ލޮސް އެންޖެލްސް، ޔުނައިޓެޑް ސްޓޭޓްސް (ނޮވެމްބަރު 13) - މެދުއިރުމަތީގައި މިހާރު ކުރިއަށްދާ ހަނގުރާމައިގެ ސަބަބުން ސަލާމަތީ ސަބަބުތަކަށްޓަކައި އެމެރިކާ އިން ގަތަރުގައި ބާއްވާ 17 އަހަރުން ދަށުގެ ވޯލްޑް ކަޕުން ނަން ނަގައިފި އެވެ.
މި މަހު 19 އިން އަންނަ މަހުގެ 13 އަށް ގަތަރުގައި ބާއްވާ 17 އަހަރުން ދަށުގެ ވޯލްޑް ކަޕްގައި 48 ގައުމު ވާދަކުރާއިރު، އެމެރިކާ ހިމެނެނީ، މޮންޓަނެގްރޯ، ޗިލީ އަދި އަލްޖީރިއާއާ އެއް ގްރޫޕެއްގަ އެވެ.
އެމެރިކާ އިން މުބާރާތުން ނަން ނެގީ، ޔަމަންގެ ހޫތީން އާއި އީރާނުން މެދުއިރުމަތީގައި ކުރަމުން އަންނަ ހަނގުރާމައިގެ ސަބަބުން މި ދަނޑިވަޅަކީ އެމެރިކާގެ ޓީމެއް އެ ސަރަހައްދުގައި މުބާރާތެއް ކުޅެން އެންމެ ރައްކާތެރި ދުވަސްވަރެއް ނޫން ކަމަށް ބުނެ އެވެ. އެމެރިކާގެ ފުޓްބޯޅަ ޖަމިއްޔާ އިން ވަނީ އެ ސަބަަބުތައް ބަޔާންކޮށް މުބާރާތުން ވަކިވިކަން ފީފާ އަށް ސިޓީ އަކުން އަންގައިފަ އެވެ.
މިދިޔަ މަހު އެމެރިކާގެ ސްޓޭޓް ޑިޕާޓްމަންޓުން ވަނީ ގަތަރަށް ދަތުރު ފަތުރު ކުރުމުގައި ސަމާލުވުމަށް އަންގައި، ލެވަލް ތިނަކަށް ޓްރެވަލް އެޑްވައިސަރީ ނެރެފަ އެވެ. އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ، ހަތިޔާރުހިފައިގެން ތިބޭ މީހުންގެ ނުރައްކާ އެމެރިކާގެ ރައްޔިތުންނަށް ގަތަރުގައި އެބައޮތް ކަމަށާއި އެހެންކަމުން ދަތުރުފަތުރު ކުރުމުގައި އެންމެހާ ރައްކާތެރި ފިޔަވަޅު އަޅަން ޖެހޭނެ ކަމަށެވެ.
ސަލާމަތީ ސަބަބުތަކަށްޓަކައި، މެދުއިރުމަތީގެ އެކި ގައުމުތަކުގައި ކުރިއަށްގެންދާ އެކިއެކި އިވެންޓްތައް އަންނަނީ ފަސްކުރަމުންނެވެ. އެ ގޮތުން، ސައުދީ އަރަބިއްޔާގައި އަންނަ އަަހަރުގެ ޖެނުއަރީ/ފެބްރުއަރީ މަހު ބާއްވަން ތާވަލުކޮށްފައި އޮތް އޭޝިއާގެ މައި ފުޓްބޯޅަ އިދާރާ، އޭއެފްސީގެ ބޮޑު މުބާރާތް އޭޝިއަން ކަޕް ވަނީ އަހަރުގެ ފަހުކޮޅަށް ފަސްކޮށްފަ އެވެ.
