ބާލިން (ޖޫން 25) - ޔޫރޯ ފުޓްބޯޅަ މުބާރާތުގެ ގުރޫޕް ޑީގެ ތިން ވަނަ މަގާމު ހޯދައިގެން ގަދަ 16ގެ ފުރުސަތެއް ލިބެން އޮތް ނަމަވެސް، އޮސްޓްރިއާ އިން ބޭނުންވަނީ މިރޭ ނެދަލެންޑްސް ބަލިކޮށް، ގުރޫޕްގެ ގަދަ ދެ ޓީމުގެ ތެރޭގައި ހިމެނިގެން އަނެއް ބުރަށް ދާން ކަމަށް އޮސްޓްރިއާގެ ކޯޗު ރަލްފް ރަންގްނިކް ބުނެފި އެވެ.
މިރޭ ނެދަލޭންޑްސް އަތުން އޮސްޓްރިއާ މޮޅުވެއްޖެނަމަ، އޮސްޓްރިއާއަށް ގުރޫޕްގެ ގަދަ ދެ ޓީމުގެ ތެރޭގައި ހިމެނޭނެ އެވެ. އެކަމަކު، މި މެޗުން އޮސްޓްރިއާ ބަލިވެއްޖެނަމަ، ނުވަތަ އެއްވަރުވެއްޖެނަމަ، އޮސްޓްރިއާ އަށް ގަދަ 16 ގެ ޖާގައެއް ލިބޭނީ ތިން ވަނައަށް ދާ ޓީމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ޓީމުގެ ތެރޭގައި ހިމެނިގެންނެވެ.
ތިން ވަނަ ޓީމުގެ ގޮތުގައި ގަދަ 16ގެ ޖާގައެއް ހޯދުމަކީ ރަންގްނިކް ވިސްނަން ވެސް ބޭނުންވާ ކަމެއް ނޫން ކަމަށް ރަންގްނިކް ވަނީ ހާމަކޮށްފަ އެވެ.
"އަހަރެން ބޭނުންވަނީ ގުރޫޕްގެ އެއް ވަނަ ހޯދަން. އެކަމަކު، އެކަންވާނީ އަހަރަމެން މޮޅުވެ، ފްރާންސް ބަލިވެގެން. އެކަމަކު އެ ހުރިހާ ކަމެއް ހިޔެއްނުވޭ އަހަރެން ބޭނުންވާ ގޮތަށްވާނެހެނެއް،" ރަންގްނިކް ބުންޏެވެ.
"އަހަންނަށް މައްސަލައެއް ނެތް ދެވަނަ ލިބުނަސް. ތިން ވަނަ މަގާމަށްވެސް ބެލިން. އެކަމަކު އަހަރެން ބަލާއިރު އެކަން ފެންނަނީ ވަރަށް އުނދަގޫކޮށް."
އޮސްޓްރިއާ ވަނީ 2020 ވަނަ އަހަރުގެ ޔޫރޯގެ ގަދަ 16ގެ ބުރުގައި ކުޅެފަ އެވެ. މިއީ، 1954 ވަނަ އަހަރުގެ ފަހުން ބައިނަލްއަގުވާމީ މުބާރާތުގެ ނޮކްއައުޓް ބުރެއްގައި އޮސްޓްރިއާ ކުޅުނު ފުރަތަމަ ފަހަރެވެ.
މި ފަހަރު އޮސްޓްރިއާގެ އަމާޒަކީ ކުއާޓާ ފައިނަލްގެ ޖާގައެއް ހޯދުމެވެ.
ނެދަލެންޑްސްއާ ދެކޮޅަށް ނުކުންނައިރު، އޮސްޓްރިއާގެ ޑިފެންޑަރު ގެރްނޯ ޓްރައުނާ އަށް އަނިޔާގެ ސަބަބުން މިރޭގެ މެޗުގައި ނުކުޅެވޭނެ އެވެ.
"ހޯމަ ދުވަހު ޓްރައުނާ ޓްރެއިނިންގައި ބައިވެރިއެއްނުވޭ. އެހެންވީމަ ޔަގީނުންންވެސް މާދަމަާ (މިރޭ) އޭނާ ނުފެންނާނެ،" ރަންގްނިކް ބުންޏެވެ.
މީގެ ކުރިން ބައިނަލްއަގުވާމީ ބޮޑު ދެ މުބާރާތެއްގައި އޮސްޓްރިއާ އާއި ނެދަލެންޑްސް ދެ ފަހަރެއްގެ މަތިން ބައްދަލުކުރި އެވެ. ދެ މެޗުން ވެސް ނެދަލެންޑްސް މޮޅުވި އެވެ. މިރޭގެ މެޗު ފަށާނީ 9 ޖަހާއިރު އެވެ.
