އެމްޑީޕީގެ ރައީސް މުހައްމަދު ނަޝީދާއެކު މަޝްވަރާކޮށް އުފެދިގެން އުޅޭ ހިޔާލުތަފާތުވުމަށް ހައްލެއް ހޯދިއްޖެ ކަމަށް އެ ޕާޓީގެ އިސް ލީޑަރު އަދި ރައީސް މުހައްމަދު ސޯލިހު ވިދާޅުވެއްޖެ އެވެ.

ނަޝީދު, އެ ޕާޓީގެ ކޮންގްރެސްއަށް ހުށަހެޅުއްވި ގަރާރު ނަގަން އެއްބަސްވެފައިވާކަން އެނގިފައިވާއިރު، ކޮންގްރެސްގެ ހަވާސާގައި "އަދަދު"އިން ކުރި ސުވާލަކަށް ޖަވާބު ދެއްވަމުން ރައީސް ސޯލިހު ވިދާޅުވީ "ނަޝީދާއެކު މަޝްވަރާކޮށް ހައްލެއް ހޯދިއްޖެ،" ކަމަށެވެ.

ނަމަވެސް، އެކަމާ ގުޅޭ އިތުރު ތަފްސީލެއް އެމަނިކުފާނު ނުދެއްވަ އެވެ.

ނަޝީދުގެ ގާތް ބޭފުޅަކު "އަދަދު"އަށް ވިދާޅުވެފައިވާ ގޮތުގައި ސޯލިހާ އެކު ކޮންގްރެސްގެ ތެރޭން މަޝްވަރާ ކުރައްވާފައިވަނީ އެކުގައި ދެވޭނެ ގޮތެއް ހޯދުމަށެވެ. އަދި, އެކަމަށް ދެ ރައީސުން ވެސް އެއްބަސްވެފައިވާ ކަމަށެވެ.

ރައީސް ސޯލިހުގެ ގާތް ބޭފުޅަކު ވިދާޅުވީ, ނަޝީދާއެކު ކުރެއްވި މަޝްވަރާގައި އެއްބަސްވެފައިވަނީ ބަރުލަމާނީ ގަރާރު ނެގުމަށް ކަމަށެވެ. އެހެން ބޭފުޅަކު ވިދާޅުވި ގޮތުގައި ގަރާރާ ގުޅޭ ގޮތުން އިތުރަށް ރައީސްއާއެކު މަޝްވަރާ ކުރުމަށް ގަރާރު ނަގާނެކަން ނަޝީދު އިއުލާން ކުރެއްވުމަށް ވަނީ ނިންމަވާފަ އެވެ.

ކޮންގްރެސްގައި ދެން އޮތް ސެޝަންގައި އޮތީ ގަރާރާ ގުޅޭ ގޮތުން މަޝްވަރާކުރުމެވެ.

ކޮންގްރެސްގައި ދެ ރައީސުން ވަރަށް ގިނަ އިރުތަކެއްވަންދެން މަޝްވަރާތަކެއް ކުރެއްވި އެވެ. އަދި, އޭގެ ފަހުން ދެ ރައީސުން އެއްކޮށް ސްޓޭޖް މައްޗަށް އަރާވަޑައިގެން ޗެއާޕާސަން ފައްޔާޒު އިސްމާއިލްއާ ވެސް މަޝްވަރާތަކެއް ކުރެއްވި އެވެ. އޭގެފަހުން, ރައީސް ސޯލިހާއި ނަޝީދު ވެސް އެ ދެ ބޭފުޅުންގެ ގާތް ބޭފުޅުންނާއެކު ވަކިވަކިން މަޝްވަރާތަކެއް ކުރައްވާފަ އެވެ.

ނަޝީދު ހުށަހެޅުއްވި ގަރާރު އަނބުރާ ގެންދިޔުމަށް މީގެކުރިން ރައީސް އެދިވަޑައިގެންފައިވެ އެވެ. ނަމަވެސް, ނަޝީދު ގެންދެވީ އެކަން ގަބޫލު ނުކުރައްވައި އެ ގަރާރަށް ކެމްޕެއިން ކުރައްވަމުންނެވެ. ކޮންގްރެސް ފެށުމަށް ބޭއްވި ޖަލްސާގައި ގަރާރުގެ މުހިންމުކަމާ ގުޅޭ ގޮތުން ވާހަކަ ދެއްކެވި އެވެ.

