ބޭރުގެ ގައުމުތަކުގައި އިންވެސްޓްމެންޓް ފޯރަމްތައް ބޭއްވުމުގެ ނަތީޖާއެއްގެ ގޮތުން މި ސަރުކާރުގައި މިހައިތަނަށް ރިކޯޑު އަދަދަކަށް އިންވެސްޓްމެންޓުތައް ރެޖިސްޓްރީކޮށްފައިވާކަމަށް އިކޮނޮމިކް މިނިސްޓަރު، މުހައްމަދު ސައީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު، މައުރޫފް ޒާކިރު މަޖިލީހަށް ހުށަހެޅި އިތުބާރު ނެތްކަމުގެ މައްސަލައަށް ޖަވާބު ދެއްވަމުން ސައީދު ވިދާޅުވީ މި އަހަރުގެ ފުރަތަމަ ތިން އަހަރު ރެޖިސްޓްރީކުރި އިންވެސްޓްމެންޓުތަކުގައި އަދަދަކީ ރިކޯޑެއް ކަމަށެވެ.
އޭނާ ވިދާޅުވީ 2008 ވަނަ އަހަރުން 2013 ގެ ނިޔަލަށް ރެޖިސްޓްރީ ކުރެވިފައި ވަނީ 212 އިންވެސްޓްމެންޓު ކަމަށާއި ކުރީގެ ރައީސް ޔާމީނުގެ ވެރިކަމުގައި 406 އިންވެސްޓްމެންޓު ރެޖިސްޓްރީ ކޮށްފައިވާ ކަމަށެވެ. އަދި، ނިމިދިޔަ އެމްޑީޕީގެ ވެރިކަމުގައި ރެޖިސްޓްރީ ކުރެވިފައި ވަނީ 245 އިންވެސްޓްމެންޓު ކަމަށް ސައީދު ވިދާޅުވި އެވެ.
"ރައީސް ޑރ. މުހައްމަދު މުއިއްޒުގެ މި ދެ އަހަރާއި ބައިވަމުން ގޮސް ތިން އަހަރުވަމުންދާ ސަރުކާރުން، އަދި ތިން އަހަރު ނުވެ މިއުޅެނީ ނޮވެމްބަރު 17، 2023 އިން ފެށިގެން މި އައި ދުވަސްތަކުގެ ތެރޭގައި 313 އިންވެސްޓްމެންޓް އިއްޒަތްތެރި ރައީސް ރެޖިސްޓްރީކޮށް ރިކޯޑެއް ހައްދަވާފައި އެ ވަނީ،" ސައީދު ވިދާޅުވި އެވެ.
ސައީދު އެހެން ވިދާޅުވީ، މި ސަރުކާރުން އެތައް ބައިވަރު އިންވެސްޓްމެންޓް ފޯރަމެއް ބާއްވައިފައިވާއިރު، އެ ފޯރަމްތައް ބޭއްވުމަށް ކުރި އެއްވެސް ހަރަދެއް ދައުލަތުން ހާމަނުކުރާކަމަށް ބުނެ އިތުބާރު ނެތްކަމުގެ މައްސަލައިގައި ހިމަނައިފައިވާ ސުވާލަށް ޖަވާބުދެއްވަމުންނެވެ.
މެންބަރުންނަށް ޖަވާބުދާރީވެވަޑައިގަންނަވަމުން، އިންވެސްޓްމެންޓް ފޯރަމްތަކަށް ހަރަދުކުރެއްވިވަރުގެ ތަފުސީލެއް ސައީދު ނުދެއްވަ އެވެ. އޭގެ ބަދަލުގައި ސައީދު ވިދާޅުވީ އޭނާއަކީ މީޑިއާތަކާ ވަރަށް ގާތް ބޭފުޅެއް ކަމަށާއި، އެ މިނިސްޓްރީގައި ސިއްރުކުރާނެ އެއްވެސް ކަމެއް ނޯންނާނެ ކަމަށެވެ.
އިންވެސްޓްމެންޓު ފޯރަމްތަކުގެ ނަތީޖާތަކާ ގުޅޭގޮތުން ސައީދު ވިދާޅުވީ، ވަކި މިވެނި އެވެނި ފޯރަމްއަކާ ގުޅިގެން ރާއްޖެއަށް އައި އިންވެސްޓްމެންޓުތައް ދަންނަވަން ނޭނގޭ ކަމަށާއި، އެއީ އެގޮތަށް ހިނގާ ކަމެއް ނޫން ކަމަށެވެ.
