މި ސަރުކާރުން ލާމަރުކަޒީ ގާނޫނު ހަނިކުރަން ގެނައި ބަދަލުގެ ބޭނުންކޮށްގެން ކުޅުދުއްފުށީ އިންޑަސްޓްރިއަލް ޒޯން ހިމެނޭ ބިން ސިޓީ ކައުންސިލްގެ އިހުތިސާސުން ވަކިކޮށް ސަރުކާރަށް ނަގައިފި އެވެ.
ފިނޭންސް މިނިސްޓްރީން ބުނީ ކުޅުދުއްފުށީ އިންޑަސްޓްރިއަލް ޒޯން ހިމެނޭ ބިން ކައުންސިލްގެ އިހުތިސާސުން ވަކިކުރީ ކުޅުދުއްފުށީ ސީޕޯޓް ފުޅާކުރުމުގެ މަޝްރޫއަށް އެ ބިން ބޭނުންވާތީ ކަމަށެވެ.
ކޮންޓެއިނަރާއި ޖެނެރަލް ކާގޯ ހޭންޑަލްކުރާ މި މަލްޓި ޕާޕަސް ޕޯޓު ފުޅާ ކުރުމުގެ މަޝްރޫއުގެ ދަށުން ކީ ވޯލް ބޭރަށް ދިގުކޮށް، އެތަން ފުންކުރުމުގެ އިތުރުން ބަނދަރު ފުންކޮށް، ބޮޑެތި ބޯޓުތަކަށް ހިދުމަތް ދެވޭ ވަރަށް ޕޯޓު ފުޅާކުރުމަށް ވަނީ ހަމަޖެހިފަ އެވެ.
ޕޯޓު ފުޅާކުރުމުގެ މަޝްރޫއުގެ ދަށުން ކުޅުދުއްފުށި އިންޑަސްޓްރިއަލް ޒޯނުގައި އެންކާ ސާވިސް މެދުވެރިކޮށް ގެނެވޭ ކޮންޓެއިނަރުތައް ސަރަހައްދަށް ބަހާލާ ޑިސްޓްރިބިއުޝަން ސެންޓަރެއްގެ ގޮތުގައި ބޭނުންކުރުމާއި އެތަނުގައި ފްރީ ޒޯން ހިދުމަތާއި ވެއާ ހައުސިން އަދި ބޮންޑެޑް ވެއާ ހައުސިން އެ ބިމުގައި ގާއިމުކުރުން ހިމެނެ އެވެ.
ކުޅުދުއްފުށީ އިންޑަސްޓްރިއަލް ޒޯނު ހުރި ބިމުގައި މިވަގުތު އެސްޓީއޯގެ ނޯތު ޑިސްޓްރިބިއުޝަން ސެންޓަރު ހިންގުމަށް ދޫކޮށްފައިވާ ބިމަކާއި ކޯލްޑް ސްޓޯރޭޖް ގާއިމުކުރުމަށް ހޭންޑީ ހޯލްޑިންގްސް ޕްރައިވެޓް ލިމިޓެޑަށް ދޫކޮށްފައިވާ ބިމެއް ހިމެނެ އެވެ.
މި މަޝްރޫއާ ގުޅޭގޮތުން އެއްވެސް ހިޔާލެއް ނުވަތަ ޝަކުވާއެއް ހުށަހެޅުމަށް އެއްވެސް މީހަކު ބޭނުންވާނަމަ މިއަދުން ފެށިގެން 14 ދުވަހުގެ ތެރޭގައި އެކަން ފިނޭންސަށް ލިޔުމުން ހުށަހަޅަން ވަނީ އެދިފަ އެވެ.
މި ސަރުކާރުން ލާމަރުކަޒީ ގާނޫނު ބަދަލުކުރީ ރުކާރުގެ މަޝްރޫއުތައް ހިންގުމަށް ޓަކައި ކައުންސިލެއްގެ އިހުތަސާސްގެ ތެރޭގައި ހިމެނޭ ބިމެއް ނުވަތަ ތަނެއް ވަކިކުރުމަށް ވަޒީރުންގެ މަޖިލީހުން ނިންމުމަށް ފަހު، ކައުންސިލުގެ މިލްކިއްޔާތުން އެ ތަނެއް ވަކިވާނެ ކަމަށެވެ. އަދި، އެ ތަނަކީ ދައުލަތުގެ ފުރިހަމަ ބާރު ހިނގާ ބިމާއި ތަންތަނަށް ވެގެން ދާނެ އެވެ.
ހަމަ އެހެންމެ، ރަށްރަށުގެ ފިޒިކަލް ޑިވެލޮޕްމަންޓު ޕްލޭން ފާސްކުރުމުގެ ކުރިން ވެސް ސަރުކާރުން ތަރައްގީގެ މަޝްރޫއުއެއް ހިންގަން ބިމެއް ހޯދަން އެދޭ ހާލަތްތަކުގައި އެ ބިން ސަރުކާރާ ހަވާލުކުރަން ޖެހެ އެވެ.
މި ބަދަލުތަކާ ދެކޮޅު ހަދާ އާންމު ރައްޔިތުންނާއި އިދިކޮޅު ފަރާތްތަކުން އޭރު ބިންތައް އަތުލެވޭ ބިލަށް ދީފައި ވަނީ "ބިން ފޭރޭ ބިލު" ގެ ނަމެވެ. އިދިކޮޅާއި އާންމު ގިނަ ރައްޔިތުން ބުނަމުންދަނީ ލާމަރުކަޒީ ގާނޫނަށް ބަދަލުތައް ގެންނަމުންދަނީ އެ ނިޒާމު ބަލިކަށި ކުރުމަށެވެ.
