ބަންގްލަދޭޝްގައި ރޭ ނިމުނު، ޓެކްނޯ ސާފް ޗެމްޕިއަންޝިޕް 2026 ގެ ފެއާޕްލޭ އެވޯޑް ރާއްޖެ އަށް ލިބިއްޖެ އެވެ.
މި ފަހަރުގެ ސާފް ޗެމްޕިއަންޝިޕްގައި ރާއްޖޭން ކުޅުނީ ގްރޫޕް ސްޓޭޖުގެ ދެ މެޗެވެ. އެ ގޮތުން، ފުރަތަަމަ މެޗުގައި 3-0 އިން ޕާކިސްތާން އަތުން ބަލިވިއިރު، ދެ ވަނަ މެޗުގައި އިންޑިއާ އަތުން ވަނީ 1-0 އިން ބަލިވެފަ އެވެ. މި ދެ މެޗަށް ބަލާއިރު، ރާއްޖެ އަށް ދެއްކީ އެންމެ ރީނދޫ ކާޑެކެވެ. އެއީ، ޕާކިސްތާން މެޗުގައި ރާއްޖޭގެ ޑިފެންޑަރު، ހަސަން އީނާޒް އަށް ދެއްކި ކާޑެކެވެ.
ސާފް ޗެމްޕިއަންޝިޕްގެ ފައިނަލުގައި ރޭ ޕާކިސްތާން 2-1 އިން ބަލިކޮށް، އިންޑިއާ އިން ވަނީ 10 ވަނަ ފަހަރަށް މުބާރާތުގެ ތަށި ހޯދައިފަ އެވެ.
މިއީ، ސާފް ޗެމްޕިއަންޝިޕްގައި ރާއްޖެ އަށް އެންމެ ދަށް ނަަތީޖާ ލިބުނު ފަހަރެވެ. ޖެހިޖެހިގެން ތިން ވަނަ ސާފް ޗެމްޕިއަންޝިޕްގެ ފުރަަތަމަ ބުރުން ކެޓި ރާއްޖެ އަށް މި ފަހަރުގެ މުބާރާތް ނިމުނީ ލަނޑެއް ވެސް ނުޖެހި، ޕޮއިންޓެއް ވެސް ނުލިބި އެވެ. ރާއްޖޭގައި 2021 ވަނަ އަަހަރު ބޭއްވި ސާފް ޗެމްޕިއަންޝިޕް ލީގު އުސޫލުން ކުޅުނުއިރު، ރާއްޖެ ދެ މެޗުން މޮޅުވި އެވެ. އަދި، 2023 ވަނަ އަަހަރު އިންޑިއާގެ ބެންގަލޫރުގައި ބޭއްވި ސާފް ޗެމްޕިއަންޝިޕްގައި ރާއްޖޭން ގްރޫޕް ސްޓޭޖުން ކެޓި ނަމަވެސް ބޫޓާން އަތުން މޮޅުވި އެވެ. އެކަމަކު، މި ފަހަރު އެއްވެސް ކަމެއް ހާސިލެއްނުވެ މުބާރާތުން ފުރަތަމަ ކެޓީ ރާއްޖެ އެވެ.
މީގެ ކުރިން، ބަންގްލަދޭޝްގައި ހޯސްޓްކުރި ތިން ސާފް ޗެމްޕިއަންޝިޕްގެ ފަައިނަލުގައި ވެސް ރާއްޖޭން ކުޅުނެވެ. އެ ގޮތުން، 2003 ވަނަ އަހަރުގެ ފައިނަލުގައި ޕެނަލްޓީ ޖަހައިގެން ބަންގްލަދޭޝް އަތުން ރާއްޖެ ބަލިވި އެވެ. މިއީ، މިހާތަނަށް ސާފް ޗެމްޕިއަންޝިޕް ފައިނަލެއްގައި އިންޑިއާ ނެތް ފުރަތަަމަަ ފަހަރެެވެ. އޭގެ ފަހުން، 2009 ވަނަ އަހަރުގެ ފައިނަލުގައި ރާއްޖެ ވަނީ އިންޑިއާގެ 23 އަހަރުން ދަށުގެ ޓީމު އަތުން ޕެނަލްޓީ ޖަހައިގެން ބަލިވެފަ އެވެ.
ބަންގްލަދޭޝްގައި ތިން ވަނަ ފަހަރަށް ބޭއްވި ސާފް ޗެމްޕިއަންޝިޕް އޮތީ 2018 ވަނަ އަހަރު އެވެ. އެ ފަަހަރުގެ ފައިނަލުގައި ރާއްޖޭން ވަނީ އިންޑިއާ ބަލިކޮށް ސަރަހައްދުގެ ތަށި ދެ ވަނަ ފަހަރަށް އުފުލާލައިފަ އެވެ. އެކަމަކު، އޭގެ އަށް އަހަރު ފަހުން، ބަންގްލަދޭޝްގައި އޮތް ސާފް ޗެމްޕިއަންޝިޕްގައި ރާއްޖެ ކުރިމަތިލާން ޖެހިފައި މި ވަނީ ރެކޯޑް ދަށް ނަތީޖާއަކާ އެވެ.







