ގެދޮރުވެރިޔާ ސްކީމުގެ ދަށުން ދޫކުރި 4000 ފްލެޓު މައްސަލަތަކެއް އަދި ސްކީމުގެ ސައްހަކަން ކަށަވަރުކުރާ ކަމަށް ބުނިތާ އަހަރެއް ފާއިތުވިފަހުން، ފްލެޓު ލިިބުނު އެންމެންގެ ލިސްޓު އަލުންބަލުން ވެރިފައި ކުރަން ފަށާފައިވާ ކަމަށް ސަރުކާރުން މިއަދު ބުނެފި އެވެ.

މިއަދު ބޭއްވި ނޫސްވެރިންގެ ބައްދަލުވުމެއްގައި ހައުސިން އެންޑް ކޮންސްޓްރަކްޝަން މިނިސްޓަރު އަބްދުﷲ މުއްތަލިބު ވިދާޅުވީ، ގެދޮރުވެރިޔާ ސްކީމަށް ހުށަހަޅާފައިވާ އެންމެންގެ ފޯމުތައް ވެރިފައި ނުކުރަން ނިންމާފައިވާ ކަމަށެވެ. ދެން ވެރިފައި ކުރާނީ ފްލެޓު ލިބުނު 4000 މީހުންގެ ފޯމުތައް އެކަނި ކަމަށް ވެސް އޭނާ ވިދާޅުވި އެވެ.

ފޯމުތަކުގެ ސައްހަކަން ކަށަވަރު ކުރާނީ ފްލެޓު ދޫކުރާ އުސޫލާއި ގެދޮރުވެރިޔާ ޕޯޓަލްގައި ދީފައިވާ އިރުޝާދުތަކަށް އެކަނި ކަމަށް ވެސް އޭނާ ވިދާޅުވި އެވެ. އެހެންކަމުން ފޯމުގައި ހުށަހަޅަން ބުނެފައިވާ ލިޔުންތައް ފިޔަވައި އިތުރު ލިޔުމެއް ހުށަހަޅާފައިވާ ނަމަ ފޯމު ވެރިފައި ކުރާއިރު އެ ލިޔުމަށް ނުބަލާނެ އެވެ.

"މި ވެރިފިކޭޝަން ޕްރޮސެސް ކުރިއަށްދާއިރު ބަލާނީ ޖޫން 26، 2022 ގައި ގެޒެޓް ކުރެވުނު ގެދޮރުވެރިޔާ ސްކީމްގެ ފްލެޓް ދޫކުރާ އުސޫލު G20/2022 އަށް. އަދި އެޕްލިކޭޝަން ހުށަހެޅުމަށް ތައްޔާރުކޮށްފައިވާ ގެދޮރުވެރިން ޕޯޓަލްގައި ދީފައިވާ އިރުޝާދުތަކަށް،" މުއްތަލިބު ވިދާޅުވި އެވެ.

ލިސްޓުގެ ސައްހަކަން ކުރިއަށްގެންދާއިރު މާލޭގައި ދިރިއުޅޭ ކަމުގެ މުއްދަތަށް މެދުކެނޑުމެއް އައުން ބަޔާން ކޮށްފައި ނުވާތީ، އެ މެދުކެނޑުމަކީ އެއް އަހަރަށްވުރެ އިތުރު މުއްދަތަކަށް މެދުކެނޑުމެއް އައިސްފައިވާނަމަ ކަމަށް މުއްތަލިބު ވިދާޅުވި އެވެ.

މުއްތަލިބު ވިދާޅުވީ މާލޭގެ ނެތް މުއްދަތެއްގެ ސަބަބުން ޝަރުތު ހަމަނުވެދާނެތީ އެގޮތަށް ނިންމެވީ ވީހާވެސް ގިނަ ބަޔަކަށް ލިސްޓުން ފުރުސަތު ދިނުމުގެ ގޮތުން ކަމަށެވެ.

