ޓްރީ ޓޮޕް ހޮސްޕިޓަލްގެ އެންޑަކްރިނޮލޮޖީ ކޮންސަލްޓަންޓް ޑރ. ޖޯސެފް އެޗޯބޫ އޮޖޯބީ، 2026 ނޮވެމްބަރު 1 އިން ފެށިގެން މާލޭގައި ހުންނަ ޓީޓީއެޗް ކްލިނިކްގައި ބަލިމީހުން ބައްލަވަން ފަށްޓަވާނެކަން އެ ހޮސްޕިޓަލުން ބުނެފި އެވެ.
މިއީ މާލޭގައި ދިރިއުޅޭ ރައްޔިތުންނަށް ހުޅުމާލެއަށް ނުގޮސް، ޓްރީ ޓޮޕް ހޮސްޕިޓަލުގެ ފެންވަރުގެ ޚާއްޞަ ފަރުވާ ލުއިފަސޭހަކަމާއެކު ފޯރުކޮށްދިނުމަށް އެ ހޮސްޕިޓަލުން ކުރަމުންދާ މަސައްކަތުގެ ދަށުން ނިންމި ނިންމުމެކެވެ.
ޑރ. ޖޯސެފަކީ ހަކުރުބަލި މެނޭޖްކުރުމާއި، ތައިރޮއިޑް ބަލިތައް ދެނެގަނެ ފަރުވާދިނުމުގެ އިތުރުން، ބަރުދަން އިތުރުވުމާ ގުޅުންހުރި މައްސަލަތަކާއި ހޯރމޯންގެ ބަލިތަކަށް ފަރުވާދިނުމުގައި ބޮޑު ތަޖުރިބާއެއް ހާސިލުކުރައްވާފައިވާ ބޭފުޅެކެވެ. ޑރ. ޖޯސެފްގެ ފަރުވާގެ މައިގަނޑު އަސާސަކީ ކޮންމެ ބަލިމީހެއްގެވެސް ޞިއްޙީ ހާލަތަށް ވަކިވަކިން ރިޢާޔަތްކޮށް، ދިގުމުއްދަތުގެ ދުޅަހެޔޮކަމަށް އަމާޒުކޮށްގެން ފަރުވާގެ ޕްލޭންތައް އެކުލަވައިލުމެވެ.
އެންޑަކްރިނޮލޮޖީއަކީ ހަށިގަނޑުގެ ހޯރމޯންތަކާއި މެޓަބޮލިޒަމް ނިޒާމާ ގުޅުންހުރި ބަލިތައް މެނޭޖްކުރުމުގައި ވަރަށް މުހިންމު ދައުރެއް އަދާކުރާ ދާއިރާއެކެވެ. މީގެ ތެރޭގައި ލޭގައި ހަކުރު ހުންނަ މިންވަރު ކޮންޓްރޯލްކުރުމާއި، ހަށިގަނޑުގެ ހަކަތަ ހުންނަ މިންވަރާއި، ބަރުދަނަށް އަންނަ ބަދަލުތައް ހިމެނެއެވެ. މިފަދަ ބަލިތަކަށް އަވަސް ފަރުވާ ހޯދުމަކީ ބަލީގެ ސަބަބުން ކުރިމަތިވެދާނެ ނުރައްކާތަކުން ސަލާމަތްވެ، ދިރިއުޅުމުގެ ފެންވަރު ރަނގަޅުކުރުމަށް ކޮންމެހެން ބޭނުންތެރި ކަމެކެވެ. ޑރ. ޖޯސެފްގެ ކޮންސަލްޓޭޝަންތަކުގެ ތެރެއިން، ބަލިމީހާގެ ޞިއްޙީ ހާލަތު ފުރިހަމައަށް ވަޒަންކުރުމާއި، ދިގުމުއްދަތުގެ ބަލިތައް މެނޭޖްކުރުމުގެ އިރުޝާދުތަކާއި، ދިރިއުޅުމުގެ އާދަކާދައަށް ރިޢާޔަތްކޮށްގެން ފަރުވާގެ ކަންކަން ކުރިއަށް ގެންދެވޭނެއެވެ.
މާލޭގައި ހުންނަ ޓީޓީއެޗް ކްލިނިކްގައި ޑރ. ޖޯސެފް ބަލިމީހުން ބައްލަވާނީ ކޮންމެ ހޯމަ އަދި ބުރާސްފަތި ދުވަހެއްގެ ހެނދުނު 10:00 އިން މެންދުރު 01:00 އަށެވެ. މި ކްލިނިކް ހުންނަނީ މާލޭގެ ބުރުޒު މަގުގައި ހުންނަ މއ. ޗަމްޕާ ވިލާގައެވެ. މިއީ ދިގުމުއްދަތުގެ ބަލިތަކަށް ފަރުވާ ހޯދާ ފަރާތްތަކަށް ވަގުތު ސަލާމަތްކޮށްދީ، ފަސޭހަކަމާއެކު ޑޮކްޓަރަށް ދެއްކޭނެ އިންތިޒާމެކެވެ.
ޓީޓީއެޗް ކްލިނިކް މާލެއަކީ ހަމައެކަނި އެންޑަކްރިނޮލޮޖީގެ ހިދުމަތަށް ހާއްސަ ތަނެއް ނޫނެވެ. މި ކްލިނިކުން އިންޓަރނަލް މެޑިސިން، ފެމިލީ މެޑިސިން، އަދި ނިއުރޯސަރޖަރީ ފަދަ ޚާއްޞަ ބަލިތަކުގެ ކޮންސަލްޓޭޝަން ވެސް ލިބިވަޑައިގަންނަވާނެއެވެ. މީގެ އިތުރުން ފިޒިއޮތެރަޕީ، އޮކިއުޕޭޝަނަލް ތެރަޕީ، ސްޕީޗް އެންޑް ލެންގުއޭޖް ތެރަޕީ، އަދި އޯޑިއޮލޮޖީގެ ޚިދުމަތްތައް ވެސް މިތަނުން ފޯރުކޮށްދެއެވެ. އަދި ލެބޯރެޓަރީ ސާމްޕަލް ނެގުމުގެ ޚިދުމަތާއި، އެކި ކަހަލަ އަނިޔާތަކާއި އޮޕަރޭޝަންތަކަށް ފަހު ބޭނުންވާ ރިހެބިލިޓޭޝަންގެ ޚިދުމަތްތައް ވެސް މި ކްލިނިކުން ލިބެން ހުންނާނެއެވެ.
ޓީޓީއެޗް ކްލިނިކް މާލޭގެ އެންޑަކްރިނޮލޮޖީ ހިދުމަތްތަކާ ގުޅޭ އިތުރު މައުލޫމާތު ހޯއްދެވުމަށް ނުވަތަ އެޕޮއިންޓްމަންޓް ހެއްދެވުމަށް 3351610 އަށް ގުޅުއްވުން ނުވަތަ ހޮސްޕިޓަލުގެ ރަސްމީ އީމެއިލް އެޑްރެސް ކަމަށްވާ care@treetophospital.com އަށް މެސެޖު ކުރެއްވުމަށް ޓްރީ ޓޮޕް ހޮސްޕިޓަލުން އިރުޝާދު ދެ އެވެ.
