އިޖްތިމާއީ އަދި އިގްތިސާދީ ގޮތުން ރާއްޖެއަށް އެންމެ ގެއްލުންވީ މިހާރު ހިނގަމުންދާ ރިޔާސީ ދައުރުގައި ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިރޭ ވިދާޅުވެއްޖެ އެވެ.
ހއ. ދިއްދޫގައި މިރޭ ބޭއްވި ކެމްޕެއިން ހަރަކާތެއްގައި ވާހަކަދައްކަވަމުން ފައްޔާޒް ވިދާޅުވީ, މިހާރު ރާއްޖޭގެ އިގްތިސާދު އޮތީ 20 ނުވަތަ 30 އަހަރު ފަހަތުގައި ކަމަށެވެ.
"މިހާރު ކުރިއަށްދާ މި ފަސްއަހަރަކީ އިގްތިސާދީ ގޮތުންނާ އިޖުތިމާއީ ގޮތުން ދިވެހިރާއްޖެއަށް މިފަހަކުން އެންމެ ބޮޑެތި ގެއްލުން ލިބެމުންދާ ވަގުތު. އަޅުގަނޑުމެންގެ އިގްތިސާދު މިއޮތީ ގާތްގަނޑަކަށް 20، 30 އަހަރަށް ހަގީގަތުގަ ފަހަތަށް ސޮއްސާލާފަ. މީގެ އަސަރުތައް އަޅުގަނޑުމެންނަށް ފެންނާނީ ހަމަ ކުރިއަށް އޮތް ދުވަސްތަކުން މަސްތަކުން އަހަރުތަކުގެ ތެރެއިން،" ފައްޔާޒު ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގައި ވާދަކުރައްވާކަން އިއުލާންކުރައްވާފައިވާ ފައްޔާޒް ވިދާޅުވީ, ބޮޑު ބަދަލުގެ އެންމެ ބޮޑު އެއް ބޭނުމަކަށްވީ ވެރިޔަކަށް އަންނަ މީހާއަށް އޭނާގެ އަމިއްލަ މުދާގަނޑެއްގެ ގޮތުގައި ރާއްޖެ ބޭނުންކުރާ ކުރުން ހުއްޓުވުން ކަމަށެވެ.
"އެހެންވީމަ ބޮޑު ބަދަލުގެ އެންމެ ބޮޑު ބޭނުމަކަށް މިވީ، ވެރިޔަކަށް އަންނަ މީހަކު އަމިއްލައަށް، އޭނާގެ އަމިއްލަ މުދާގަނޑެއްގެ ގޮތުގަ ރާއްޖެ ދެކި، ބޭނުން ގޮތަކަށް، ވަލިއްޔުލް އަމުރު ވީމާ އޭނާ ބޭނުން ގޮތަކަށް، ބޭނުން އެއްޗެއް އޭނަ މާނަ ކުރާ ގޮތަށް ބަދަލުވެގެން ނުދިޔުން،" ފައްޔާޒް ވިދާޅުވިއެވެ.
މިގޮތުން ބޮޑު ބަދަލުގައި ގެނެސްފައިވާ މައިގަނޑު ކަންތައްތަކުގެ ތެރެއިން އެއް ކަމެއްގެ ތެރޭގައި ރައްޔިތުން ބޭނުންވާ ގޮތަށް މެނުވީ ގާނޫނުއަސާސީއަށް ބަދަލުތަކެއް ނުގެނެވޭނެ ކަމަށް ފައްޔާޒް ފާހަގަކުރެއްވި އެވެ.
މީގެ އިތުރުން ރާއްޖޭގައި ވެރިޔަކަށް އަންނަ މީހާ އަކީ އަބަދުވެސް ރައްޔިތުންނަށް ހިދުމަތް ކުރުމަށް ހުންނަ މީހަކަށް ވާން ޖެހޭނެ ކަމަށް ވެސް ފައްޔާޒް ވިދާޅުވި އެވެ.
"އަޅުގަނޑުމެން ބޭނުންވަނީ ރައްޔިތުންނާއެކު އިށީނދެ އިނދެ މައްސަލަތައް ހައްލުކޮށްދެވޭނެ ކަހަލަ ސަރުކާރެއް،" އޭނާ ވިދާޅުވި އެވެ.
ފައްޔާޒް ހއ. އަތޮޅަށް ކުރައްވާ ދަތުރަކީ ރިޔާސީ ޕްރައިމަރީއަށް ތާއީދު ހޯއްދެވުމަށް ކުރައްވަމުން ގެންދަވާ ދަތުރެކެވެ. މި ދަތުރުގައި ހއ އަތޮޅުގެ ރަށްތަކަށް ޒިޔާރަތްކޮށް ދޮރުން ދޮރަށް ހަރަކާތް ވެސް ކުރިއަށް ގެންދިއުމަށް ވަނީ ހަމަޖެހިފަ އެވެ.
