ޒިއުރިކް، ސްވިޒަލެންޑް (ނޮވެމްބަރު 3) - ދުނިޔޭގެ މައި ފުޓްބޯޅަ އިދާރާ ފީފާގައި މިހާރު އޮތް ލީޑަޝިޕާ ގުޅޭގޮތުން މައްސަލަ ބޮޑުވި ހުރިހާ ލިޔެކިއުމެއް އާންމުކުރުުމަށް، ޔޫރަޕްގެ މައި ފުޓްބޯޅަ އިދާރާ، ޔުއެފާ އިން ދިން މުހުލަތު ހަމަވިއިރު، އެ ލިޔެކިޔުންތައް ދައްކާލަން ފީފާ އިން އެއްބަސްވެއްޖެ އެވެ.
ފީފާގެ މުބާރާތްތަކުގެ ރައިޓްސް، ވޯލްޑް ކަޕް ހިމެނޭހެން، އެމެރިކާގެ ރައީސް ޑޮނާލްޑް ޓްރަމްޕްގެ އާއިލީ ގުޅުން އޮންނަ ކުންފުންޏަކަށް ވިއްކާލަން އުޅުނު ފީފާ ފޯވާޑް އެންޓަޕްރައިސް (އެފްއެފްއީ) ޑީލުގެ ލިޔެކިޔުންތަކާއި މި ފަހަރު އެމެރިކާ، މެކްސިކޯ އަދި ކެނަޑާގައި އޮތް ފީފާ ވޯލްޑް ކަޕްގެ ތެރެއިން، އެމެރިކާގެ ފޯވާޑް، ފަލޮރިން ބަލޮގަން އަށް ދެއްކި ރަތް ކާޑަށް މާފު ދޭން ނިންމި ގޮތުގެ ލިޔެކިޔުންތައް އާންމުކުރަން ޔުއެފާ އިން ފީފާ އަށް ދިން މުއްދަތު ހަމަވީ އިއްޔެގެ ނިޔަލަށެވެ.
ފީފާގެ ސެކްރެޓަރީ ޖެނެރަލް، މަޓިއަސް ގްރާފްސްޓްރަމް ފޮނުއްވި ސިޓީއެއްގައި ވަނީ ލިޔެކިޔުންތައް ފީފާ އިން ދައްކާނެ ކަމަށާއި، އެއީ ހާއްސަ އުސޫލުތަކެއްގެ ތެރެއިން، ސްވިޒަލެންޑްގެ ޒިއުރިކްގައި ހުންނަ ފީފާގެ ހެޑްކުއާޓަރުގައި ކަމަށެވެ. އަދި، އެ ލިޔެކިޔުންތައް ދައްކާނީ ފީފާ ކައުންސިލް މެމްބަރުން ރަޖިސްޓްރީކޮށްގެން ކަމަށާއި އެ ފުރުސަތަށް ކުރިއަށް އޮތް ހަފްތާތަކުގެ ތެރޭގައި ހުޅުވާލާނެ ކަމަށް ގްރާފްސްޓްރަމްގެ އެ ސިޓީގައި ހިމަނުއްވާފައިވެ އެވެ.
ޔުއެފާ އިން އަންނަނީ ފީފާއާ ދެކޮޅަށް އެެމެރިކާ ކޯޓުގައި މައްސަލައެއް ވެސް ކުރިއަށްގެންދަމުންނެވެ. އެއީ، އެފްއެފްއީގެ ހަގީގަތް ފުޓްބޯޅަ ދުނިޔެ އަށް ހާމަކުރުމަށްޓަކައި ކުރާ މަސައްކަތެއްގެ ގޮތުގައި ޔުއެފާ އިން މީގެ ކުރިން ވަނީ ބުނެފަ އެވެ.
ފީފާގެ ރައީސްގެ މަގާމުގައި، 2016 ގެ ފަހުން ހުންނެވި، ޖިއާނީ އިންފަންޓީނޯ މަގާމުން ދުރުކުރުމަށް އެންމެ ބޮޑަށް މަސައްކަތް ކުރަމުން އަންނަނީ ޔުއެފާ އިންނެވެ. އެކަމަކު، އަންނަ އަހަރުގެ މާޗް މަހު ބާއްވާ އިންތިހާބުގައި ހަތަރު ވަނަ ދައުރެއް ކަށަވަރުކުރެއްވުމުގެ ފުރުސަތު އިންފަންޓީނޯ އަށް ވަނީ ބޮޑުވެފަ އެވެ. އެއީ، އޭޝިއާ އާއި އެފްރިކާގެ ގައުމުތަކުގެ ތާއީދު ކަށަވަރުވެފައިވާތީ އެވެ.
އަންނަ މަހު، 18 ވަނަ ދުވަހު، ފީފާގެ އިންްތިހާބަށް ކުރިމަަތިލުމުގެ މުއްދަތު ހަމަވާނެ އެވެ. ފީފާގެ ރައީސްގެ މަގާމު ލިބޭނީ، ފީފާ މެމްބަރު، 211 ގައުމުގެ ތެރެއިން، މަދުވެގެން 106 ގައުމުގެ ތާއީދު ހޯދައިގެންނެވެ. މި ވަގުތަށް ބަލާއިރު، އިންފަންޓީނޯ އަށް މި ވަނީ، 47 ގައުމު ހިމެނޭ އޭއެފްސީ އާއި 54 ގައުމު ހިމެނޭ އެފްރިކާގެ ކާފްގެ ތާއީދު ލިބިފަ އެވެ.
