ސަރުކާރުގެ ތަރައްގީގެ މަޝްރޫއުތަކެއް ހިންގަން ވެގެން ކަމަށް ބުނެ މާލެ ސިޓީ ކައުންސިލުގެ ދަށުގައި ހުރި 14 ބިމެއް ސަރުކާރުން އަތުލި މައްސަލަ ކޯޓަށް ހުށަހެޅުމަށް އެ ކައުންސިލުން ނިންމައިފި އެވެ.
މި ގޮތަށް ނިންމީ އިންފްރާސްޓްރަކްޗާ މިނިސްޓްރީން ބިންތައް އަތުލަން އަންގައި ފޮނުވި ސިޓީއާ ގުޅިގެން މިރޭ ބޭއްވި ކައުންސިލުގެ ކުއްލި ޖަލްސާއަށް ހުށަހެޅި ގަރާރަކުންނެވެ.
އިންފްރާސްޓްރަކްޗާ މިނިސްޓްރީން ކައުންސިލަށް ފޮނުވި ސިޓީގައި ބުނެފައި ވަނީ މި ބިންތައް އަތުލަން އެންގީ ރައީސް އޮފީހުގެ ސިޓީއަކުން އަންގައިގެން ކަމަށެވެ. މިނިސްޓްރީން މި ކަމާ ގުޅިގެން ޝަކުވާ ހުށަހެޅުމުގެ ފުރުސަތު ކައުންސިލަށް ދީފައިވީ ނަމަވެސް، ލާމަރުކަޒީ ގާނޫނުގައިވާ ގޮތަށް މަޝްރޫއުތަކުގެ އެއްވެސް ތަފުސީލެއް ދީފައި ނުވާ ކަމަށް ކައުންސިލުން ބުންޏެވެ.
"މި ސިޓީގައި ޕްރޮޖެކްޓުތަކުގެ ނަމުގެ އިތުރުން އެއްވެސް މައުލޫމާތު ހިމަނާފައި ނުވާތީ އާއި ގާނޫނުގެ ނައްސަށް ބަލާއިރު އެއް ދުވަހުން ދައުލަތުގެ ހުރިހާ ތަރައްގީގެ މަޝްރޫއުތައްށް ހިންގުމަށް ބިންތަކެއް އެކީ އެއްފަހަރާ އަތުލުމަކީ ގާނޫނު ތަސައްވުރު ކުރާ ކަމެއް ކަމަށް ނުވާތީ މި ކައުންސިލުން އަޅަން ޖެހޭ ގާނޫނީ ފިޔަވަޅު އެޅުމަށާއި ޝަރީއަތަށް މައްސަލަ ހުށަހެޅުމަށް ނިންމުން،" ކައުންސިލުން މިރޭ ފާސްކުރި ގަރާރުގައި ވެ އެވެ.
ސަރުކާރުން އަތުލި ބިންތަކުގެ ތެރޭގައި މާލޭގެ އިގްތިސާދީ އަދި އިޖުތިމާއީ ގޮތުން އެންމެ މުހިންމު ސަރަހައްދުތައް ހިމެނެ އެވެ.
