ހުޅުމާލޭގައި އިއްޔެ ހެނދުނު ހިނގި ނުރައްކާތެރި އެކްސިޑެންޓެއްގައި ލަމްބަގިނީ ރެވުއެލްޓޯ މަރުކާގެ ސުޕާ ކާރެއް ކޮންޓްރޯލް ނުވެ ގޮސް، މަގުގެ އެއްފަރާތުގައި ހަރުކޮށްފައި ހުރި ސޯލާ ޕެނަލްތަކުގެ އޮނިގަނޑުން ބަޔަކަށް އަރައި، ކާރަށް ބޮޑު ގެއްލުންތަކެއް ވެ، ބައެއް ސޯލާ ޕެނަލްތައް ވެސް ހަލާކުވި އެވެ.
މި ކާރު ދުއްވަން އިނީ ހޯކްސް ޕްރައިވެޓް ލިމިޓެޑްގެ ސީއީއޯ ހަސަން ރިފާއު އާއި އޭނާގެ ފިރިހެން ދަރިފުޅެވެ. އެ ދެ ބަފައިންނަށް ސީރިއަސް އަނިޔާތަކެއް ލިބިފައި ނުވާ ކަމަށާއި ޓްރީ ޓޮޕް ހޮސްޕިޓަލުން ފަރުވާ ދިނުމަށް ފަހު އިއްޔެ ހެނދުނުގެ ވަގުތެއްގައި ދޫކޮށްލާފައިވާ ކަމަށް ފުލުހުން ބުނެ އެވެ.
އެކްސިޑެންޓަށް ފަހު ސޯޝަލް މީޑިއާގައި ދައުރުވަމުންދާ ފޮޓޯތަކުން ޑްރައިވަރު ކާރު ތެރެއިން ނުކުންނަ މަންޒަރު ފެނެ އެވެ. އެ މީހުން ހޮސްޕިޓަލަށް ދިޔައީ ޓެކްސީއެއްގައި އަމިއްލަ އަށް ކަމަށް ވެސް މައުލޫމާތު ލިބިފައިވެ އެވެ.
ކާރު ފުނޑުފުނޑުވިއިރު، ސީރިއަސް އަނިޔާތަކެއް ނުލިބި ކާރުގައި ތިބި ދެބަފައިން ސަލާމަތްވީ ކީއްވެ ހެއްޔެވެ؟ މިއީ އިލާހީ ރަހުމަތާއެކު، އަދި ލަމްބަގިނީގެ އާދަޔާހިލާފު ސަލާމަތީ ފީޗާތަކުގެ ނަތީޖާ އެވެ. މިމަރުކާގެ ކާރުގެ ސަލާމަތީ މުހިންމު ކަންކަމަށް މި ލިޔުމުގައި ބަލައިލާނަމެވެ.
ލަމްބަގިނީގެ ފަހުގެ ސުޕަރކާރުތަކުގައި ބޭނުންކުރަނީ އެފް-1 ރޭސިން ކާރުތަކުގައި ބޭނުންކުރާ ފަދަ ވަރުގަދަ ކާބަން ފައިބަރ ކެބިންއެކެވެ. މިއީ ދެ ޕެސެންޖަރުން ތިބޭ ކެބިން ވަށައިގެންވާ، އާދައިގެ ދަގަނޑަށްވުރެ އެތައް ގުނައެއް ވަރުގަދަ "ސޭފްޓީ ކޭޖެކެވެ". ކާރުގެ ބޭރު އޮނިގަނޑު ފުނޑުފުނޑުވެގެން ދިޔަޔަސް، އެތެރޭގެ ކެބިން ފިސްފިސްނުވި މައިގަނޑު ސަބަބަކީ މިއެވެ.
މިފަދަ ސުޕާ ކާރުތައް ޑިޒައިންކޮށްފައިވަނީ އެކްސިޑެންޓްވާ ވަގުތު އުފެދޭ ބާރުގަދަ ޝޮކްވޭވްތައް އަމިއްލައަށް ދަމައިގަންނަ ގޮތަށެވެ. ކާރު އެއްޗެއްގައި ޖެހޭ ވަގުތު ކުރީކޮޅާއި ބޭރުގެ ބައިތައް ފިސްފިސްވެގެން ދަނީ އެ ބާރުތައް ކާރުގެ އެތެރޭގައި ތިބި މީހުންގެ ހަށިގަނޑަށް ފޯރުމުގެ ކުރިން ބޭރުގެ ބައިތަކުން އެ ބާރުތައް ނައްތާލުމަށެވެ.
ލަމްބަގިނީ ރެވުއެލްޓޯގައި ގާއިމުކޯށްފައިވާ އެއާ ބޭގްތައް ފަޅި ސިކުންތެއްގެ ތެރޭގައި އޮޕަރޭޓްވާނެ އެވެ. އިއްޔެ ހިނގި އެކްސިޑެންޓުގައި ޑްރައިވަރާއި އޭނާގެ ދަރިފުޅު ވިއްސައިގެން ދިޔަނުދީ ހިފަހައްޓައިދިނީ މި އެއާބޭގްތަކުންނެވެ. އަދި ކަކުލާއި އަރިމަތީ އެއާބޭގްތަކުން ކާރުގެ ހަރު ބައިތަކުގައި ޖެހި ބޮޑު އަނިޔާއެއްވިޔަނުދީ ރައްކާތެރިކޮށްދިނެވެ.
ބޮޑު އަނިޔާއެއް ނުވި އަނެއް ސަބަބަކީ މިފަދަ ކާރެއް އެކްސިޑެންޓުވާ ވަގުތު ސީޓްބެލްޓްތަކުގައިވާ ޕްރީ-ޓެންޝަން ސިސްޓަމުން އޮޓޯއިން ސީޓްބެލްޓް ކުއްލިއަކަށް ބާރުކޮށް، ދެމީހުން ސީޓުގައި ތަތްކޮށްލުމެވެ. މީގެ ސަބަބުން ކާރުގެ އެތެރޭގައި ބޮލާއި ހަށިގަނޑު ޖެހުމާއި، ކާރުން ވިއްސައިގެން ދިޔުން ހުއްޓުވައިދިނެވެ.
ހުޅުމާލޭގައި ހިނގި މި ހާދިސާއަކީ ނުރައްކާތެރި، އަދި ބޮޑެތި ގެއްލުންތަކެއް ލިބުނު އެކްސިޑެންޓެއް ނަމަވެސް، ލަމްބަގިނީގެ ކާބަން ފައިބާ މޮނޯކޮކް ސްޓްރަކްޗަ އާއި އެޑްވާންސްޑް ސޭފްޓީ ސިސްޓަމްތަކުގެ ފުރިހަމަކަމުން ދެމީހުންގެ ފުރާނަ ސަލާމަތްވީ އެވެ. މިއީ ޒަމާނީ އިންޖީނިއަރިންއިން އިންސާނާގެ ފުރާނަ ރައްކާތެރިކުރުމަށް ކޮށްފައިވާ މޮޅު މަސައްކަތުގެ މިސާލެކެވެ.
