ބްރާގާ، ޕޯޗުގަލް (ނޮވެމްބަރު 15) - ކްރިސްޓިއާނޯ ރޮނާލްޑޯ، ޕޯޗުގަލް ގައުމީ ޓީމުން ރިޓަޔާކުރި ފަހުން އެ ޓީމުން ކުޅުނު ފުރަތަމަ މެޗުގައި ރޭ ޔުއެފާ ނޭޝަންސް ލީގުގައި އަމިއްލަ ދަނޑުގައި ޑެންމާކް އަތުން 4-1 އިން ބަލިވެއްޖެ އެވެ.
ތޭވީސް އަހަރަށް ފަހު ރޮނާލްޑޯ ޕޯޗުގަލްގެ ގައުމީ ޓީމަށް ކުޅުން ހުއްޓާލުމާ އެކު، އޭނާ އަށް އިހުތިރާމް އަދާކުރުމުގެ ގޮތުން، ރޭ ޕޯޗުގަލް ހުރިހާ ކުުޅުންތެރިން ދަނޑަށް ނުކުތީ ހަތް ނަމްބަރު ޖޯޒީގަ އެވެ. ރޮނާލްޑޯ އަށް ހާއްސަ ބެނާއެއް ސަޕޯޓަރުން ދައްކާލިއިރު، ދަނޑުގެ މެސްކޮޓް ވެސް ހުރީ ރޮނާލްޑޯގެ ނަމްބަރު ޖޯޒީގަ އެވެ. އަދި، "ޝުކުރިއްޔާ ކެޕްޓަން" ޖަހާފައިވާ މެސެޖެއް ވެސް ވަނީ ދައްކާލައިފަ އެވެ.
ޑެންމާކުން މި މެޗުގެ 43 ވަނަ މިނިޓްގައި ލީޑުނެގީ ޕިއޭ އެމީލް ހޮއިބިއާ ވައްދާލި ޕެނަލްޓީންނެވެ. ދެ ވަނަ ހާފުގައި ކުޅެން އަރައި ރަސްމުސް ހޮއިލުންޑް ވަނީ ޕޯޗުގަލް ކޮޅަށް ޑެންމާކަށް އިތުރު ދެ ލަނޑު ޖަހައިދީފަ އެވެ. އަދި، ޔަކީމް އެންޑަސަން ވަނީ ޑެންމާކްގެ ހަަތަރު ވަނަ ލަނޑު ޖަހައިފަ އެވެ. މެޗުގައި ޕޯޗުގަލް އިން ޖެހި ހަމައެކަނި ލަނޑު ޖެހީ މެޗުގެ އިތުރު ވަގުތުގައި ބެނާޑޯ ސިލްވާ އެވެ.
މި މެޗަށް ނުކުތްއިރު ވެސް ދެ ފަހަރު ނޭޝަންސް ލީގު ހޯދާފައިވާ ޕޯޗުގަލް އިން ވަނީ މި ފަހަރުގެ މުބާރާތުގެ ކުއާޓާ ފައިނަލަށް ދަތުރުކޮށްފަ އެވެ. އެއީ، ފުރަތަމަ ހަތަރު މެޗުން މޮޅުވެ، 12 ޕޮއިންޓް ހަމަކޮށްގެންނެވެ. ދެ ވަނައިގައި އޮތް ޑެންމާކަށް ނުވަ ޕޮއިންޓް ލިބިފައިވާއިރު، ތިން ވަނައިގައި އޮތް ނޯވޭ އަށް ލިބުނީ ހަ ޕޮއިންޓެވެ. ފުލުގައި އޮތް ވޭލްސް އަށް ފަސް މެޗުން ތިން ޕޮއިންޓެވެ.
ގްރޫޕްގެ ފަހު މެޗުގައި ޑެންމާކުން ނޯވޭއާ ކުޅޭއިރު، ޕޯޗުގަލް އިން ބައްދަލުކުރާނީ ވޭލްސްއާ އެވެ.
