ރާއްޖޭގައި ފެންވަރު ރަނގަޅު ލޮލުގެ ފަރުވާ ފޯރުކޮށްދިނުމަށް އައިކެއާ ހޮސްޕިޓަލުން ކުރަމުންދާ މަސައްކަތުގެ ދަށުން، އެ ހޮސްޕިޓަލުގެ ލޮލުގެ ބަލިތަކަށް ހާއްސަ ޑޮކްޓަރުންގެ ޓީމާ ޑރ. ސޯފިޔާ މަކަޖޫ ގުޅިވަޑައިގެންފި އެވެ.
ޑރ. ސޯފިޔާއަކީ ލޮލުގެ ބަލިތައް ދެނެގަތުމާއި، އެކި ބަލިތަކަށް ފަރުވާ ދިނުމުގެ އިތުރުން ލޮލުގެ އޮޕަރޭޝަންތައް ކުރުމުގެ ފަންނީ ތަމްރީނާއި ތަޖުރިބާ ލިބިވަޑައިގެންފައިވާ ބޭފުޅެކެވެ. އެގޮތުން މަނީޕާލް ކޮލެޖް އޮފް މެޑިކަލް ސައިންސަސް އިން މާސްޓާ އޮފް ސާޖަރީ (އެމް.އެސް) އިން އޮފްތަލްމޮލޮޖީ ގެ އިތުރުން ނޭޕާލްގެ ޕޮކަރާގައި ހުންނަ ހިމާލަޔަން އައި ހޮސްޕިޓަލުގައި 'ފެލޯޝިޕް އިން އެންޓީރިއާ ސެގްމަންޓް' ވެސް ވަނީ ފުރިހަމަކުރައްވާފަ އެވެ.
ހާއްސަ ތަމްރީނުތަކުގެ ތެރެއިން ޑރ. ސޯފިޔާ ވަނީ ކަތުމަންޑޫގެ ތިލްގަންގާ އިންސްޓިޓިއުޓް އޮފް އޮފްތަލްމޮލޮޖީގެ ސަބްސްޕެޝަލިޓީ ދާއިރާތަކުން ތަޖުރިބާ ހޯއްދަވާފަ އެވެ. މީގެ އިތުރުން ހިމާލަޔަން އައި ހޮސްޕިޓަލުގެ ހާއްސަ ކްލިނިކްތަކާއި އޮޕަރޭޝަން ތިއޭޓަރުތަކުގައި އަމަލީ ތަމްރީނުތައް ފުރިހަމަކުރައްވާފައިވެ އެވެ.
ލޮލުގެ ބަލިތަކުގެ ތަމްރީނު ފުރިހަމަކުރެއްވުމުގައި ދެއްކެވި ފާހަގަކޮށްލެވޭ ނަތީޖާއަށްޓަކައި، ޑރ. ސޯފިޔާއަށް ވަނީ 'ޕްރޮފެސަރ ޑރ. ރާމް ޕްރަސާދު ޕޮކަރޭލް (އާންކާ ބާ) އެން.އޯ.އެސް ވައި.އޯ ބެސްޓް ރެސިޑެންޓް އެވޯޑް 2025' ލިބިވަޑައިގެންފަ އެވެ.
ޑރ. ސޯފިޔާ އައިކެއާގެ ޓީމާ ގުޅިވަޑައިގަތުމަކީ، ފެންވަރު ރަނގަޅު ލޮލުގެ ފަރުވާ ވީހާވެސް ގިނަ ރައްޔިތުންނަށް ފޯރުކޮށްދިނުމަށް އައިކެއާއިން ކުރަމުންދާ މަސައްކަތަށް ލިބިގެންދިޔަ އިތުރު ކުރިއެރުމެކެވެ.
ޑރ. ސޯފިޔާ ބައްލަވާނީ މާލޭގައި ހުންނަ އައިކެއާ ހޮސްޕިޓަލުގެ އިތުރުން ހުޅުމާލޭގައި ހުންނަ އައިކެއާ ހޮސްޕިޓަލް އެނެކްސްގައެވެ. ޑރ. ސޯފިޔާއަށް ދެއްކުމަށް ބޭނުންވާ ފަރާތްތަކުން އައިކެއާ ހޮސްޕިޓަލުގެ ވެބްސައިޓް https://eyecarehospital.mv/ މެދުވެރިކޮށް ނުވަތަ 7201026 އަށް ވަޓްސްއަޕް ނުވަތަ ވައިބާ މެދުވެރިކޮށް އެޕޮއިންޓްމަންޓް ބުކް ކުރެވޭނެ އެވެ.
