އާންމު ދިރިއުޅުމަށް އެނބުރި އައުމަށް އޮކިއުޕޭޝަނަލް ތެރަޕީގެ މުހިއްމު

"އޮކިއުޕޭޝަނަލް ތެރަޕީ" މި އިބާރާތް އިވުމުން، މިއީ ހަމައެކަނި ވަޒީފާގެ މާހައުލަށް އެނބުރި ރުޖޫއަވުމަށް ދެވޭ ފަރުވާއެއް ކަމަށް ގިނަ ބަޔަކަށް ގަބޫލުކުރެވެ އެވެ. ނަމަވެސް، މި ދާއިރާގައި "އޮކިއުޕޭޝަން" މާނަކުރެވެނީ އިންސާނާގެ އާންމު ދިރިއުޅުމުގެ އެންމެހައި ޒަރޫރީ ހަރަކާތްތަކަށެވެ. މީގެ ތެރޭގައި އަމިއްލައަށް ފޭރާންލުމާއި، ކެއިންބުއިމާއި، ލިޔެކިޔުމާއި، ތައުލީމު ހާސިލުކުރުމުގެ އިތުރުން ވަޒީފާ އަދާކުރުމާއި އިޖުތިމާއީ އަދި އާއިލީ ކަންކަމުގައި ޝާމިލުވުން ހިމެނެ އެވެ.

އެހެންކަމުން، ބައްޔެއްގެ ސަބަބުން ނުވަތަ ލިބޭ އަނިޔާއެއްގެ ސަބަބުން ނުވަތަ ހާއްސަ އެހީއަށް ބޭނުންވާ ފަދަ ހާލަތެއްގެ ސަބަބުން މިފަދަ ޒަރޫރީ ކަންކަން ކުރުމަށް ހުރަސްއެޅޭ ވަގުތުތަކުގައި، އަމިއްލަ ފައިމައްޗަށް ތެދުވެ، މިނިވަންކަމާއެކު ދިރިއުޅުމަށް ބޭނުންވާ ހުނަރުތައް އަލުން އަނބުރާ ހޯދައިދިނުމަށާއި، ތަރައްގީކުރުމަށް އަދި ދިމާވާ ހާލަތްތަކަށް ހޭނުމަށް އޮކިއުޕޭޝަނަލް ތެރަޕީން މުހިންމު ދައުރެއް އަދާކުރއެވެ.

އޮކިއުޕޭޝަނަލް ތެރަޕީގައި އިސްކަންދެނީ ކޮން ކަންކަމަށް؟

އޮކިއުޕޭޝަނަލް ތެރަޕީގެ މައިގަނޑު މަގުސަދަކީ، އާންމު ދިރިއުޅުމުގައި ކުރަންޖެހޭ އަދި ކުރަން ބޭނުންވާ އެންމެހައި ކަންކަން، އެހެން މީހެއްގެ އެހީތެރިކަމަކާ ނުލައި އަމިއްލައަށް ކުރުމުގެ ގާބިލުކަން އިތުރުކޮށްދިނުމެވެ. މި ތެރަޕީގެ އެހީގައި، ސްޓްރޯކް ޖެހިފައިވާ ފަރާތްތަކަށް އަމިއްލައަށް އަންނައުނު އެޅުމާއި، ކެއުމުގެ އިތުރުން ބަލީގެ އަސަރުކޮށްފައިވާ ގުނަވަންތައް ބޭނުންކޮށްގެން ދިރިއުޅުމުގެ ކަންކަން މިނިވަންކަމާއެކު ކުރުމުގެ ތަމްރީނު ދެވެ އެވެ. އަދި އުމުރުން ދުވަސްވީ މީހުންނަށް ކޮންމެ ދުވަހަކު ކުރަންޖެހޭ ކަންކަން ރައްކާތެރިކަމާއެކު އަމިއްލައަށް ކުރުމުގެ މަގު ފަހިކޮށްދިނުމުގެ އިތުރުން، ކުޑަކުދިންގެ ހެދިބޮޑުވުމުގައި ބޭނުންވާ ހަރަކާތްތެރިކަމާއި، ލިޔުމުގެ ހުނަރާއި، އަމިއްލަ ސާފުތާހިރުކަމާއި، އަދި ކުޅިވަރާއި ތައުލީމީ ހަރަކާތްތަކުގައި ފުރިހަމައަށް ބައިވެރިވުމަށް ބޭނުންވާ ފަންނީ އެހީތެރިކަން މި ފަރުވާގެ ތެރެއިން ފޯރުކޮށްދެވެ އެވެ.

