ރައްޔިތުންގެ މަޖިލީހަށް ރައީސް މުހައްމަދު މުއިއްޒު އަޒުލް ނުކުރެވޭނަމަ އެކަން ކުރެވޭނީ ރައްޔިތުންނަށް ކަމަށް ކުރީގެ އުއްތަމަ ފަނޑިޔާރު ޑރ. އަހްމަދު އަބްދުﷲ ދީދީ ވިދާޅުވެއްޖެ އެވެ.
އަބްދުﷲ އެކްސް ގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ އަޒުލްކުރުމުގެ ބާރު ގާނޫނުއަސާސީން މަތިކޮށްފައިވާ މަޖިލީހުން ރައްޔިތުންނަށް ހިޔާނާތްތެރިވެ، ދުސްތޫރީ މަސްއޫލިއްޔަތުން އެއްކިބާވުމުން ދެން އޮތް ހައްލަކީ ގާނޫނުއަސާސީގެ ހަތަރުވަނަ މާއްދާ ކަމަށެވެ.
"ރައީސުލްޖުމްހޫރިއްޔާ ގާނޫނުއަސާސީއާ ހިލާފަށް ބާރުތައް ނަހަމަގޮތުގައި ބޭނުންކުރުމަކީ އާންމުކަމަކަށް ވެފައިވާއިރު، އަޒްލުކުރުމުގެ ބާރު ގާނޫނުއަސާސީ އިން މަތިކޮށްފައިވާ މަޖިލީހުން ގާނޫނުއަސާސީއާއި ރައްޔިތުންނަށް ހިޔާނަތްތެރިވެ، އެމީހުންގެ ދުސްތޫރީ މަސްއޫލިއްޔަތުން އެއްކިބާވީމަ، ދެން އޮންނާނީ އެންމެ ހައްލެއް. އެއީ ގާނޫނުއަސާސީގެ ހަތަރު ވަނަ މާއްދާ،" އޭނާ ވިދާޅުވި އެވެ.
ގާނޫނުއަސާސީގެ ހަތަރު ވަނަ މާއްދާގައި ބުނަނީ ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި އެ ބާރުތައް ދެމިއޮންނާނީ ރައްޔިތުންގެ ކިބައިގައި ކަމަށެވެ.
އަބްދުﷲ ވިދާޅުވީ ރައްޔިތުން ތަމްސީލުކުރާ ޒިންމާދާރު ރައްޔިތުންގެ މަޖިލީހެއް ރާއްޖޭގައި އޮތްނަމަ މިހާރު ރައީސުލްޖުމްހޫރިއްޔާ ވާނީ އަޒްލުކުރެވިފައި ކަމަށެވެ.
މީގެއިތުރުން ރައީސުލްޖުމްހޫރިއްޔާ ގެ އިތުބާރު ނެތްކަމުގެ ވޯޓު ނެގުމުގެ މަފްހޫމަކީ ގާނޫނުއަސާސީ ދަންނަ މަފްހޫމެއް ނޫންކަން ފާހަގަކުރައްވާ އަބްދުﷲ ވިދާޅުވީ ގާނޫނުއަސާސީ ދަންނަ މަފްހޫމަކީ ގާނޫނުއަސާސީގެ 100 ވަނަ މާއްދާގެ ދަށުން ރައީސުލްޖުމްހޫރިއްޔާ މަގާމުން ވަކިކުރުން ނުވަތަ އަޒްލުކުރުން ކަމަށެވެ.
މުއިއްޒުގެ އިތުބާރު ނެތްކަމުގެ ވޯޓެއް ނެގުމަށް ވެލިދޫ ދާއިރާގެ މެންބަރު މުހައްމަދު އައްބާސް އިއްޔެ ގޮވާލެއްވި އެވެ. އޭނާ ވިދާޅުވީ ރައްޔިތުންނަށް ހިންދެމިލައިގެން ދިރިއުޅެވޭނެގޮތެއް ނެތް ކަމަށެވެ.
ރާއްޖޭގެ ގާނޫނުއަސާސީ ބުނާގޮތުން ރައީސުލްޖުމްހޫރިއްޔާގެ އިތުބާރު ނެތްކަމަށް މަޖިލީހުން ފާސްކުރެވިދާނެ އެވެ. އެފަދަ މައްސަލައެއް މަޖިލީހަށް ހުށަހެޅޭނީ ތިންބައިކުޅަ އެއްބައި މެންބަރުންގެ ސޮއި ހަމަކޮށްގެން ކަމަށްވާއިރު، އެއީ 31 މެންބަރުންގެ ސޮޔެވެ.
މީގެއިތުރުން ރައީސުލްޖުމްހޫރިއްޔާގެ އިތުބާރު ނެތްކަމުގެ ވޯޓެއް މަޖިލީހުން ފާސްކުރެވެނީ މަޖިލިސް މެންބަރުންގެ ތެރެއިން މަދުވެގެން ތިންބައިކުޅަ ދެބައި މެންބަރުންގެ ވޯޓު ކަމަށްވާއިރު، އެއީ 62 މެންބަރުންގެ ވޯޓެވެ.
ރައްޔިތުންގެ މަޖިލީހުގައި މިވަގުތު ތިއްބެވި 93 މެންބަރުންގެ ތެރެއިން 73 މެންބަރުންނާއެކު މެޖޯރިޓީ އޮތީ ސަރުކާރު ހިންގާ ޕީއެންސީ އަތުގަ އެވެ. ބާކީ 20 މެންބަރުންގެ ތެރެއިން 13 މެންބަރުން އިދިކޮޅު އެމްޑީޕީގައި ތިއްބެވިއިރު، ދެން ތިއްބެވީ ޖޭޕީ އާއި އެމްޑީއޭގެ އިތުރުން އެއްވެސް ޕާޓީއަކަށް ނިސްބަތްނުވާ މެންބަރުންެވެ.
