ބުކަރެސްޓް (ޖޫން 14) - ޔޫރޯ ފުޓްބޯޅަ މުބާރާތުގައި ރޭ ނޯތު މެސެޑޯނިއާ ކޮޅަށް ގޯލު ޖެހުމަށް ފަހު އުފާފާޅުކުރެވުނު ގޮތުން އޮސްޓްރިއާގެ ފޯވާޑް މާކޯ އާނައޮޓޮވިޗް މައާފަށް އެދެފި އެވެ.
ނޯތު މެސެޑޯނިއާއާ ދެކޮޅަށް އުމުރުން 32 އަހަރުގެ އާނައޮޓޮވިޗް ކުޅެން އެރީ މެޗުގެ ދެ ވަނަ ހާފުގަ އެވެ. އޭނާ ގޯލު ޖެހީ މެޗުގެ އިތުރު ވަގުތުގަ އެވެ. ގޯލު ޖެހުމަށް ފަހު އާނައޮޓޮވިޗް ވަނީ ނޯތު މެސެޑޯނިއާގެ ދެ ކުޅުންތެރިންނާ ދިމާލަށް ވާހަކަތަކެއް ދައްކައިފަ އެވެ. އާނައޮޓޮވިޗް ދައްކަމުން ދިޔަ ވާހަކަތައް ހުއްޓާލަން އެންގީ އޮސްޓްރިއާގެ ކެޕްޓަން ޑޭވިޑް އަލަބާ އެވެ.
މީޑިއާތަކުން ރިޕޯޓްކުރި ގޮތުގައި އާނައޮޓޮވިޗްގެ އެ ވާހަކަތައް އަމާޒުކުރީ ނޯތު މެސެޑޯނިއާގެ ދެ ކުޅުންތެރިން ކަމަށްވާ އެގްޒޯން ބެއިޓުލާއި އާއި ޖާނީ އަލިއޯސްކީއާ ދިމާލަށެެވެ. އެ ދެ ކުޅުންތެރިންނަކީ ނޯތު މެސޯނިއާ އަށް ކުޅުނު ނަމަވެސް އަލްބޭނިއާ ދަރިކޮޅަށް ނިސްބަތްވާ ބައެކެވެ. އާނައޮޓޮވިޗްގެ އާއިލާގެ ބޮޑުބައި ނިސްބަތްވަނީ ސާބިއާ އަށެވެ. ސާބިއާ އާއި އަލްބޭނިއާ އަދި ނޯތު މެސެޑޯނިއާ އަކީ ގިނަ ހިޔާލުތަފާތުވުންތަކެއް އުފެދިފައިވާ ގައުމުތަކެކެވެ. ހާއްސަކޮށް ކޮސޯވޯ ވަކި ދައުލަތެއްގެ ގޮތުގައި ބަަލައިގަތުމާ މެދު ސާބިއާއާ ގިނަ ގައުމުތަކާ ވަނީ ދެބަސްވުންތަކެއް އުފެދިފަ އެވެ.
އަލަބާާ (ވ) އާނައޮޓޮވިޗް ހުއްޓުވަން މަސައްކަތްކުރަނީ.
އާނައޮޓޮވިޗްގެ އެ ހިތްހަމަނުޖެހުންތަކަކީ ސާބިއާ ދަރިކޮޅަށް ނިސްބަތްވާތީ އޭނާ ނޯތު މެސެޑޯނިއާ ކުޅުންތެރިންނަށް ނަސްލީ ގޮތުން ދިމާކުރީ ކަމަށް ބުނެ ގިނަ ސަޕޯޓަރުން ވަނީ ޝުއޫރު ފާޅުކޮށްފަ އެވެ. އެ ވާހަކަތަކަށް އާނައޮޓޮވިޗް ޖަވާބު ދިނީ އޭނާގެ ރަސްމީ އިންސްޓަގްރާމް މެދުވެރިކޮށެވެ.
"މެޗުގެ ހޫނުކަމުގެ ތެރޭގައި އަހަންނަށް ވަރަށް ގިނަ އެއްޗެހި ބުނެވުނު އެ ކަމަށްޓަކައި އަހަރެން މައާފަށް އެދެން. ހާއްސަކޮށް އަލްބޭނިއާ އާއި ނޯތު މެސެޑޯނިއާގައި ތިބި އަހަރެންގެ އެކުވެރިން ގާތުން މައާފަށް އެދެން،" ކުރިން އިނގިރޭސި ޕްރިމިއާ ލީގުގެ ސްޓޯކް ސިޓީ އާއި ވެސްޓް ހޭމް ޔުނައިޓެޑަށް ކުޅުނު އާނައޮޓޮވިޗް ބުންޏެވެ.
"އަހަރެން އެއް ވާހަކައެއް ވަރަށް ސާފުކޮށް ބުނަން ބޭނުން. އަހަންނަަކީ ރޭސިސްޓެއް ނޫން. އަހަރެންގެ ރައްޓެހިން ދުނިޔޭގެ އެކި ގައުމުތަކުގައި އެބަތިބި. އަހަންނަކީ ކޮންމެ ބަޔަކަށް ވެސް އިހުތިރާމްކުރާނެ މީހެއް. އެކަން އަހަރެން ދަންނަ އެންމެނަށް ވެސް އެނގޭނެ،"
އާނައޮޓޮވިޗް އެންމެ ފުރަތަމަ މެޗުގައި ބަދަލު ކުޅުންތެރިއެއްގެ ގޮތުގައި ބޭނުންކުރީ އަނިޔާއަކުން ރަނގަޅުވަމުން އަންނާތީ އެވެ. ނޯތު މެސެޑޯނިއާ އަތުން އޮސްޓްރިއާ އަށް ލިބުނީ ޔޫރޯގައި އެ ގައުމުގެ ފުރަތަމަ މޮޅެވެ.
މި ފަހަރުގެ ޔޫރޯގައި އޮސްޓްރިއާ އިން ދެން ކުޅެން ޖެހޭނީ ބުރާސްފަތި ދުވަހު ނެދަލެންޑްސްއާ ދެކޮޅަށެވެ. ދެން އެ ގްރޫޕްގައި އޮތީ ޔޫކްރެއިން އެވެ.