ސަމުސަލެއްގައި ހިފުމާއި، ގަމީހުގެ ގޮށް އެޅުން ފަދަ އާދައިގެ ކަންކަން އަމިއްލައަށް ކުރުމަކީވެސް، އަމިއްލަ ނަފުސަށް އޮންނަ އިތުބާރު ބޮޑުވެ، އަމިއްލަ ފައިމައްޗަށް ތެދުވުމަށާއި ދިރިއުޅުމުގެ ފެންވަރު މަތިކުރުމަށް ލިބޭ ވަރަށް މުހިންމު ކުރިއެރުމެކެވެ. ހުލާސާކޮށް ދަންނަވާނަމަ، އޮކިއުޕޭޝަނަލް ތެރަޕީއަކީ ދުވަހުން ދުވަހަށް ކުރަންޖެހޭ މަސައްކަތްތަކާއި، ވަޒީފާއާއި ތައުލީމު، އަދި އިޖުތިމާއީ އަދި މުނިފޫހިފިލުވުމުގެ އެކިއެކި ކަންކަމުގައި ބައިވެރިވުމުގެ ހުނަރު ތަރައްގީކޮށްދޭ ފަރުވާއެކެވެ. މީގެ ނަތީޖާއެއްގެ ގޮތުން، ޖިސްމާނީ، ނަފްސާނީ، އިޖުތިމާއީ އަދި އިގުތިސާދީ ގޮތުން މުޖުތަމައުގައި ބިނާކުރަނިވި ދައުރެއް އަދާކުރުމުގެ ފުރުސަތު ފަހިވެގެންދެ އެވެ.

ފިޒިއޮތެރަޕީއާއި އޮކިއުޕޭޝަނަލް ތެރަޕީގެ ތަފާތަކީ ކޮބާ؟

އޮކިއުޕޭޝަނަލް ތެރަޕީއާއި ފިޒިއޮތެރަޕީއަކީ އެކުއެކީގައި މަސައްކަތްކުރާ ދެ ދާއިރާ ކަމަށް ވީނަމަވެސް، މި ދެ ފަރުވާގެ މައިގަނޑު އަމާޒު ތަފާތެވެ.

• ފިޒިއޮތެރަޕީ: މައިގަނޑު ގޮތެއްގައި ސަމާލުކަންދެނީ ހަށިގަނޑުގެ ހަރަކާތްތަކާއި، މަސްތަކުގެ ބާރުގަދަކުރުމަށާއި، އެއްތަނުން އަނެއްތަނަށް ހިނގާބިނގާވެ އުޅުމުގެ ގާބިލުކަމުގެ އިތުރުން ހަށިގަނޑުގެ ހަމަހަމަކަން (ބެލެންސް) ދެމެހެއްޓުމަށެވެ.
• އޮކިއުޕޭޝަނަލް ތެރަޕީ: ހާއްސަ އިސްކަމެއް ދެނީ ޖިސްމާނީ، ފިކުރީ ނުވަތަ ހެދިބޮޑުވުމުގައި ދިމާވާ ގޮންޖެހުންތަކުގެ ސަބަބުން، އާންމު ދިރިއުޅުމުގެ ޒަރޫރީ ބޭނުންތައް ފުއްދުމަށް ކުރިމަތިވާ ހުރަސްތައް ނައްތާލުމަށެވެ.

