ރޭގެ ވަގުތެއްގައި ނަގިލި ކަހާލައިގެން ގޮސް ސިނަމާލެ ބްރިޖުގެ ތަނބަކަށް ދެ ބޯޓު އުރުނު ހާދިސާގައި ބްރިޖުގެ އޮނިގަނޑަށް އެއްވެސް ގެއްލުމެއް ލިބިފައިނުވާ ކަމަށް ހައުސިން އަދި އިންފްރާސްޓްރަކްޗާ މިނިސްޓަރު، އަބްދުﷲ މުއްތަލިބު ވިދާޅުވެއްޖެ އެވެ.
އެކްސްގައި މުއްތަލިބު ކުރެއްވި ޕޯސްޓެއްގައި ބުނީ ސިނަމާލެ ބްރިޖު ތަރައްގީކުރި ކުންފުނި، ސެކަންޑް ހާބާ އިންޖިނިއަރިން ކޮމްޕެނީ (އެސްއެޗްެއީސީ) ގެ އިންޖިނިއަރުން ރެއާއި މިއަދުގެ ވަގުތެއްގައި ބްރިޖުގެ އިންސްޕެކްޝަންތަކެއް ކުރިއަށް ގެންދިޔަ ކަމަށެވެ.
"މާތްﷲގެ އިރާދަފުޅާއެކު، ބްރިޖްގެ އޮނިގަނޑަށް އެއްވެސް ގެއްލުމެއް ލިބިފައެއް ނުވޭ، ކުދިކުދި ގެއްލުން ލިބިފައި ވަނީ ހަމައެކަނި ބޭރު ފަށަލައަށް. ޗައިނާ ސަރުކާރުގެ ހިލޭ އެހީގެ ދަށުން އެސްއެޗްއީސީއާއެކު ގާއިމުކޮށްފައިވާ ބްރިޖް ބެލެހެއްޓުމާއި މަރާމާތުކުރުމުގެ އެއްބަސްވުމުގެ ދަށުން، އެ ކުންފުނިން އެކަށީގެންވާ މިންގަނޑުތަކާ އެއްގޮތަށް އެ ތަންތަން މަރާމާތު ކުރާނެ،" މުއްތަލިބު ކުރެއްވި ޕޯސްޓުގައި ވިދާޅުވި އެވެ.
އޭނާ ވިދާޅުވީ އެގޮތަށް ކޮންޓްރޯލުން ނެއްޓިގެންދާ އުޅަނދެއްގެ ސަބަބުން ބްރިޖުގެ އިތުރުން ވެލާނާ އިންޓަނޭޝަނަލް އެއާޕޯޓާއި އަދިވެސް އެހެން ބައެއް މުހިންމު ވަސީލަތްތަކަށް ނުރައްކާވެ މުޅި މާލެ ސަރަހައްދަށް ބޮޑު ކާރިސާއެއް ކުރިމަތިވުމަކީ ވެދާނެ ކަމެއް ކަމަށެވެ.
އެހެންކަމުން އެފަދަ ކަމެއް ހިނގުމުން ރައްކާތެރިވުމުގެ ގާބިލުކަން ހޯދުމަށްޓަކައި، އެގޮތަށް ކޮންޓްރޯލުން ނައްޓައިގެންދާ އުޅަނދެއް ބްރިޖާ ހަމައަށް ފޯރުމުގެ ކުރިން ހުއްޓުވުމުގެ ގާބިލުކަން ލިބިފައިވާ ދެ ޓަގު ބޯޓު ހޯދުމުގެ މަސައްކަތް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރަމުންދާ ކަމަށް އޭނާ ވިދާޅުވި އެވެ.
"ކުރިއަށް އޮތް ދެ މަސްދުވަހުގެ ތެރޭގައި މި ޓަގުތައް ލިބޭނެ ކަމަށް ބެލެވޭ. މީގެ އިތުރުން، ބަނދަރުގައި އުޅަނދުފަހަރު އަޅާފައި ބަހައްޓާ އުސޫލުތައް މުރާޖައާކޮށް، ކޯސްޓްގާޑާއި ކަމާބެހޭ އެހެނިހެން އިދާރާތަކާ ގުޅިގެން ކުއްލި ހާލަތްތަކުގައި މުއާމަލާތް ކުރާނެ ސާފު އުސޫލުތަކާއި އިޖާބަދޭނެ ގޮތްތައް ސަރުކާރުން އެކުލަވާލާނެ،" މުއްތަލިބު ވިދާޅުވި އެވެ.
ނަގިލި ކަހާލައިގެން ރޭ ގޮސް ބްރިޖުގެ ތަނބަކަށް އުރުނު ދެ ބޯޓަކީ މިދިޔަ އޭޕްރިލް މަހު އެއްވެސް ހުއްދައެއް ނެތި ރާއްޖެ ސަރަހައްދަށް ވަދެ މާލެ ސަރަހައްދުގައި ބަނދަރުކޮށްފައި އޮއްވާ ފެނުނު ދެ ބޯޓެވެ. އެ ދެ ބޯޓު ރާއްޖެ ސަރަހައްދުގައި އޮތްކަން ސަލާމަތީ ބާރުތަކަށް އެނގުނީ ވެސް މާލެ ސަރަހައްދުގައި އެ ދެ ބޯޓު ބަނދަރުކުރިތާ ހަފުތާއެއް ފަހުންނެވެ.
އިތުބާރުކުރެވޭ މަސްދަރުތަކުން އަދަދު ނޫހަށް މައުލޫމާތު ދިން ގޮތުގައި އެމްޓީ ކޭޖީ 1 އަދި އޭއެލް 1 ނަމަކަށް ކިޔާ މި ދެ އުޅަނދު ރާއްޖޭގެ ސަރަހައްދަށް ވަދެފައިވަނީ އޭޕްރީލް 26، ގަ އެވެ.
މި ދެ އުޅަނދު ރާއްޖެއަށް ވަދެފައިވަނީ ކަމާބެހޭ އެއްވެސް އިދާރާއަކަށް ކުރިން އެންގުމަކާ ނުލައެވެ. މިހާރު މާލޭ ސަރަހައްދުގައި ބަނދަރުކޮށްފައި އޮތް ދެ އުޅަނޑުގެ ތެރެއިން އޭއެލް 1 އަކީ އައިއެމްއޯ ނަންބަރެއް ނެތް އުޅަނދެކެވެ.
