ލައިޕްޒިގު، ޖަރުމަނު (ޖުލައި 2) - ޔޫރޯ ފުޓްބޯޅަ މުބާރާތުގެ ގަދަ 16 ޓީމު ވާދަކުރާ ބުރުުގައި މިރޭ އޮސްޓްރިއާއާ ދެކޮޅަށް ކުޅޭއިރު، އެއީ މިހާތަނަށް ފެނުނު ކުޅުމަށް ބަލާއިރު، "ފުރިހަަމަ ޓީމެއް" ކަމަށް އެ ޓީމާ ދެކޮޅަށް ނުކުންނަ ތުުރުކީ ޓީމުގެ ކޯޗު، ވިންޗެންޒޯ މޮންޓެލާ ބުނެފި އެވެ.
ތުުރުކީ އާއި އޮސްޓްރިއާ ވަނީ މިދިޔަ މާޗް މަހު އެކުވެރިކަމުގެ މެޗެއްގައި ބައްދަލުކޮށްފަ އެވެ. އެ މެޗުން އޮސްޓްރިއާ މޮޅުވީ 6-1 އިންނެވެ.
އެ މެޗަށް ވެސް އިޝާރާތްކޮށް، ތުރުކީގެ ކޯޗު، މޮންޓެލާ ބުނީ އޮސްޓްރިއާ އަކީ ވަރަށް ރޭވުންތެރިކަމާ އެކު ކުޅޭ ވަރުގަދަ ޓީމެއް ކަމަށެވެ. އަދި ޓީމުގެ ހުރިހާ ޑިޕާޓްމަންޓެއް އެއް ލެވަަލަށް މަސައްކަތްކުރުމުގައި އޮސްޓްރިއާއާ އެއްވަރަށް ވޯކްރޭޓް ފެންނަ އެހެން ޓީމެއް މި ފަހަރުގެ ޔޫރޯގައި އަދި ނުފެންނަ ކަމަށް މޮންޓެލާ ވަނީ ބުނެފަ އެވެ.
"އެޓޭކިންގައި ވަރަށް ރަނގަޅަށް ޕްރެސް ކޮށްގެން ކުޅޭ ޓީމެއް އޮސްޓްރިއާ އަކީ. ވަރަށް ރަނގަޅަށް އެ މަސައްކަތް ކުރަނީ، ދެން ޑިފެންސްކުރުމަށް ފަހު، އެޓޭކަށް ބަދަލުކޮށްލާ ވަގުތުގައި އެ އަންނަ ޓްރާންސިޝަން ތެރޭގައި ވެސް އޮސްޓްރިއާގެ ތަފާތު ފެނޭ،" މޮންޓެލާ ބުންޏެވެ.
މޮންޓެލާ ބުނީ އޮސްޓްރިއާގެ ކުޅުމުން ފެންނަނީ ގައުމީ ޓީމަކަށް ވުރެ ކްލަބް ފުޓްބޯޅައިގެ ވައްޓަފާޅި ކަމަށެވެ. އެއީ މެޗު ބަދަލުވާ ހުރިހާ ހާލަތަކަށް ވެސް އެ ޓީމު ތައްޔާރުވެފައި އޮންނަ މިންވަރު ރަނގަޅުވުމުން ކަމަށް މޮންޓެލާ ވަނީ ފާހަގަކޮށްފަ އެވެ.
ސަސްޕެންޝަންގެ މައްސަލަ ތުރުކީ އަށް ވަނީ ދިމާވެފަ އެވެ. އެ ގޮތުން، އެ ޓީމުގެ ފުރަތަަމަ އެގާރައިގައި ހިމެނޭ މުހިންމު ދެ ކުޅުންތެރިން ކަމަށްވާ، ޓީމުގެ ކެޕްޓަން، ހަކަން ޗޮނޮނޯލޫ އާއި ޑިފެންޑަރު، ސާމިތު އަކައިދިން ވަނީ ދެ ރީނދޫ ކާޑު ހަމަވުމުގެ ސަބަބުން ސަސްޕެންޑްވެފަ އެވެ.
މޮންޓެލާ ބުނީ ތުރުކީގެ ލެވަލަށް ބަލާއިރު އެ ޓީމަށް ކުއާޓާ ފައިނަލުގެ ޖާގައެއް ހޯދިދާނެ ކަމަށެވެ. އަދި އެކަން ހާސިލްކުރަން ކުރިމަތީގައި އޮތް އޮސްޓްރިއާ މެޗަކީ ރަނގަޅު ޓެސްޓެއް ކަމަށް މޮންޓެލާ ގަބޫލުކުރެ އެވެ.
ތުރުކީ އާއި އޮސްޓްރިއާ ކުޅޭ މެޗު ފަށާނީ މިރޭ 12 ޖަހާއިރު އެވެ.