މިސާލަކަށް، ސްޓްރޯކެއް ޖެހިފައިވާ މީހަކަށް ފިޒިއޮތެރަޕީގެ އެހީގައި ހިނގުމާއި ހަށިގަނޑުގެ ބެލެންސް ރަނގަޅުކޮށްދޭއިރު، އޮކިއުޕޭޝަނަލް ތެރަޕީން އެހީތެރިވެދެނީ އެ ފަރާތުގެ އަތުގެ ހަރަކާތްތައް އަލުން ބޭނުންކޮށްގެން އަމިއްލައަށް ފޭރާންލުމާއި، ކެއިންބުއިމާއި އަދި ގޭތެރޭގެ ޒަރޫރީ މަސައްކަތްތައް އަމިއްލަ އިހުތިޔާރުގައި ކުރުމަށެވެ.

ބައްޔަކުން ނުވަތަ އަނިޔާއަކުން ރަނގަޅުވުމަށް އެހީތެރިވުން

ސްޓްރޯކް ޖެހުމާއި އެކި ބާވަތުގެ ޖިސްމާނީ އަނިޔާތަކުގެ ސަބަބުން، ދިރިއުޅުމުގެ އާންމު ކަންކަން ކުރުމުގެ ގާބިލުކަން ކުއްލިއަކަށް ގެއްލިގެން ހިނގައިދާނެއެވެ. މިފަދަ ހާލަތްތަކުގައި ހަށިގަނޑުގެ ވަރުދެރަވުމާއި، ގުނަވަންތަކުގެ ހަރަކާތްތައް އެއްހަމަކުރުމަށް ދަތިވުމުގެ އިތުރުން، ނާރުތަކަށް ލިބޭ ގެއްލުމުގެ ސަބަބުން ހަނދާން ބަލިވުމާއި، ކަންކަމަށް ސަމާލުކަން ދިނުމަށް ހުރަސްއެޅުން ފަދަ އުނދަގޫތައް މެދުވެރިވެއެވެ. އޮކިއުޕޭޝަނަލް ތެރަޕީގެ އެހީގައި މިފަދަ ހުނަރުތައް އަލުން ތަރައްގީކުރުމަށް ހާއްސަ ތަމްރީނުތައް ދެވެއެވެ. އަދި އެހެންމެ އާންމު ދިރިއުޅުމުގައި ކުރަންޖه‌ހޭ މަސައްކަތްތައް ފަސޭހަކަމާއެކު ކުރުމަށް އައު އުކުޅުތަކާއި ތަފާތު ވަސީލަތްތައް ބޭނުންކުރާނެ ގޮތް ދަސްކޮށްދެއެވެ. އެހެން މީހެއްގެ އެހީއަކާ ނުލައި އަމިއްލަ ޒަރޫރީ ބޭނުންތައް ފުއްދައިލުމުގެ ގާބިލުކަން ލިބުމަކީ އަމިއްލަ ނަފުސަށް އޮންނަ އިތުބާރު އިއާދަކޮށްދޭ ކަމެކެވެ.

ކުޑަކުދިންނަށް އޮކިއުޕޭޝަނަލް ތެރަޕީ

ކުޑަކުދިން ހެދިބޮޑުވަމުން އަންނައިރު ދިމާވާ އެކި ގޮންޖެހުންތަކުގެ ސަބަބުން، އެ ކުދިންގެ އާންމު ދިރިއުޅުމުގެ ހަރަކާތްތަކަށް ހުރަސްއެޅޭނަމަ، އޮކިއުޕޭޝަނަލް ތެރަޕީގެ ފަރުވާ ހޯދިދާނެ އެވެ. ކޮންމެ ކުއްޖެއްގެވެސް ހާއްސަ ބޭނުންތަކަށް ރިއާޔަތްކޮށް، އަތުގެ ހަރަކާތްތައް ހަރުދަނާކުރުމާއި، ރީއްޗަށް ލިޔުމާއި، އަމިއްލަ ޒަރޫރީ ކަންކަން ކުރުމުގެ އިތުރުން، ކުޅިވަރު ކުޅުމާއި، އިހުސާސްތައް ދެނެގަތުމުގެ ހުނަރު (ސެންސަރީ އިންޓެގްރޭޝަން) އަދި ސްކޫލުގެ ތަފާތު ހަރަކާތްތަކުގައި ބައިވެރިވުމަށް މި ތެރަޕީން އެހީތެރިވެދެ އެވެ. މީގެ މައިގަނޑު އަމާޒަކީ ކުއްޖާގެ ކުރިއެރުމަށް ހުރަސްއަޅާ ސަބަބުތައް ދެނެގަނެ، އެހެން މީހުންނަށް ބަރޯސާނުވެ އަމިއްލަ އިސްނެގުމުގައި ކަންކަން ކުރުމުގެ ގާބިލުކަން އިތުރުކޮށްދިނުމެވެ.

