އަމްސްޓެޑަމް (ނޮވެމްބަރު 14) - ޔުއެފާ ނޭޝަންސް ލީގުގައި ރޭ ކުޅުނު މެޗުތަކުން މޮޅުވެ، މުބާރާތުގެ ކުއާޓާ ފައިނަލުގެ ޖާގައެއް ހޯދުމަށް ނެދަލެންޑްސް އާއި ޖަރުމަނުން ގަދަހިފުމަކަށް ނުކުންނަން ޖެހިއްޖެ އެވެ.
ނޭޝަންސް ލީގުގެ ލީގު އޭގެ ގްރޫޕް ދޭއްގައި ރޭ ނެދަލެންޑްސް އިން ވަނީ 7-0 އިން ގްރީސް އަތުން މޮޅުވެފަ އެވެ. އަދި، ޖަރުމަނުން ވަނީ 3-1 އިން ސާބިއާގެ މައްޗަށް ކުރިހޯދައިފަ އެވެ.
މި ވަގުތު މި ގްރޫޕްގެ ތާވަލަށް ބަލާއިރު ފަސް މެޗުން 11 ޕޮއިންޓާ އެކު ނެދަލެންޑްސް އޮތީ އެއް ވަނައިގަ އެވެ. ފަސް މެޗުން އަށް ޕޮއިންޓާ އެކު ދެ ވަނައިގައި އޮތް ގްރީސް އާއި ފަސް މެޗުން އަށް ޕޮއިންޓާ އެކު ތިން ވަނައިގައި އޮތް ޖަރުމަނުގެ މަގާމުތައް ބެހިފައި އޮތީ ލަނޑުގެ ތަފާތުންނެވެ. މި ގްރޫޕްގެ ފުލުގައި އޮތް ސާބިއާ ވަނީ ކުޅުނު ފަސް މެޗުން ވެސް ބަލިވެފަ އެވެ.
ކޮންމެ ގްރޫޕަކުން ވެސް އެންމެ ރަނގަޅު ނަތީޖާ ނެރޭ ދެ ޓީމެއް ކުއާޓާ ފައިނަލަށް ދަތުރުކުރާއިރު، މި ގްރޫޕްގައި ބާކީ އޮތީ ޖަރުމަނުން އަމިއްލަ ދަނޑުގައި ނެދަލެންޑްސްއާ ކުޅޭ މެޗާއި ގްރީސް އިން އަމިއްލަ ދަނޑުގައި ސާބިއާއާ ދެކޮޅަށް ނުކުންނަ މެޗެވެ. މި ގްރޫޕްގެ ފަހު މެޗުތައް އޮތީ އަންނަ ހޯމަ ދުވަހު އެވެ.
މެޗަކުން ބަލިނުވެ ކުރިއަށްދަމުން އައި ގްރީސް ކައިރިން ރޭ ނެދަލެންޑްސް އިން ވަނީ ތަފާތު ބޮޑު މޮޅެއް ހޯދައިފަ އެވެ. ރޭގެ މެޗުގައި ނެދަލެންޑްސްގެ ޓިޖާނީ ރައިންޑާސް ހެޓްރިކެއް ހެދިއިރު، ޖޫރިއަން ޓިމްބާ ވަނީ ދެ ލަނޑު ޖަހައިފަ އެވެ. އަނެއް ލަނޑުތައް ޖެހީ، ކްރައިސެންސިއޯ ސަމަވިލް އަދި ޑޮންޔެލް މާލެން އެވެ.
ޖަރުމަނުން ރޭ ލީޑުނެގި ގޯލަކީ ތިން ވަނަ މިނިޓްގައި ސާބިއާގެ ސަޖްޑާން ބަބިޗް އަތުން ބައިކޮޅަށް ވަން ގޯލުންނެވެ. މެޗުގެ 14 ވަނަ މިނިޓްގައި ފްލޯރިއަން ވާޓްޒް ވަނީ ޖަރުމަނުގެ ލީޑުފުޅާކޮށްދީފަ އެވެ. އަދި، ދެ ވަނަ ހާފުގެ ކުޅުން ފެށިގެން ފަސް މިނިޓް ތެރޭ ބްރަޖަން ގްރޫޑާ ވަނީ ޖަރުމަނުގެ ތިން ވަނަ ގޯލު ޖަހައިފަ އެވެ.
ޖަރުމަނުން ތިން ވަނަ ގޯލު ޖެހިތާ ހަ މިނިޓް ފަހުން، ސާބިއާގެ ބަބިޗް ވަނީ އެ ޓީމުން މެޗުގައި ޖެހި ހަމައެކަނި ލަނޑު ކާމިޔާބުކޮށްފަ އެވެ.
ސާބިއާ އިން މި މެޗު ނިންމާލީ ދެ ކުޅުންތެރިން މަދުކޮށެވެ. އެ ގޮތުން، 76 ވަނަ މިނިޓްގައި ސާބިއާގެ ވަންޖާ ޑްރަގޯޖެވިޗަށް ރަތެއް ދެއްކީ ޖަރުމަނުގެ ޔޯސުއާ ކިމިކަށް ކުރި ނުރައްކާތެރި ފައުލަކަށެވެ. އަދި، މެޗުގެ 89 ވަނަ މިނިޓްގައި ސާބިއާގެ އަންޑްރިޖާ ޒިވްކޮވިޗަށް ރަތެއް ދެއްކީ ފައުލެއް ކުރުމުގެ އިތުރުން، ރެފްރީއާ ބޭއަދަބީ އިބާރާތުން ވާހަކަ ދައްކައިގެންނެވެ.