"މިދެންނެވި ކަންކަމަށް ރިއާއަތް ކުރަން ނިންމި މައިގަނޑު ސަބަބަކީ ވެރިފައި ކުރެވޭ ސަބަބަކާ ހެދި، މުއްދަތު ނުގުނާނަމަ އެމީހުންގެ ހައްގުތައް ގެއްލިގެންދިއުން. އެހެންކަމުން މިހާރު ކުރަން މިއުޅޭ މަސައްކަތަކީ ނޮވެމްބަރު 15، 2023 ގައި އިއުލާން ކުރެވުނު ފްލެޓް ލިބޭ 4،000 މީހުންގެ ލިސްޓު އޭސީސީ އާއި އޮޑިޓާ ޖެނެރަލް އޮފީހުން ދީފައިވާ ލަފަޔާ އެއްގޮތަށް އަދި ފޯމުލީ ބައެއް ފަރާތްތަކުގެ ކަންބޮޑުވުންތަކާ ގުޅިގެން ވެރިފައި ކުރުމަށް ކުރެވޭ މަސައްކަތެއް،" މުއްތަލިބު ވިދާޅުވި އެވެ.

މާލޭގައި ދިރިއުޅޭތާ 15 އަހަރުވިކަން ސާބިތު ކުރެވިދާނެ ކަމަށް ޕޯޓަލްގައި ބަޔާން ކޮށްފައިވާ ލިޔުންތަކުގެ ތެރޭގައި ހިމެނެނީ:

1. ވޭތުވެދިޔަ 15 އަހަރު ތެރޭގައި މާލޭގައި ވަޒީފާ އަދާކުރި އަދި މިހާރު ވަޒީފާ އަދާކުރަމުންދާ ތަންތަނުގެ ލިޔުން
2. ހުށަހަޅާ ފަރާތުގެ އަނބިމީހާ ނުވަތަ ފިރިމީހާ ކައިވެންޏަށްފަހު ވޭތުވެދިޔަ 15 އަހަރު ތެރޭގައި ވަޒީފާ އަދާކުރި އަދި މިހާރު ވަޒީފާ އަދާ ކުރަމުންދާ ތަންތަނުގެ ލިޔުން.
3. ވޭތުވެދިޔަ 15 އަހަރުގެ ތެރޭގައި ހުށަހަޅާ ފަރާތުން މާލޭގެ ސްކޫލް، ކޮލެޖު، ޔުނިވާސިޓީއެއްގައި ކިޔެވިކަން، ކިޔަވަމުންދާކަން އަންގައިދޭ ލިޔުން.
4. ހުށަހަޅާ ފަރާތުގެ އަނބިމީހާ ނުވަތަ ފިރިމީހާ ކައިވެންޏަށްފަހު ވޭތުވެދިޔަ 15 އަހަރު ތެރޭގައި މާލޭގެ ކޮލެޖު ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާކަން އަންގައިދޭ ލިޔުން.
5. ހުށަހަޅާ ފަރާތުގެ ލިޔުން ވޭތުވެދިޔަ 15 އަހަރު ތެރޭގައި މާލޭގެ ސްކޫލް ކޮލެޖު، ޔުނިވާސިޓީއެއްގައި ކިޔެވިކަން ނުވަތަ ކިޔަވަމުންދާ ކަމުގެ ލިޔުން.
6. ހުށަހަޅާ ފަރާތުގެ ޕެންޝަނާއި ބެހޭ ލިޔުންތައް.

މިދިޔަ ސަރުކާރުގެ ގެދޮރުވެރިޔާ ސްކީމަށް ފޯމު ހުށަހެޅި މީހުންގެ ތެރެއިން 15،046 މީހުން ޝަރުތު ހަމަވާ ކަމަށް އޭރުގެ ސަރުކާރުން ކަނޑައެޅި އެވެ. އެމްޑީޕީ ސަރުކާރުން ނިންމީ އެ ހުރިހާ އެންމެންނަށް ވެސް ފްލެޓު ދިނުމަށެވެ. އަދި ފުރަތަމަ ނިމޭ 4،000 ފްލެޓު ހަވާލުކުރަން ބުނީ އޭގެ ތެރެއިން އެންމެ މަތިން މާކްސް ލިބުނު މީހުންނަށެވެ.