ރައިސް މުހައްމަދު މުއިއްޒުގެ އިތުބާރު ނެތްކަމުގެ ވޯޓެއް ނެގުމަށް ވެލިދޫ ދާއިރާގެ މެންބަރު މުހައްމަދު އައްބާސް ގޮވާލައްވައިފި އެވެ.
ޕެރެގުއޭގެ ރައީސް ސަންޓިއާގޯ ޕެންޔާގެ އިތުބާރު ނެތް ކަމަށް ފާސްކުރި ހަބަރު އެކްސް ގައި ޕޯސްޓުކުރައްވައި އައްބާސް ވިދާޅުވީ އެކަން ރާއްޖޭގައި މިހާރު މިހާރަށް ކުރަން ޖެހޭ ކަމަށެވެ.
"މިހާރުން މިހާރައްވެސް މި ގައުމުގައި މީ ކުރާންވެއްޖެ ކަމެއް މިކަން ނުކޮށް ރައްޔިތުންނަށް ހިންދެމިލައިގެން ދިރިއުޅެވޭނެގޮތެއް ނެތް،" އައްބާސް ކުރެއްވި ޕޯސްޓުގައި ވިދާޅުވި އެވެ.
އައްބާސް ވިދާޅުވީ ތަކެތީގެ އަގާއި ކަރަންޓު ބިލާއި ތެލާއި ގޭސް އަގުބޮޑުކޮށްފައިވާއިރު، ދަތުރުފަތުރުގެ އަގުތަކާއި ވިޔަފާރިތަކާއި ރައްޔިތުން އަތުން ނަގާ ޓެކްސްތައްވެސް ސަރުކާރުން ބޮޑުކޮށްފައިވާ ކަމަށެވެ.
ޑޮލަރުގެ އަގު ހުރީ 23ރ. ގައިކަން ފާހަގަކުރައްވާ އައްބާސް ވިދާޅުވީ ސަރުކާރުން ނުކުރާނެ ކަމަށް ބުނި ހުރިހާ ކަމެއްކޮށް، ގައުމުގައި ހުރި ހަރުމުދާތައް ރަހުނުކޮށް އެކިއެކި ލޯނުތައް ނަގާ ގައުމު ދަރުވާލާފައިވާ ކަމަށް އޭނާ ވިދާޅުވި އެވެ.
މީގެއިތުރުން އައްބާސް ވިދާޅުވީ ރަސްމާލެއިން އެއްބައި އެއްވެސް އަގަކާނުލައި ޔޫއޭއީގެ އީގަލް ހިލްސްއަށް ދިނުމަށް ނިންމައި، އެތަނުގައި ޔަހޫދީން ވަޒަންވެރި ކުރުމުގެ މަސައްކަތް ކުރަމުންދާ ކަމަށެވެ.
ރާއްޖޭގެ ގާނޫނުއަސާސީ ބުނާގޮތުން ރައީސުލްޖުމްހޫރިއްޔާގެ އިތުބާރު ނެތްކަމަށް މަޖިލީހުން ފާސްކުރެވިދާނެ އެވެ. އެފަދަ މައްސަލައެއް މަޖިލީހަށް ހުށަހެޅޭނީ ތިންބައިކުޅަ އެއްބައި މެންބަރުންގެ ސޮއި ހަމަކޮށްގެން ކަމަށްވާއިރު، އެއީ 31 މެންބަރުންގެ ސޮޔެވެ.
މީގެއިތުރުން ރައީސުލްޖުމްހޫރިއްޔާގެ އިތުބާރު ނެތްކަމުގެ ވޯޓެއް މަޖިލީހުން ފާސްކުރެވެނީ މަޖިލިސް މެންބަރުންގެ ތެރެއިން މަދުވެގެން ތިންބައިކުޅަ ދެބައި މެންބަރުންގެ ވޯޓު ކަމަށްވާއިރު، އެއީ 62 މެންބަރުންގެ ވޯޓެވެ.
ރައްޔިތުންގެ މަޖިލީހުގައި މިވަގުތު ތިއްބެވި 93 މެންބަރުންގެ ތެރެއިން 73 މެންބަރުންނާއެކު މެޖޯރިޓީ އޮތީ ސަރުކާރު ހިންގާ ޕީއެންސީ އަތުގަ އެވެ. ބާކީ 20 މެންބަރުންގެ ތެރެއިން 13 މެންބަރުން އިދިކޮޅު އެމްޑީޕީގައި ތިއްބެވިއިރު، ދެން ތިއްބެވީ ޖޭޕީ އާއި އެމްޑީއޭގެ އިތުރުން އެއްވެސް ޕާޓީއަކަށް ނިސްބަތްނުވާ މެންބަރުންެވެ.
