ބާލިން (ޖޫން 21) - ޔޫރޯ ފުޓްބޯޅަ މުބާރާތުގައި މިރޭ އޮސްޓްރިއާ އިން 3-1 އިން ޕޮލެންޑް ބަލިކޮށް މުބާރާތުގެ ދެ ވަނަ ބުރަށް ދިއުމުގެ އުންމީދު އާ ކޮށްފި އެވެ.
ކުޅުނު ދެ މެޗުން ބަލިވެ، ޕޮލެންޑަށް ކުރިއަށް ދިއުމުގެ އުންމީދު ފަނޑުވެ، އަމިއްލަ ބާރު ވަނީ ގެއްލިފަ އެވެ. ޕޮލެންޑް ވަނީ ފުރަތަމަ މެޗުން ނެދަލެންޑްސް އަތުން 2-1 އިން ބަލިވެފަ އެވެ. އޮސްޓްރިއާ ވަނީ ފްރާންސް އަތުން 1-0 އިން ބަލިވެފަ އެވެ. އޮސްޓްރިއާ އިން މި މެޗުން މި ހޯދި މޮޅަކީ މުބާރާތުގައި ކުރިއަށްދާން ވަރަށް ބޮޑު ބާރަކަށްވާނެ އެވެ.
ބާލިންގެ އޮލިމްޕިކް ސްޓޭޑިއަމްގައި މިރޭ ކުޅުނު މެޗުގެ ނުވަ ވަނަ މިިނިޓްގައި އޮސްޓްރިއާ އިން ލީޑުނެގީ ފަހަތަށް ކުޅޭ ގާނޯޓް ޓްރައުނާ ޖެހި ލަނޑުންނެވެ.
މެޗުގެ 30 ވަނަ މިނިޓްގައި، ޕޮލެންޑުން ވަނީ އެއްވަރުކޮށްފަ އެވެ. އޭރިއާތެެރެއިން އޮސްޓްރިއާ ޑިފެންޑަރުންނަށް ސަލާމަތްނުކުރެވިދިޔަ ބޯޅައެއް ގޯލަށް ފޮނުވާލައިގެން، ޕޮލެންޑަށް އެއްވަރުކޮށްދިނީ ކްރިސްޓޮފް ޕިއޮންޓެކް އެވެ.
އަނިޔާގެ ސަބަބުން މި މެޗުގައި ނުކުޅެވޭނެ ކަމަށް ބެލެވުނު، ޕޮލެންޑްގެ ކެޕްޓަން، ރޮބަޓް ލެވަންޑޯސްކީ މެޗުގެ 60 ވަނަ މިނިޓްގައި ކުޅެން ނުކުތެވެ. އެކަމަކު، އޭނާ އަށް ވެސް އެދެވޭ ތަފާތެއް ނުދެއްކުނީ އެއްކޮށް ފިޓްނުވާތީ އެވެ.
އޮސްޓްރިއާ އިން އަލުން ލީޑުނެގީ، 66 ވަނަ މިނިޓްގައި ކްރިސްޓޮފް ބޯމްގާޓްނާ ޖެހި ލަނޑުންނެވެ. އޭރިއާ ރޮނގުކައިރިން ބޯމްގާޓްނާ އަށް ލިބުނު ބޯޅަ އޭނާ ވަނީ ކަނަށް ފޮނުވާލައިފަ އެވެ. އޭގެ، 10 ވަރަކަށް މިނިޓް ފަހުން، އޮސްޓްރިއާ އަށް ލިބުނު ޕެނަލްޓީ އަކުން ލީޑުފުޅާކުރި އެވެ. މިއީ، އޮސްޓްރިއާގެ މާސެލް ސަބިޓްޒާ އަށް ޕޮލެންޑްގެ ކީޕަރު، ވޮޒްޝިއޭ ޝެޒްނީ ކުރި ފައުލަކަށް ދިން ޕެނަލްޓީ އަކުން، މާކޯ އާނައުޓޮވިޗް ޖެހި ލަނޑެކެވެ.
ޕޮލެންޑް އާއި އޮސްޓްރިއާ މި ވަނީ 11 ފަހަރު ބައްދަލުކޮށްފަ އެވެ. ޕޮލެންޑް ފަސް ފަހަރު މޮޅުވެފައިވާއިރު، އޮސްޓްރިއާ މޮޅުވީ ހަތަރު މެޗުންނެވެ. ދެ މެޗު ވަނީ އެއްވަރުވެފަ އެވެ. ޕޮލެންޑުން މި ވަނީ އެ ގައުމުގެ ތާރީހުގައި ފުރަތަމަ ފަހަރަށް ޔޫރޯގެ ފުރަތަަމަ ދެ މެޗުން ބަލިވެފަ އެވެ.
