ވައްކަމުގެ މައްސަލައެއްގައި މޫނު ބުރުގާ އަޅައިގެން އުޅުނު ބިދޭސީ ފިރިހެނަކު ހައްޔަރުކޮށްފި އެވެ.
މި މައްސަލައި ހައްޔަރުކުރީ އިންޑިއާއަށް ނިސްބަތްވާ ޝާހުލް ޔެހަޔާ އަބްދުލްރަޖާކު އެވެ. އޭނާގެ ބަންދަށް ހަތް ދުވަސް ވަނީ ޖަހާފަ އެވެ.
މުއްދަތު މަޖިލީހަށް ފުލުހުން ހުށަހެޅި ހާދިސާ ރިޕޯޓުގައި ބުނެފައިވަނީ ޝާހުލް ޔެހަޔާ މޫނު ބުރުގާ އަޅައިގެން ދަބަހެއް ހިފައިގެން އުޅެނިކޮށް ފުލުހުން ވާހަކަ ދެއްކުމުން ފިލަން ދުވި ކަމަށެވެ.
ޝާހުލް ޔެހަޔާ ބަންދުގައި ބަހައްޓަން ކޯޓުން އަމުރުކުރީ އޭނާއަކީ ބިދޭސީއަކަށްވެފައި، ތުހުމަތަށް ފިލުމުގެ ގޮތުން ރާއްޖެއިން ފުރައިގެން ދިޔުމުގެ ފުރުސަތު އޮތުމުން ކަމަށް ބުނެ އެވެ.
މި އަހަރު ތެރޭގައި ފުލުހުންނަށް އެންމެ ގިނައިން ހުށަހެޅިފައިވަނީ ވައްކަމުގެ މައްސަލަ އެވެ. އެގޮތުން މި އަހަރު މިހާތަނަށް 2،893 ވައްކަމުގެ މައްސަލަ ފުލުހުންނަށް ރިޕޯޓުކޮށްފައިވެ އެވެ.