މާލޭ ސިޓީ ކައުންސިލުން ވަކި ކުރި ބިންތައް
- ސަލްޓަން ޕާކު (އީ-ސްޕޯޓިން އެރީނާ އަދި މިއުޒިއަމް ޕާކެއް)
- ރަސްފަންނު (އިތުރު ކަމެއް ނުކުރޭ)
- މަސް މާރުކޭޓު އަޅަން ހިއްކި ސަރަހައްދު (ވެޓް މާކެޓެއް)
- ތައިސޭ ކޮށި (މަސައްކަތްތެރިންގެ ވަގުތީ އެކޮމޮޑޭޝަން ބްލޮކެއް)
- މަސް މާރުކޭޓު (އޮފީސް އަދި ކޮމާޝަލް އިމާރާތެއް)
- މަސްވެރިންގެ މައިޒާން (ޕަމްޕު ސްޓޭޝަނެއް)
- ލޯކަލް މާރުކޭޓު (މިކްސް ޔޫސްޑް ކޮމާޝަލް އިމާރާތެއް)
- ކާނިވާ (ރެކްރިއޭޝަން އަދި ކޮމާޝަލް އިމާރާތެއް)
- އާޓިފިޝަލް ބީޗު (އަޕްގްރޭޑްކޮށް އިތުރު ތަންތަން ހެދުން)
- ޕޭ ޓޮއިލެޓް ނަންބަރު 2 (ޕަބްލިކް ރެސްޓްރޫމް އަދި އިތުރު ފެސިލިޓީތައް)
- ވިލާ ހަކަތައިން ބޭނުން ކުރި ޕެޓްރޯލް ޝެޑް (އިލެކްޓްރިކް ވެހިކަލް ޗާގިން ސްޓޭޝަނެއް)
- ބޮންޑިބަތް ޕާކު (ޕާކިން ބިލްޑިންގެއް އަދި މިކްސް ޔޫސްޑް ކޮމާޝަލް އިމާރާތެއް)
- ގައުމީ ކުތުބުހާނާއަށް ދީފައި އޮތް ބިން (ކުޑަކުދިންގެ އެކްޓިވީ ސެންޓަރެއް އަދި ޑޭކެއާ ސެންޓަރެއް)
- މާލޭ ސިޓީ ކައުންސިލުގެ އެކޮމޮޑޭޝަން ބިން (ލޭބާ ރިލޭޝަންސްގެ އެކޮމޮޑޭޝަން)
މި ބިންތައް ކައުންސިލުގެ އިހުތިސާސުން "ބިން ފޭރޭ ބިލު" ގެ ގޮތުގައި ލޭބަލްވީ ބިލެއް ހުށަހަޅައިގެން ލާމަރުކަޒީ ގާނޫނަށް މަޖިލީހުން މިފަހުން ގެނައި ބަދަލުގެ ދަށުންނެވެ.
ބިންތައް އަތުލި މައްސަލައިގައި މާލެ ސިޓީ ކައުންސިލުގެ ކުއްލި ޖަލްސާއެއް
މާލެ ސިޓީ ކައުންސިލުން 14 ބިމެއް ވަކިކުރުމަކީ ލާމަރުކަޒީ ނިޒާމަށް އެޅޭ ހުރަހެއް ކަމަށް މޭޔަރު އާޒިމް ވަނީ ވިދާޅުވެފަ. ސަރުކާރުން މި ބިންތައް އަތުލާފައި ވަނީ "ބިން ފޭރޭ ބިލު" ގެ ނަމުން މަޝްހޫރުވެފައިވާ ލާމަޒުކަޒީ ގާނޫނަށް ގެނައި ބަދަލުގެ ދަށުން.
އެ ގާނޫނުގެ 2-56 ވަނަ މާއްދާގައިވާ ގޮތުން، ކައުންސިލެއްގެ ބިމެއްގައި ތަރައްގީގެ މަޝްރޫއެއް ހިންގަން ބޭނުންވެއްޖެ ނަމަ ވަޒީރުންގެ މަޖިލީހުގެ ނިންމުމަކުން އެ ބިމެއް ވަކިކުރެވިދާނެ އެވެ.
މި މައްސަލައިގައ ކަންބޮޑުވުން ފާޅުކުރަމުން މާލޭގެ މޭޔަރު އާދަމް އާޒިމް ކުރިން ވިދާޅުވީ ސަރުކާރުން ކައުންސިލްތަކުގެ ބިންތަކާއި ބަޖެޓު އަތުލަމުންދާ ކަމަށާއި، މިއީ ގާނޫނުއަސާސީން ކައުންސިލްތަކަށް މަތިކޮށްފައިވާ ޒިންމާތަކަށް އެޅޭ ހުރަހެއް ކަމަށް އޭނާ ވިދާޅުވި އެވެ. އަދި އެމްޑީޕީން އަލުން ވެރިކަމަށް އަންނަ ދުވަހަކުން މި ހައްގުތައް އިއާދަކޮށްދޭނެ ކަމަށް އޭނާ ވިދާޅުވި އެވެ.
ސަރުކާރުން ބުނަނީ މި ބިންތައް ނެގީ މާލެ އާއި ވިލިމާލޭގެ އުމްރާނީ ތަރައްގީގެ މަސައްކަތްތަކަށެވެ. ނަމަވެސް ބައެއް ބިންތަކުގައި ހިންގާނެ މަޝްރޫއެއް މިހާތަނަށް އިއުލާނެއް ނުކުރެ އެވެ.
