ޕެރިސް (ނޮވެމްބަރު 21) - ޔުއެފާ ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ކުޅެން ޖެހޭ މެޗުގައި ބަދަލުހިފުމުގެ ރޫހުގައި ކުޅެގެން ކަމެއް ހާސިލްކުރުމަށް ވުރެން މި މުބާރާތުގެ ތަށި ހޯދަން ބޭނުންވާ ކަމަށް ފްރާންސްގެ ކޯޗު، ޒިނެދިން ޒިދާން ބުނެފި އެވެ.
ނޭޝަންސް ލީގުގެ ކުއާޓާ ފައިނަލުގައި ފްރާންސާއި ސްޕެއިން ޖެހުމާ އެކު، އެންމެ ބޮޑަށް ދެކެވެން ފެށި ވާހަކަަ އަކީ މި ފަހަރު، އެެމެރިކާ އާއި މެކްސިކޯ އަދި ކެނަޑާގައި ބޭއްވި ފީފާ ވޯލްޑް ކަޕްގެ ސެމީ ފައިނަލުގައި ސްޕެއިނުން ފްރާންސް ބަލިކުރި މެޗުގެ ވާހަކަތަކެވެ. އެ މެޗުން ފްރާންސް ކަޓުވާލާފައި ގޮސް ސްޕެއިނުން ވަނީ ވޯލްޑް ކަޕްގެ ޗެމްޕިއަަންކަން ހޯދައިފަ އެވެ.
ފްރާންސް ފުޓްބޯޅަ ފެޑެރޭޝަން (އެފްއެފްއެފް) އަށް ދިން އިންޓަވިއުއެއްގައި ޒިދާން ބުނީ، އޭނާ ސިކުނޑީގައި އެއްވެސް ވަރަކަށް ބަދަލުހިފުމުގެ ކަމެއް ނެތް ކަމަށެވެ.
"އަހަރެމެންނަށް އެނގޭ ކުއާޓާ ފައިނަލުގައި ޖެހޭނީ ވަރުގަދަ ޓީމަކާކަން. އެހެންވީމަ، މި ޖެހުނީ ސްޕެއިނާ ކުޅެން. ދުނިޔޭގެ ޗެމްޕިއަނުން. އަހަރެމެންނަށް އެ މީހުން ވަރަށް ރަނގަޅަށް އެނގޭ،" މި ފަހަރުގެ ވޯލްޑް ކަޕަށް ފަހު، ޑިޑިއޭ ޑެޝޯމްޕްސް، 14 އަހަރަށް ފަހު ފްރާންސް ކޯޗުކަން ދޫކޮށްލުމުން އެ މަގާމާ ހަވާލުވި ޒިދާން ބުންޏެވެ.
"މިއީ، ވޯލްޑް ކަޕްގެ ސެމީ ފައިނަލުގެ ބަދަލުހިފުމެއް ނޫން. މިއީ، އެހެން މުބާރާތެއް، އެހެން ގްރޫޕެއް މި ކުޅެނީ ވެސް. އަހަރެމެންނަށް މި އޮތީ ސީދާ އަމާޒެއް. ފައިނަލަށް ގޮސް ނޭޝަންސް ލީގު ކާމިޔާބުކުރުން،"
ކުއާޓާ ފައިނަލްގެ ދެ ލެގުގެ މެޗުތައް އޮތީ އަންނަ އަހަރުގެ މާޗް މަހުގަ އެވެ. ޒިދާން ބުނީ، އެންމެ ފަހުން ފްރާންސް އިން މި މަހު ކުޅުނު މެޗުތަކުގައި ޓީމުގައި ނެތް ކުޅުންތެރިންނަށް އެ މެޗުތަކުގައި އެނބުރި އައުމުގެ ފުރުސަތު އެބައޮތް ކަމަށެވެ.
ޒިދާން ބުނީ ކުރިއަށް އޮތް ހަތަރު މަހަކީ ފްރާންސް ކުޅުންތެރިން ކްލަބްތަކުގައި މުހިންމު މެޗުތަކެއް ކުޅޭނެ ދުވަސްވަރެއް ކަމުގައި ވިޔަސް އެ ކުޅުންތެރިން ސިކުނޑީގައި ސްޕެއިނާ ކުޅެން ޖެހޭ ކުއާޓާ ފައިނަލަށް ތައްޔާރުވުމުގެ ކަންކަން ހުންނާނެ ކަމަށެވެ.
ފްރާންސް އިން ވަނީ 2021 ވަނަ އަހަރު ނޭޝަންސް ލީގު ކާމިޔާބުކޮށްފަ އެވެ. އެއީ ފައިނަލުގައި ސްްޕެއިން ބަލިކޮށްފަ އެވެ.
ނޭޝަންސް ލީގުގެ ކުއާޓާ ފައިނަލުގައި ދެން އޮތް މެޗުތަކަށް ބަލާއިރު، އިންގްލެންޑުން ކުޅޭނީ ނޯވޭއާ އެވެ. އެންމެ ފަހުގެ ޗެމްޕިއަން، ޕޯޗުގަލް އިން ކުޅޭނީ 2019 ވަނަ އަހަރުގެ ފައިނަލުގައި އެ ޓީމާ ބައްދަލުކުރި ނެދަލެންޑްސްއާ އެވެ. އަދި، ބެލްޖިއަމުން ނުކުންނާނީ ޖަރުމަނާ ދެކޮޅަށެވެ.
ސެމީ ފައިނަލުގައި ކުޅޭނީ ބެލްޖިއަމާއި ޖަރުމަނާ ކުޅެގެން މޮޅުވާ ޓީމަކާއި ނޯވޭ އާއި އިންގްލެންޑް ކުޅެގެން މޮޅުވާ ޓީމެެކެވެ. އަނެއް ސެމީ ފައިނަލުގައި، ނެދަލެންޑްސް އާއި ޕޯޗުގަލް ކުޅެގެން މޮޅުވާ ޓީމެއް ނުކުންނާނީ ސްޕެއިނާއި ފްރާންސް ކުޅެގެން މޮޅުވާ ޓީމަކާ ދެކޮޅަށެވެ. ސެމީ ފައިނަލް ދެ މެޗާއި ތިން ވަނަ ހޮވާ މެޗު އަދި ފައިނަލް މެޗު އޮންނާނީ އަންނަ އަހަރުގެ ޖޫން މަހުގަ އެވެ.








