ރައްޔިތުންނަށް ބޯހިޔާވަހިކަން ދިނުމަށް ކަމަށް ބުނެ ހިއްކަމުންދާ ރަސްމާލެއިން އެއްބައި ޔޫއޭއީގެ އީގަލް ހިލްސްއަށް ދޫކޮށްލުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް (ރިފަރެންޑަމެއް) ނެގުމަށް ގޮވާލައި، އިދިކޮޅު އެމްޑީޕީން މި މަހުގެ 26، ގައި އިހުތިޖާޖު ކުރުމަށް މަގުމައްޗަށް ނުކުންނަން މިއަދު ނިންމައިފި އެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އެމްޑީޕީގެ ޗެއާޕާސަން، ކުރީގެ ރައީސް މުހައްމަދު ނަޝީދު ވިދާޅުވީ ރަސްމާލެ މަޝްރޫއާ ގުޅިގެން ރައްޔިތުންނަށް ސާފުނުވާ ގިނަ ކަންކަން ހުރި ކަމަށާއި އެކަން ހިންގަން ރައްޔިތުންގެ ތާއީދާ އަގުލަބިއްޔަތު ހޯދަން ޖެހޭ ކަމަށެވެ.
"ވެރިންނަށް ކަންކަމަކީ ރަނގަޅު ކަންކަން ގޮތުގައި ފެނިދާނެ. ތަސައްވަރު ކުރެވިދާނެ. ގަބޫލުކުރެވިދާނެ. އެހެންނަމަވެސް އެ ތަސައްވަރުތައް، އެ މަންޒަރުތައް ރައްޔިތުންނަށް ސާފުނުވަނީނަމަ ކަންކަން ދާނީ ކާމިޔާބުނުވެ، ކަމެއް ކާމިޔާބުކުރުމަށް އެ ކަމެއްގެ ފަހަތުގައި ރައްޔިތުންގެ އަގުލަބިއްޔަތުގެ ތާއީދު ރުހުން އޮންނާންޖެހޭ،" ނަޝީދު ވިދާޅުވި އެވެ.
ނަޝީދު ވިދާޅުވީ ނޮވެމްބަރު 26، ގައި ބާއްވާ އިހުތިޖާޖަކީ އެމްޑީޕިން އިސްނަގައިގެން އެމްޑީޕީން ބާއްވާ އިހުތިޖާޖެއް ކަމަށެވެ. އޭގެއިތުރުންވެސް ރިފަރެންޑަމަކަށް ގޮވާލައި އެކި ކަންކަން އެމްޑީޕީން ކުރިއަށްގެންދާނެ ކަމަށް އެމަނިކުފާނު ވިދާޅުވި އެވެ.
ރަސްމާލެ ވިއްކާލުމަށްޓަކައި އެއްވެސް މަސައްކަތެއް ކުރުމުގެ ކުރިން އާންމުންގެ ހިޔާލު ހޯދަން ވޯޓެއް ނުނަގައިފި ނަމަ ސީދާ ހަރަކާތަށް ނުކުމެ މުޒާހަރާ ކުރަން އެމްޑީޕީގެ ގައުމީ މަޖިލީހުން ނޮވެމްބަރު 1، ގައި ވަނީ ފާސްކޮށްފަ އެވެ.
އެ ގަރާރުގައި ގޮވާލާފައި ރައްޔިތުންގެ ފެންނަ ނުފެންނަ ވޯޓެއް ނެގުމުގެ ކުރިން ރަސްމާލޭ ޕްރޮޖެކްޓުގެ އެއްވެސް މަސައްކަތެއް ކުރިއަށް ނުގެންދިޔުމަށެވެ. އެމްޑީޕީގެ އެ ޑިމާންޑަށް ސަރުކާރުން އަމަލުނުކޮށްފި ނަމަ، އެހެން ޕާޓީތަކާއި ޖަމިއްޔަތަކާ ގުޅިގެން މުޒާހަރާ ކުރަން ވެސް އެ ގަރާރުގައި ގޮވާލާފައިވެ އެވެ.
ސަރުކާރުން ހާމަކޮށްފައިވާ ގޮތުގައި، 1،153 ހެކްޓަރުގެ ރަސްމާލޭގެ 500 ހެކްޓަރަށް ވުރެ ބޮޑު ސަރަހައްދެއް އީގަލް ހިލްސްއާ ހަވާލުކުރަނީ 99 އަހަރަށެވެ. އެކަމަކު އެ ބިމުގައި އެ ކުންފުނިން ތަރައްގީކުރާ ތަންތަން ގަންނަ ބަޔަކަށް ލިބެނީ ތާއަބަދަށް ކަމަށް ރިއަލް އެސްޓޭޓު ވިޔަފާރި ބިލުގައި ވަނީ ބަޔާންކޮށްފަ އެވެ.








