ލޮލުގެ ކަޅުކަޅި ނުވަތަ ކޯނިއާގެ ބައްޓަމަށް އަންނަ ބަދަލެއްގެ ސަބަބުން ފެނުމަށް ބޮޑެތި ހުރަސްތަކެއް ކުރިމަތިވާ ކެރަޓޯކޯނަސް ބައްޔަކީ ފެނުމުން މަހުރޫމުވެދާނެ ފަދަ ނުރައްކާތެރި ހާލަތެކެވެ.
މި ބަލީގެ ސަބަބުން ލޮލުގެ ނަންބަރު އަވަސް އަވަހަށް ބަދަލުވުމާއި، ފެންނަ ތަކެތި ފުސްވުމާއި، އެއްޗެހި ދެބައިވެގެން ފެނުމުގެ އިތުރުން އަލިގަދަ ތަންތަނަށް ބަލަން އުނދަގޫވުން ފަދަ ކަންކަން މެދުވެރިވެ އެވެ.
އައިކެއާގެ ލޮލުގެ ބަލިތަކާ ބެހޭ ހާއްސަ ޑޮކްޓަރު މުހައްމަދު އަދީބު އުއްދީން އަދަދު އަށް ވިދާޅުވީ ފެނުމުން މަހުރޫމުވުމުގެ ނުރައްކާ އޮތް މި ބަލި ހުއްޓުވުމަށްޓަކައި ބަލި ދެނެގަނެ ފަރުވާ ހޯދުން މުހިންމު ކަމަށެވެ.
"މި ބަލީގެ ފަރުވާގައި އެންމެ ކާމިޔާބު ނަތީޖާއެއް ލިބެނީ ބަލީގެ ކުރީކޮޅު ފަރުވާ ފަށައިގެން. ބަލި ބޮޑުވެ ފެނުން މުޅިން ގެއްލުމަށްފަހު އަލުން ފެނުން އަނބުރާ ހޯދުމަކީ ވަރަށް އުނދަގޫ ކަމެއް،" އޭނާ ވިދާޅުވި އެވެ.
ޑރ. އަދީބު ވިދާޅުވި ގޮތުގައި މި ބަލީގެ އަލާމާތްތައް އާންމުކޮށް ފެންނަން ފަށަނީ ފުރާވަރުގެ ކުރީކޮޅުގަ އެވެ. ނަމަވެސް ބައެއް ހާލަތްތަކުގައި އުމުރުން އެންމެ ހަ އަހަރުގެ ކުދިންގެ ކިބައިން ވެސް މި ބަލި ފެނިފައިވާ ކަމަށް އޭނާ ފާހަގަކުރެއްވި އެވެ.
ހޫނުގަދަ އަދި ހިރަފުސް ގަދަ ސަރަހައްދުތަކުގައި ދިރިއުޅޭ މީހުންގެ ލޯ ހިކުމުގެ ސަބަބުން ލޯ އުނގުޅުމުގެ އާދަ ހުންނަ ކަމަށާއި، މިއީ ކޯނިއާގެ ބައްޓަން ބަދަލުވުމަށް މަގުފަހިވާ ކަމެއް ކަމަށް ޑޮކްޓަރު ވިދާޅުވި އެވެ. އޭނާ ވިދާޅުވީ ބަލި އިތުރަށް ގޯސްވުމަށް ދިމާވާ އެންމެ ބޮޑު އެއް ސަބަބަކީ ގަދައަށް ލޯ އުނގުޅުމެވެ.
ބަލި ޖެހޭ މީހުންގެ ތެރެއިން ގާތްގަނޑަކަށް 10 ޕަސަންޓު މީހުންނަކީ އާއިލީ ގޮތުން މި ބަލީގެ ތާރީހު އޮންނަ މީހުން ކަމަށްވާއިރު، ބަލި ދެނެގަތުމަށްޓަކައި ލޮލުގެ ސްކޭންތަކާއި ޓެސްޓުތައް ހެދުން މުހިންމެވެ. ހާއްސަކޮށް ލޮލުގެ ނަންބަރުގައި ސިލިންޑަރު ނަންބަރު މަތިކޮށް ހުންނަ ނަމަ، އެއީ ކެރަޓޯކޯނަސް ކަމަށް ޝައްކުކޮށް އިތުރަށް ބަލަންޖެހެ އެވެ.
ކެރަޓޯކޯނަސްގެ ފަރުވާގެ ތެރޭގައި ހާޑް ކޮންޓެކްޓް ލެންސް ބޭނުންކުރުމާއި، ކޮލަޖަން ކްރޮސް ލިންކިން ފަދަ ފަހުގެ ފަރުވާތައް ހިމެނެ އެވެ. ކޮލަޖަން ކްރޮސް ލިންކިން އަކީ މިހާރު މި ބައްޔަށް ދެވޭ އެންމެ އިތުބާރު ހުރި ފަރުވާ ކަމަށާއި، މީގެ ސަބަބުން ބަލި އިތުރަށް ގޯސްވުން ހުއްޓުވައިދޭ ކަމަށް ޑޮކްޓަރު ވިދާޅުވި އެވެ. މި ފަރުވާގެ ކާމިޔާބީގެ ނިސްބަތް 90 ޕަސަންޓަށްވުރެ މަތިކަން ވެސް އޭނާ ފާހަގަކުރެއްވި އެވެ.
ބަލި ވަރަށް ބޮޑަށް ގޯސްވެފައިވާ ހާލަތްތަކުގައި ކޯނިއާ ބަދަލުކުރުން ނުވަތަ ޓްރާންސްޕްލާންޓް ހަދަން ޖެހުނު ނަމަވެސް، އެއީ ފުރިހަމަ ޔަގީންކަމެއް އޮތް ކަމެއް ނޫން ކަމަށް ޑޮކްޓަރު ވިދާޅުވި އެވެ. އެހެންކަމުން އޭނާ ވިދާޅުވީ ލޯ އުނގުޅުމުގެ އާދަ ހުންނަ މީހުންނާއި އާއިލާގައި މި ބަލީގެ ތާރީހު އޮންނަ މީހުން ގަވާއިދުން ލޯ ޗެކްކުރުމަކީ ފެނުން ރައްކާތެރިކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށެވެ.
