ބްރުސެލްސް، ބެލްޖިއަމް (ނޮވެމްބަރު 16) - ފަހަތުން އަރައި 4-1 އިން އިޓަލީ ބަލިކޮށް، އެ ޓީމު ކަޓުވާލުމަށް ފަހު ބެލްޖިއަމް އިން ޔުއެފާ ނޭޝަންސް ލީގުގެ ކުއާޓާ ފައިނަލުން ޖާގަ ހޯދައިފި އެވެ.
ބެލްޖިއަމް ދަނޑުގައި އެއްވަރުކޮށްލައިގެން ވެސް ކުއާޓާ ފައިނަލަށް ދިއުމުގެ ފުރުސަތު އޮތް އިޓަލީން ވަނީ ރޭގެ މެޗުގައި ލީޑުނަގައިފަ އެވެ. މެޗުގެ 11 ވަނަ މިނިޓްގައި އިޓަލީ އަށް މި ލަނޑު ޖަހައިިދިނީ މި ވަގުތު ރަނގަޅު ފޯމެއްގައި ކުޅެމުން އަންނަ ފޯވާޑް ޕިއޯ އެސްޕޮސީޓޯ އެވެ. މިއީ، އިޓަލީ އަށް ކުޅުނު 15 ވަނަ މެޗުގައި އޭނާ ޖެހި 10 ވަނަ ގޯލެވެ.
އިޓަލީން ލީޑުނެގިތާ ހަތަރު މިނިޓް ފަހުން، މެޗުގެ 15 ވަނަ މިނިޓްގައި ބެލްޖިއަމްގެ މެކްސިމް ޑި ކޮއިޕާ ވަނީ ލަނޑު ޖަހައި ނަތީޖާ ހަމަހަމަކޮށްފަ އެވެ. މެޗުގެ 22 ވަނަ މިނިޓްގައި ބެލްޖިއަމުން ލީޑުނެގި އެވެ. މި ލަނޑު ޖެހީ ނޭތަން އެންގޯއި އެވެ. ގައުމީ ޓީމަށް އެންގޯއި ޖަހައިދިން ފުރަތަމަ ލަނޑު ކާމިޔާބުކުރީ ބްރެންޑަން މެކެލޭ ނަގައިިދިން ބޯޅައަކުން ބޮލުންނެވެ. އޭގެ ހަަތަރު މިނިޓް ފަހުން، އިޓަލީގެ ކުޅުންތެރިންތަކެއް ކައިރިން ދެމިގަތުމަށް ފަހު، ޖެރެމީ ޑޯކޫ ވަނީ ބެލްޖިއަމްގެ ތިން ވަަނަ ލަނޑު ޖަހައިފަ އެވެ.
މެޗުގެ 80 ވަނަ މިނިޓްގައި ކެވިން ޑި ބްރޭނާ ދިން ބޯޅައަކުން ބެލްޖިއަމްގެ ހަތަރު ވަނަ ލަނޑު ޖެހީ ޑިއޭގޯ މޮރެއިރާ އެވެ. މެޗުގައި އިޓަލީ އަށް ލިބުނު ޕެނަލްޓީ އަކުން އެސްޕޮސީޓޯ ފޮނުވާލި ބޯޅަ ބެލްޖިއަމްގެ ގޯލު ބެލެހެއްޓި ކީޕަރު، ސެން ލަމެންސް ވަނީ މަތަކޮށްފަ އެވެ.
މި ގްރޫޕްގައި ރޭ ފްރާންސް އިން ކުޅުނު މެޗުގައި، 2-1 އިން ތުރުކީގެ މައްޗަށް ކުރިހޯދި އެވެ. ފްރާންސް އިން ލީޑުނެގީ 49 ވަނަ މިނިޓްގައި ތުރުކީގެ އެމިރްހާން ޓޮޕްކޫ އަތުން ބަައިކޮޅަށް ވަން ގޯލަކުންނެވެ. އަދި، ކްރޫޕީ ޖޫނިއާ، ފްރާންސަަށް ޖަހައިދިން ފުރަތަމަ ގޯލުން އެ ޓީމުން ލީޑުފުޅާކުރިއިރު، ތުރުކީން މެޗުގައި ޖެހި ހަމައެކަނި ލަނޑު 90 ވަނަ މިނިޓްގައި ކާމިޔާބުކުރީ، އަބްދުލްކަރީމް ބަރްޑްކްޗީ އެވެ.
ފްރާންސް އިން ގްރޫޕްގެ އެއް ވަނަ ހޯދި 13 ޕޮއިންޓާ އެކު އެވެ. ދެ ވަނަ ލިބުނު ބެލްޖިއަމް އަށް 12 ޕޮއިންޓް ލިބުނުއިރު، ތިން ވަނަ އަށް ދިޔަ އިޓަލީގެ އޮތީ 10 ޕޮއިންޓެވެ. ތުރުކީ ވަނީ ކުޅުނު ހަ މެޗުން ވެސް ބަލިވެފަ އެެވެ.







