ހުޅުމާލެ ސެންޓްރަލް ޕާކުގައި މިހާރު ކުރިއަށްދާ "މޯލްޑިވްސް ހެލްތު އެންޑް ފެމިލީ އެކްސްޕޯ 2026" ގައި ޓްރީ ޓޮޕް ހޮސްޕިޓަލުން ބައިވެރިވެ، އެ ހޮސްޕިޓަލުގެ ހާއްސަ ބަލިތަކުގެ ހިދުމަތްތައް އާންމުންނަށް ދައްކާލަން ފަށައިފި އެވެ.
މި މަހުގެ 5 އިން 7 އަށް، ތިން ދުވަހުގެ މުއްދަތަށް ކުރިއަށްދާ މި އެކްސްޕޯއަކީ ރާއްޖޭގެ ސިއްހީ ހިދުމަތްދޭ އިސް ފަރާތްތަކާއި، ހާއްސަ ބަލިތަކުގެ ޑޮކްޓަރުން އަދި ދުޅަހެޔޮ ދިރިއުޅުމަކަށް ވަކާލާތުކުރާ ފަރާތްތައް އެއްތަނަކުން ބައްދަލުވެ، ސިއްހީ ހޭލުންތެރިކަން އިތުރުކުރުމާއި އާއިލީ ދުޅަހެޔޮކަން ކުރިއެރުވުމުގެ މަގުސަދުގައި ބާއްވާ މުހިންމު ހަރަކާތެކެވެ.
މި ހަރަކާތުގެ ތެރެއިން އަންހެނުންގެ ސިއްހަތާއި، ދަރިމައިވުމުގެ މައްސަލަތައް، ދަތުގެ ފަރުވާ، އަނގަޔާއި މޫނުމަތީގެ ސާޖަރީ، ޓްރޯމާ ކެއާ އަދި ނިއުރޯސާޖަރީ ފަދަ ދާއިރާތަކުން ޓްރީ ޓޮޕްގެ ހާއްސަ ޑޮކްޓަރުންނާ މަޝްވަރާކުރުމާއި މައުލޫމާތު ހޯދުމުގެ ފުރުސަތު އާންމުންނަށް ލިބިގެންދާނެ އެވެ.
އެކްސްޕޯ ކުރިއަށްދާ ކޮންމެ ދުވަހަކުވެސް ހަވީރު 16:00 އިން 18:00 އަށް އަދި ރޭގަނޑު 20:00 އިން 23:00 އަށް ޓްރީ ޓޮޕްގެ ސްޓޯލުން ޑޮކްޓަރުންނާ ބައްދަލުކުރެވޭނެއެވެ. ޑޮކްޓަރުންގެ ޝެޑިއުލް ހަމަޖެހިފައިވާ ގޮތަކީ:
| ތާރީހު | ހާއްސަ ދާއިރާ | ޑޮކްޓަރުން |
| 5 ނޮވެމްބަރު | ދަރިމައިވުމުގެ މައްސަލަތައް، މާބަނޑު ދުވަސްވަރުގެ ފަރުވާ، ވިހެއުމުގެ ކުރިން ދެވޭ ފަރުވާ | ޑރ. ޒަކިއްޔާ އަދި ޑރ. ވަރުޝާ |
| 6 ނޮވެމްބަރު | ދަތުގެ ފަރުވާ، އަނގަޔާއި މޫނުމަތީގެ ސާޖަރީ | ޑރ. ރީޝާ އަދި ޑރ. ސަލްމާން |
| 7 ނޮވެމްބަރު | ކުޑަކުދިންގެ ބަލިތައް، ޓްރޯމާ އަދި ނިއުރޯސާޖަރީ | ޑރ. އެލެސަންޑްރާ އަދި ޑރ. ޖޯ |
"މޯލްޑިވްސް ހެލްތު އެންޑް ފެމިލީ އެކްސްޕޯގައި ބައިވެރިވުމަކީ އާންމު ރައްޔިތުންނާ ގާތުން ބައްދަލުކޮށް، ސިއްހީ ހޭލުންތެރިކަން އިތުރުކުރުމަށާއި ރާއްޖޭގެ ކޮންމެ ސަރަހައްދަކުންވެސް ސިއްހީ ހިދުމަތްތައް ފަސޭހައިން ލިބޭނެ މަގު ފަހިކޮށްދިނުމަށް އަޅުގަނޑުމެން ކުރާ މަސައްކަތަށް ލިބޭ އިތުރު ކުރިއެރުމެއް،" ޓްރީ ޓޮޕް ހޮސްޕިޓަލުގެ ސީއީއޯ ޑރ. ސްރިވަތުސަން ސްރީދަރް ޖީ ވިދާޅުވި އެވެ.
މީގެ އިތުރުން، އާއިލާތަކާ ބައްދަލުކޮށް އެފަރާތްތަކުގެ ސިއްހީ ސުވާލުތަކަށް ޖަވާބުދީ، ދުޅަހެޔޮ ދިރިއުޅުމަކަށް އެހީތެރިވެދިނުމަކީ ހޮސްޕިޓަލުގެ ވަރަށް ބޮޑު އުންމީދެއްކަން ފާހަގަކުރައްވައި، އެކްސްޕޯގައި ހުންނަ ޓްރީ ޓޮޕްގެ ސްޓޯލަށް ޒިޔާރަތްކޮށް، ސިއްހީ މައުލޫމާތު ހޯދުމުގެ މި ހާއްސަ ފުރުސަތުގެ ބޭނުން ހިފުމަށް އެ ހޮސްޕިޓަލުން ވަނީ އާންމުންނަށް ދައުވަތު އަރުވާފަ އެވެ.
ޓްރީ ޓޮޕް ހޮސްޕިޓަލަކީ ތަޖުރިބާކާރު ސިއްހީ މާހިރުންނާއި، ޒަމާނީ ވަސީލަތްތަކުގެ އެހީގައި ބަލިމީހުންނަށް އިސްކަންދީގެން ހިދުމަތް ފޯރުކޮށްދޭ ރާއްޖޭގެ އެންމެ ކުރިއަރާފައިވާ އެއް ހޮސްޕިޓަލެވެ. އެ ހޮސްޕިޓަލުން އަންނަނީ ރައްޔިތުންގެ ބޭނުންތަކާ ގުޅޭގޮތަށް ހާއްސަ ބަލިތަކަށް ދޭ ފަރުވާތައް ފުޅާކޮށް، އާ ހިދުމަތްތައް މެދުކެނޑުމެއްނެތި ތައާރަފުކުރަމުންނެވެ.
