އާޓިފިޝަލް އިންޓެލިޖެންސް (އޭއައި) ޓެކްނޮލޮޖީ ބޭނުންކޮށްގެން ލޮލުގެ ފަށަލަ ނުވަތަ ރެޓިނާ ސްކްރީންކުރުމުގެ ހިދުމަތް، އައިރިސް ކުންފުންޏާ ގުޅިގެން އައިކެއާ ހޮސްޕިޓަލުން ރާއްޖެއަށް ތައާރަފުކޮށްފި އެވެ.
މި ހިދުމަތް ރަސްމީކޮށް އިފްތިތާހުކޮށްދެއްވީ ހުޅުމާލޭ ސެންޓްރަލް ޕާކުގައި މިހާރު ކުރިއަށްދާ މޯލްޑިވްސް ހެލްތު އެންޑް ފެމިލީ އެކްސްޕޯ 2026 ގަ އެވެ. މި ރަސްމިއްޔާތުގައި ހެލްތު މިނިސްޓްރީގެ ޑެޕިއުޓީ މިނިސްޓަރު އަހުމަދު ހަމްދާން ނާސިރާއި އައިކެއާގެ މެނޭޖިން ޑިރެކްޓަރު ޑރ. އަބްދުﷲ ޒާހިރު ބައިވެރިވެވަޑައިގެންނެވި އެވެ.
މިއީ ލޮލުގެ އެކި ބަލިތައް ކުރީކޮޅު ދެނެގަނެ، ފަރުވާއަށް އަވަހަށް ފޮނުވުމަށް މަގުފަހިކުރަން ފެށި ހިދުމަތެކެވެ.
މި ނިޒާމުގެ ދަށުން ހާއްސަ ކެމެރާއަކުން ރެޓިނާގެ ފޮޓޯ ނެގުމަށް ފަހު، އެ ތަސްވީރުތައް ދިރާސާކުރާނީ އައިރިސްގެ ސެލީނާ+ އޭއައި ސިސްޓަމުންނެވެ. މި ސިސްޓަމް މެދުވެރިކޮށް ހަކުރުބަލީގެ ސަބަބުން ލޮލަށް ލިބޭ ގެއްލުމާއި، ކަޅުކުލައިގެ ފެންފޭބުން އަދި އުމުރުން ދުވަސްވުމުން ފެނުމުގެ މައި މަރުކަޒަށް އަންނަ ބަދަލުތައް ދެނެގަނެވެ އެވެ. އަދި އޭއައި ރިޕޯޓުގެ އެހީގައި އަވަސް ފަރުވާ ބޭނުންވާ މީހުން ވަކިކޮށްލަން ޑޮކްޓަރުންނަށް ފަސޭހަވެ އެވެ.
ލޮލުގެ ބައެއް ބަލިތަކަކީ އެއްވެސް އަލާމާތެއް ނުފެނި ކުރިއަރަމުންދާ މައްސަލަތަކަކަށް ވާތީ، ފެނުމަށް ބަދަލެއް އައުމުގެ ކުރިން ބަލި ދެނެގަތުން މުހިންމެވެ. އޭއައި ތަހުލީލުތަކާ އެކު ޑޮކްޓަރުންގެ ހާއްސަ ތަޖުރިބާ އެއްކޮށްލުމުން ފަރުވާއާ ގުޅޭ ނިންމުންތައް ނިންމަން އަވަސްވެ އެވެ.
އައިކެއާއިން ބުނީ އަމާޒަކީ ލޮލުގެ ދުޅަހެޔޮކަން ބެލުމަށް ހަދާ ޓެސްޓުތަކަށް ލުއި ގޮތްތަކެއް ހަމަޖައްސައިދިނުން ކަމަށެވެ. އަދި، އައިކެއާގެ މައި ހޮސްޕިޓަލުން މި ހިދުމަތް ވަރަށް އަވަހަށް ލިބެން ފަށާނެ ކަމަށް ބުންޏެވެ.
އެހާތަނަށް ހެލްތު އެކްސްޕޯގައި ހުންނަ އެ ކުންފުނީގެ ސްޓޯލުން ނޮވެމްބަރު 7 ގެ ނިޔަލަށް ހިލޭ މައުލޫމާތާއި ސްކްރީނިން ތަޖުރިބާކޮށްލެވޭނެ އެވެ. މި ސްޓޯލް ކޮންމެ ދުވަހަކު ވެސް ހަވީރު 4:00 އިން 6:00 އަށް އަދި ރޭގަނޑު 8:00 އިން 11:00 އަށް ހުޅުވާފައި ހުންނާނެ އެވެ.
