކާފައި އޮތީ ޑިސެމްބަރު 22، 2003، ގައި އޭރުގެ ސަރުކާރުން "މޯލްޑިވްސް ހައުސިން އެންޑް އާބަން ޑިވެލޮޕެމްންޓު ބޯޑު" މެދުވެރިކޮށް ހިންގި ބޯހިޔާވަހިކަމުގެ ސްކީމެއްގެ ތެރެއިން ހުޅުމާލޭގެ ރަށު ތެރެއިން ވިއްކި 56 ގޯތީގެ ދަށުންކަން ރަސްމީ ލިޔެކިޔުންތަކުން ފެންނަން އޮތް ކަމަށް މިނިސްޓްރީން ބުންޏެވެ.
މި މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށް ހައުސިން މިނިސްޓްރީން ވަނީ ހުށަހަޅާފަ އެވެ. އެކަމަކު އެ މުއާމަލާތް އެ ކޮމިޝަނުން ބިން ވިއްކުމުގެ މުއާމަލާތް ނުހުއްޓުވާ ކަމަށް މައުލޫމާތު ލިބެ އެވެ.
