ރައްޔިތުންގެ މަޖިލީހުގެ މިއަދުގެ ޖަލްސާ މެންދުރު 2:00 ޖަހާއިރު ފަށާ ގޮތަށް ތާވަލުކޮށްފި އެވެ.
ރައްޔިތުންގެ މަޖިލީހުގެ ޖަލްސާ އާންމުކޮށް ފަށަނީ ހެނދުނު 9:00 ޖަހާއިރެވެ. ނަމަވެސް މިއަދުގެ ޖަލްސާ މެންދުރު 2:00 ޖަހާއިރު ފެށުމަށް ނިންމާފައިވަނީ ކީއްވެގެން ކަމެއް މަޖިލީހުގެ އިދާރާއިން ހާމައެއް ނުކުރެ އެވެ.
ރަސްމާލެ ވިއްކާލާ ބިލު (ރިއަލް އެސްޓޭޓް ބިލް) ހިމެނޭ ގޮތަށް ޖުމްލަ ހަތަރު ބިލެއް ސަރުކާރުގެ ފަރާތުން މަޖިލީހުގެ މިއަދުގެ ޖަލްސާއަށް ވަނީ ހުށަހަޅާފަ އެވެ.
ސަރުކާރުގެ ފަރާތުން މަޖިލީހަށް ދެން ހުށަހެޅީ މަރުގެ އަދަބު ކަނޑައެޅުމާއި ތަންފީޒުކުރުމާ ބެހޭ ބިލާއި ނަމާއި އަބުރު ރައްކާތެރިކުރުމުގެ ހައްގުގެ ބިލުގެ އިތުރުން ދިވެހިރާއްޖޭގެ އިމިގްރޭޝަނުގެ ބިލެވެ.
ސަރުކާރުގެ ފަރާތުން ހުށަހެޅުއްވި މި ހަތަރު ބިލުގެ ފުރަތަމަ ކިޔުން އިއްވުން ޖަލްސާއަށް އެޖެންޑާކޮށްފައިވާއިރު، އަންނަ އަހަރަށް ލަފާކުރާ ދައުލަތުގެ ބަޖެޓުގެ ބަހުސްވެސް މިއަދު ފެށުމަށް ވަނީ ތާވަލުކޮށްފަ އެވެ.
ރަސްމާލެ ވިއްކާލުމުގެ ބިލު ސަރުކާރުގެ ފަރާތުން ހުށަހަޅުއްވާފައި މިވަނީ އެފަދަ ބިލެއް ހުށަހަޅާނެކަން ސަރުކާރުން އިއުލާނު ކުރުމަށްފަހު އެވެ. އެފަދަ ބިލެއް ހުށަހަޅަން އުޅޭކަން ހާމަކުރީ ރަސްމާލެ ވިއްކާލުމުގެ ފުރަތަމަ އެއްބަސްވުމުގައި ސޮއިކުރުމަށްފަހުކަން ފާގަހަކުރެވެ އެވެ. މި ބިލަށް ރައްޔިތުންގެ ހިޔާލު ހޯދުމަށް ދެ ހަފުތާގެ ވަގުތު ދެއްވާނޭކަމަށް ރައީސް މުއިއްޒު ވަނީ ވިދާޅުވެފަ އެވެ.