ނަމަވެސް, ކޮންގްރެސްގައި އެ ގަރާރާމެދު ފެނުނީ ތަރުހީބު ކުޑަކޮށެވެ. އޭގެއިތުރުން މިއަދު މެންދުރު ކުރިން ކުރިއަށް ގެންދިޔަ ސެޝަންގައި ޕާޓީގެ ގޮފިތަކާ ގުޅޭ ގޮތުން ނަޝީދު ދެއްކެވި ވާހަކަތަކާ ގުޅިގެން ނަޝީދަށް ވަރަށް ބޮޑަށް ކޮންގްރެސްމަނުންގެ ނުރުހުން ވެސް އަމާޒުވި އެވެ.

ނަޝީދުގެ ގަރާރު

ރާއްޖޭގެ ވެރިކަން ކުރާ ނިޒާމް ބަރުލަމާނީ ނިޒާމަށް ބަދަލުކޮށް, ރިޔާސީ އިންތިހާބެއްގައި ދެވަނަ ބުރެއްގެ ވޯޓަކަށް ނުގޮސް އިންތިހާބު ކާމިޔާބު ކުރެވޭނެ މަގެއް ކަނޑައަޅެމަށް ފެންނަ ނުފެންނަ ވޯޓެއް ނެގުމަށް އެމްޑީޕީ ކޮންގްރެސްއަށް ނަޝީދު ހުށަހަޅުއްވާފައިވަނީ އެމްޑީޕީގެ ނައިބު ރައީސް މުހައްމަދު ޝިފާޒްގެ ތާއީދާއެކު އެވެ.

ޕާޓީގެ ރައީސް ނަޝީދު ހުށަހެޅުއްވި ގަރާރުގައި ވަނީ ގާނޫނުއަސާސީއަށް ގެންނަން ބޭނުންވާ ބަދަލުތައް ފާހަގަކޮށްފަ އެވެ. އެގޮތުން، ސަރުކާރުގެ އެންމެ އިސްވެރިއަކީ މަޖިލީހުގެ ތެރެއިން އިންތިހާބުކުރާ ބޮޑުވަޒީރު ކަމަށާއި ދައުލަތުގެ އެންމެ އިސްވެރިއެއްގެ ގޮތުގައި ހުންނާނީ ރައްޔިތުންގެ މެދުގައި ނަގާ ރިޔާސީ ވޯޓަކުން ހޮވޭ މީހެއް ކަމަށް ވަނީ ފާހަގަކޮށްފަ އެވެ.

އަދި، ބޮޑުވަޒީރާއި ރައީސްގެ ބާރުތައް ކަނޑައެޅުމަށާއި މަޖިލީހުގެ ދާއިރާތައް ތަމްސީލުވާނެ ގޮތްތަކާއި މަޖިލިސް އިންތިހާބުގައި ސިޔާސީ ޕާޓީތަކުން ހޯދާ ވޯޓުގެ ނިސްބަތަށް ބަލައި، ހާއްސަ ކުރެވޭ "ނެޝަނަލިސްޓު ލިސްޓު"ގެ މެންބަރުން ހިމެނޭ އުސޫލު ކަނޑައެޅުމަށް ވެސް ހުށަހަޅައިފަ އެވެ.

މީގެ އިތުރުން ވަޒީރުންގެ މަޖިލިސް ކަނޑައަޅާނީ މަޖިލިސް މެންބަރުންގެ ތެރެއިން ކަމަށާއި ސުޕްރީމް ކޯޓަށް ފަސް ފަނޑިޔާރުން އައްޔަން ކުރުމުގެ އިތުރުން ޖުޑީޝަލް ސާވިސް ކޮމިޝަން (ޖޭއެސްސީ) އެކުލަވާލެވިފައިވާ ގޮތް ބަދަލުކުރުމުގެ އިސްލާހު ވެސް ގެނައުމަށް ގަރާރުގައި ހިމަނާފައިވެ އެވެ.