މި މަހު 11-16 އަށް ކުރިއަށްދިޔަ މޯލްޑިވްސް އިސްލާމިކް ބޭންކް (އެމްއައިބީ) ރިވައިވަލް ސްޕޯޓްސް ބެޑްމިންޓަން ޗެލެންޖުގެ ސިންގަލްސް ބައިގެ ތަށި، ރިވައިވަލްގެ ހައިޝަމް އިބްރާހިމް އަލީ އާއި ފާތިމަތު ނަބާހާ އަބްދުލް ރައްޒާގު (ނަބާ) ހޯދައިފި އެވެ.
ނަބާ އާއި ހައިޝަމް އަކީ މި ފަހަރު އޮތް 50 ވަނަ ގައުމީ ބެޑްމިންޓަން މުބާރާތުގެ ސިންގަލްސް ބައިގެ ޗެމްޕިއަންކަން ވެސް ހޯދައިފަ އެވެ.
ރިވައިވަލް މުބާރާތުގެ ފިިރިހެން ސިންގަލްސް ބައިގެ ފައިނަލުގައި ހައިޝަމް ވާދަކުރީ ހުސެއިން ޒަޔާން ޝަހީދު ޒަކީ (ޒަޔާން ޒަކީ)އާ އެވެ. ފުރަތަމަ ސެޓު، 15-6 އިން ހައިޝަމް ގެންދިޔަ ނަމަވެސް، ދެ ވަނަ ސެޓުގައި ޒަޔާން ކުޅުން ރަނގަޅުކޮށް، 10-15 އިން ސެޓު ގެންދިޔަ އެވެ. ނަތީޖާ ނެރެން ކުޅުނު ތިން ވަނަ ސެޓު ފޯރިގަދަކޮށް ދިޔައިރު، ހައިޝަމް މޮޅުވީ، 16-14 އިންނެވެ.
އަންހެން ސިންގަލްސް ފައިނަލުގައި ވެސް ނަތީޖާ ނެރެން ޖެހުނީ ތިން ސެޓު ކުޅެގެންނެވެ. އެ ގޮތުން، ނަބާ، 15-13 އިން ފުރަތަމަ ސެޓު ގެންގޮސްފައިވަނިކޮށް، ދެ ވަނަ ސެޓުގައި ތަފާތު ހިތްވަރެއް ދައްކައި، ނަބީހާ އަބްދުއް ރައްޒާގު (ނަބީ) ވަނީ 9-15 އިން ދެ ވަނަ ސެޓު ގެންގޮސްފަ އެވެ. ނަތީޖާ ނެރެން ކުޅުނު ސެޓުގައި ނަބާ މޮޅުވީ، 15-11 އިންނެވެ.

ފިރިހެން ޑަބަލްސްގައި، ޒަޔާން ޒަކީ އާއި ނިބާލް އަހުމަދުގެ ޕެއާ ވާދަކުރީ އަލީ ނަސީރު އަބްދުﷲ (ސަޓޯ) އާއި އޭނާގެ ދަރިފުޅު، މުހައްމަދު އަރްސަލާން އަލީގެ ޕެއާއާ އެވެ. މި މެޗުން ޒަޔާން ޒަކީ އާއި ނިބާލް މޮޅުވީ، 15-07، 15-07 އިންނެވެ. އަންހެން ޑަބަލްސްގައި ނަބާ އާއި ނަބީގެ ޕެއާ އިން ވަނީ އައިޝަތު އަފްނާން ރަޝީދު އާއި މައިސާ ފަތުހުﷲ އިސްމާއިލް (މަައި)ގެ ޕެއާ ބަލިކޮށްފަ އެވެ. ނަބާ އާއި ނަބީގެ ޕެއާ އިން ސެޓުތައް ގެންދިޔައީ 15-07، 15-05 އިންނެވެ.
މިކްސް ޑަބަލްސް ފައިނަލުގައި، ނިބާލް އާއި ނަބީގެ ޕެއާ އިން ވަނީ ޒަޔާން ޒަކީ އާއި ނަބާގެ ޕެއާ ބަލިކޮށްފަ އެވެ. ނިބާލް އާއި ނަބީގެ ޕެއާ އިން ސެޓުތައް ގެންދިޔައީ، 15-10، 15-13 އިންނެވެ.
ރާއްޖޭގެ ކްލަބަކުން ބާއްވާ އެންމެ ބޮޑު ބެޑްމިންޓަން މުބާރާތް ރިވައިވަލް ސްޕޯޓްސް ބެޑްމިންޓަން ޗެލެންޖް މި ފަހަރު ކުރިއަށްދިޔައީ ބެޑްމިންޓަން އެސޯސިއޭޝަން އޮފް މޯލްޑިވްސް (ބީއޭއެމް)ގެ އެންޒޯޒްމަންޓާ އެކު، ނެޝަނަލް ރޭންކިން މުބާރާތެއްގެ ގޮތުގަ އެވެ. ޖޫނިއާ އާއި ސީނިއާ ކެޓަގަރީ ހިމެނޭ ގޮތަށް މާލޭ ކުޅިވަރު އެކުވެނި ބެޑްމިންޓަން ކޯޓުގައި ބޭއްވި މި މުބާރާތުގައި 32 އިވެންޓުން 371 އެންޓްރީސް ވަނީ ލިބިފަ އެވެ.
ރިވައިވަލް ސްޕޯޓްސް އިން އަންނަނީ އަހަރަކަށް ފަހު އަހަރެއް މި މުބާރާތް އިތުރަށް ފުރިހަމަ ކުރުމަށްޓަކައި ގިނަ މަސައްކަތްތަކެއް ކުރަމުންނެވެ. މި ފަަހަރުގެ މުބާރާތުގެ ޖޫނިއާ ކެޓަގަރީ އަށް ބަލާއިރު، އެންމެ ކާމިޔާބު ހޯދާފައިވަނީ، ރިވައިވަލް ސްޕޯޓްސް އެކަޑަމީ އާއި ރިވައިވަލް ސްޕޯޓްސް އޭދަފުށި އެކަޑަމީ އެވެ.







