ގައުމީ ބިލިއާޑް މުބާރާތުގެ ޗެމްޕިއަންކަން މޯލްޑިވްސް އިސްލާމިކް ބޭންކް ސްޓާފް އެސޯސިއޭޝަން (މިބްސާ) އިން ހޯދައިފިއެވެ.
މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިންތިޒާމުކޮށްގެން ބޭއްވި ގައުމީ ބިލިއާޑު މުބާރާތުގެ ޗެމްޕިއަންކަން މިބްސާއިން ހޯދީ 14 ނޮވެންބަރު 2026 ވީ ހޮނިހިރު ދުވަހުގެ ރޭ ކުޅުނު ފައިނަލް މެޗުގައި ދިވެހި ސިފައިންގެ ކްލަބާ ވާދަކޮށް 3-2 އިން މެޗު ކާމިޔާބުކޮށްގެންނެވެ.
ޖުމްލަ 10 ޓީމު ބައިވެރިވެގެން ކުރިއަށްގެންދެވުނު މި މުބާރާތުގެ ލީގު ބުރުގައި މިބްސާއިން ވަނީ ކުޅުނު ނުވަ މެޗުގެ ތެރެއިން އަށް މެޗު ކާމިޔާބުކޮށްފަ އެވެ. އަދި، ފުރަތަމަ ސެމީ ފައިނަލްގައި ނިއު ރޭޑިއަންޓް ސްޕޯޓްސް ކްލަބް ބަލިކުރުމަށްފަހު، ދެ ވަނަ ސެމީ ފައިނަލްގައި މިދިޔަ އަހަރުގެ ޗެމްޕިއަން ކްލަބް ޓީނޭޖް ބަލިކޮށް މިބްސާއިން ވަނީ ފައިނަލަށް ދަތުރުކޮށްފަ އެވެ.
މިއީ ކޮންމެ އަހަރަކުވެސް ރާއްޖޭގައި ބޭއްވޭ ބިލިއާޑުގެ އެންމެ ބޮޑު އަދި އެންމެ ޝަރަފުވެރި މުބާރާތަށް ވާއިރު، މި މުބާރާތުގައި ރާއްޖޭގައި މިވަގުތު ތިބި ބިލިއާޑުގެ އެންމެ މޮޅު ކުޅުންތެރިންގެ އިތުރުން ބައެއް ޓީމުތަކުގައި ރާއްޖެއިން ބޭރުގެ ކުޅުންތެރިންވެސް ވާދަކޮށްފައިވެ އެވެ.
ޗެމްޕިއަން ޓީމަށް 30,000/- (ތިރީސް ހާސް) ރުފިޔާގެ ފައިސާގެ އިނާމު ހުށަހެޅިފައިވާ މި މުބާރާތް ކުރިއަށް ގެންގޮސްފައިވަނީ 16 އޮކްޓޫބަރު 2026 އިން 14 ނޮވެންބަރު 2026 ގެ ނިޔަލަށް ނެޝަނަލް ބިލިއާޑް ސެންޓަރުގަ އެވެ.







