ވެށިފަހި މާލެ ޕްރޮގްރާމްގެ ދަށުން ދައުލަތަށް މިލްކުވެފައިވާ ބިންތަކުގެ ތެރެއިން 48 ބިމެއް ގަންނަން ބޭނުންވާ މީހުންނަށް އެ ފުރުސަތު މިއަދު ހުޅުވާލައިފި އެވެ.
މި ބިންތައް ވިއްކުމަށް ހަމަޖެހިފައިވަނީ އަކަފޫޓަކަށް 2،000 ރުފިޔާގެ މަގުންނެވެ. ހައުސިން މިނިސްޓްރީން އިއުލާނުކުރީ މާފަންނުން 21 ބިން، މައްޗަންގޮޅިން 10 ބިން، ހެންވޭރުން ނުވަ ބިން، ގަލޮޅުން ހަތް ބިން އަދި ވިލިމާލެއިން ބިމެއް ވިއްކުމަށެވެ.
މި ބިންތައް ގަތުމުގެ ފުރުސަތު އޮތީ އެ ބިންތައް ހިމެނޭ ގޯތިތަކުގެ ބެހެނެވެރިންނަށާއި، އެ ބިންތަކާ އިންވެގެންވާ ގޯތިތަކުގެ ވެރިފަރާތްތަކަށް އެކަނި އެވެ. މިއީ 2011 ވަނަ އަހަރު ހިންގި ވެށިފަހި މާލެ ޕްރޮގްރާމްގެ ދަށުން ފްލެޓް ނުވަތަ ގޯތި ބަދަލުގައި ދިނުމުން ދައުލަތަށް ދޫކޮށްލާފައިވާ ކުދި ބިންތަކެކެވެ.
މި ބިންތައް ވިއްކުމުގައި އަމަލުކުރާނީ 28 ޖޫން، 2021 ގައި ގެޒެޓުގައި ޝާއިއުކޮށްފައިވާ "ވެށިފަހި މާލެ ޕްރޮގްރާމްގެ ދަށުން ދައުލަތަށް މިލްކުވެފައިވާ ބިންތައް ވިއްކުމާބެހޭ އުސޫލު" އާ އެއްގޮތަށް ކަމަށް މިނިސްޓްރީން ބުނެ އެވެ.
މި އުސޫލުގެ ދަށުން ބިން ގަންނަން ޝައުގުވެރިވާ ފަރާތްތަކަށް ފޯމު ހުށަހެޅުމުގެ ފުރުސަތު އަންނަ އާދީއްތަ ދުވަހުން ފެށިގެން ހުޅުވާލާނެ އެވެ. ބިން ގަންނަން އެދޭ ފަރާތްތަކުން ފޯމު ފުރިހަމަކުރުމަށްފަހު، ބޭނުންވާ އެންމެހާ ލިޔެކިޔުންތަކާއެކު ޑިސެމްބަރު އަށްވަނަ ދުވަހުގެ މެންދުރުފަހު 14:00 ގެ ކުރިން ހުށަހަޅަން ޖެހެ އެވެ.
ވެށިފަހި މާލެ ޕްރޮގްރާމަކީ މާލޭގެ ތޮއްޖެހުން ކުޑަކުރުމަށާއި، ދިރިއުޅުމަށް ދަތިވާ ވަރަށް ކުދިކޮށް ހުރި ގޯތިތަކުގެ ވެރިންނަށް އެހެން ސަރަހައްދުތަކުން ބިން ނުވަތަ ފްލެޓް ދޫކޮށް، އެމީހުންގެ މިލްކިއްޔާތުގައިވާ ކުދި ބިންތައް ދައުލަތަށް ނެގުމަށް ހިންގި މަޝްރޫއެކެވެ.
