ސިއްހަތަށް ނުރައްކާވާ މިންވަރަށް މާލެ އާއި ކުޅުދުއްފުއްޓަށް މިއަދު ދުންފުހުގެ އަސަރުކޮށްފި އެވެ.
އައިކިއުއެއާ އިން ލަފާކޮށްފައިވާ ގޮތުގައި ރާއްޖޭގެ އުތުރާއި މެދުރާއްޖެތެރޭގެ ބައެއް ރަށްތަކަށް ސިއްހަތަށް ނުރައްކާވާ މިންވަރަށް ވައިނުސާފުއިރު، ރާއްޖޭގެ ދެކުނަށް ދުންފުހުގެ އަސަރުކުރަމުންދަނީ މޮޑަރޭޓް ލެވެލްއެއްގަ އެވެ.
ސިއްހަތަށް ނުރައްކާވާ މިންވަރަށް ދުންފުހުގެ އަސަރުކުރަމުންދާނަމަ މާސްކު އެޅުމަކީ އެންމެ އެދެވިގެންވާ ގޮތެވެ.
މޯލްޑިވްސް މީޓިއަރޮލޮޖިކަލް ސާވިސް (މެޓް އޮފީސް) އިން މިދިޔަ ބުރާސްފަތި ދުވަހު ބުނީ ކުރިއަށް އޮތް ދުވަސްތަކުގައި ރާއްޖޭގެ ހުރިހާ ހިސާބަކަށް ދުންފުހުގެ އަސަރު ހުންނާނެ ކަމަށާއި ހާއްސަކޮށް އުތުރާއި މެދުރާއްޖޭގެ އަތޮޅުތަކުގައި ދުންފުހުގެ އަސަރު ބޮޑުވާނެ ކަމަށެވެ.
ރާއްޖެގެ އަތޮޅުތަކަށް ދުންފުހުގެ އަސަރު ކުރަމުންދާތީ، އެކަމާ ގުޅިގެން ސިއްހީ ގޮތުން ރައްކާތެރިކަމުގެ ފިޔަވަޅުތައް އަޅަން ހާއްސަ ސަމާލުކަމެއް ދިނުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
މި އަހަރު ކުރީކޮޅު ވެސް ރާއްޖޭގެ އެކި ސަރަހައްދުތަކަށް ދުންފުހުގެ އަސަރުކޮށް، އެކި ސަރަހައްދުތަކަށް ސިއްހަތަށް ނުރައްކާވާ މިންވަރަށް ދުންފުހުގެ އަސަރުކުރި އެވެ.