ޓްރީ ޓޮޕް ހޮސްޕިޓަލުގެ އޮކިއުޕޭޝަނަލް ތެރަޕީގެ ހިދުމަތް

ޓްރީ ޓޮޕް ހޮސްޕިޓަލުގެ ޗީފް ރިހެބިލިޓޭޓިވް ތެރަޕިސްޓް ރަމޭޝް ބާބޫ ވިދާޅުވި ގޮތުގައި، އެ ހޮސްޕިޓަލުގެ ރިހެބިލިޓޭޝަން ހިދުމަތްތަކުގެ ތެރޭގައި އޮކިއުޕޭޝަނަލް ތެރަޕީގެ ހާއްސަ ފަރުވާ ހިމެނެ އެވެ. މިއީ ބައްޔެއްގެ ސަބަބުން ނުވަތަ ލިބިފައިވާ އަނިޔާއެއްގެ ސަބަބުން ހަރަކާތްތެރިވުމުގައި ދަތިތައް މެދުވެރިވެފައިވާ ފަރާތްތަކަށާއި، އުނގެނުމާއި ހެދިބޮޑުވުމުގައި ގޮންޖެހުންތަކާ ކުރިމަތިލާންޖެހިފައިވާ ކުޑަކުދިންނާއި ބޮޑެތި މީހުންނަށް، ދިރިއުޅުމުގެ ކަންކަން އަމިއްލައަށް ފުރިހަމަކުރުމަށް އެހީތެރިވެދިނުމުގެ ގޮތުން ދެވޭ ފަރުވާއެކެވެ.

ރަމޭޝް ފާހަގަކުރެއްވި ގޮތުގައި، މި ހިދުމަތް ފޯރުކޮށްދެވެނީ ފަރުވާ ހޯދާ ފަރާތުގެ ބޭނުންތަކަށް ރިއާޔަތްކޮށް، ފިޒިއޮތެރަޕީ، ސްޕީޗް ތެރަޕީ އަދި އެހެނިހެން ކަމާގުޅޭ ހާއްސަ ފަރުވާތައް އެކުލެވޭ ފުރިހަމަ ރިހެބިލިޓޭޝަން ޕްލޭނެއްގެ ދަށުންނެވެ. އަދި ހޮސްޕިޓަލުގެ މައިގަނޑު އަމާޒަކީ، ބަލިމީހުންގެ ބޭނުންތަކަށް އިސްކަންދީގެން، ޒަމާނީ އަދި ފުރިހަމަ ފަރުވާގެ ނިޒާމެއް މެދުވެރިކޮށް އެ ފަރާތްތަކުގެ މިނިވަންކަމާއި ގާބިލުކަން އިތުރުކޮށްދިނުމެވެ. ރަމޭޝް އިތުރަށް ވިދާޅުވީ، ހުޅުމާލޭގައި ހުންނަ ޓްރީ ޓޮޕް ހޮސްޕިޓަލުގެ އިތުރުން، މާލޭގައި ހުންނަ ޓީ.ޓީ.އެޗް ކްލިނިކުން ވެސް އޮކިއުޕޭޝަނަލް ތެރަޕީއާއި ރިހެބިލިޓޭޝަންގެ ހިދުމަތްތައް ފަސޭހަކަމާއެކު ލިބިވަޑައިގަންނަވާނެ ކަމަށެވެ. މި ހިދުމަތްތަކަށް އެޕޮއިންޓްމަންޓް ހެއްދެވުމަށް ޓްރީ ޓޮޕް ހޮސްޕިޓަލުގެ ނަންބަރު 3351610 އަށް ގުޅުއްވުމުން އެ އިންތިޒާމު ހަމަޖެހިގެންދާނެއެވެ.