ލަންޑަން (އޮކްޓޫބަރު 31) - އިނގިރޭސި ޕްރިމިއާ ލީގުގައި މިރޭ ޗެލްސީ އަތުން 2-0 އިން ބަލިވެ، މެންޗެސްޓާ ޔުނައިޓެޑްގެ ހާލަތު އިތުރަށް ގޯސްވެއްޖެ އެވެ.
ޗެލްސީ އަތުން ޔުނައިޓެޑަށް ބަލިވުމާ އެކު، 1988-1989 އަހަރަށް ފަހު ފުރަތަމަ ފަހަރަށް ޔުނައިޓެޑުން މި ވަނީ މޮޅެއް ނުލިބި ޖެހިޖެހިގެން ނުވަ މެޗު ނިންމާލައިފަ އެވެ. މިއީ، މިދިޔަ 40 އަހަރު ތެރޭގައި ޔުނައިޓެޑަށް ލީގުގައި އެންމެ ދަށް ފެށުމެވެ. އަދި، މިދިޔަ 38 އަހަރު ތެރޭ އައި އެންމެ ދަށް ފޯމެވެ.
ޗެލްސީ މެޗުގެ ނަތީޖާއާ އެކު ޔުނައިޓެޑް އޮތީ 16 ވަނައިގަ އެވެ. އެއީ، ނުވަ މެޗުން ލިބުނު ހަތް ޕޮއިންޓާ އެކު އެވެ. އަދި، ޗެލްސީ ވަނީ ނުވަ މެޗުން 16 ޕޮއިންޓް ހޯދައި، ހަތަރު ވަނަ އަށް ޖެހިލައިފަ އެވެ.
ސްޓެމްފޯޑް ބްރިޖުގައި ކުޅުނު މެޗުގެ ފުރަތަމަ ހާފުގައި ޗެލްސީގެ ބްރެޒިލް ވިންގް އެސްޓެވާއޯގެ ފަރާތުން ރަނގަޅު ކުޅުމެއް ފެނިގެންދިޔަ އެވެ. މި ހާފުގައި ޔުނައިޓެޑްގެ މަޓެއުސް ކޫންޏާ ޖެހި ގޯލެއް ވަނީ ވީޑިއޯ އެސިސްޓަންޓް ރެފްރީ (ވީއޭއާރް) އިން އޮފްސައިޑް ކަމަށް ނިންމައިފަ އެވެ. އަދި، ޔުނައިޓެޑަށް ލީޑުނަގައިދޭން، އަމަދު ޑިއާލޯ އަށް ރަނގަޅު ދެ ފުރުސަތަކާއި ބްރޫނޯ ފެނާންްޑޭސް އަށް ވެސް ފުރުސަތެއް ލިބި. ބޭނުމެއް ނުކުރެވުނެވެ.
ޗެލްސީން މި މެޗުގައި ލީޑުނެގީ ދެ ވަނަ ހާފުގެ ފަސް ވަނަ މިނިޓްގަ އެވެ. މިއީ، މެޗުގެ 50 ވަނަ މިނިޓްގައި މޯގަން ރޮޖާސް ޖެހި ގޯލެކެވެ. ޗެލްސީގެ ރޮމެއޯ ލަވިއާ ދިން ބޯޅަ ހިފައިގެން އޭރިއާތެރެއަށް ވަދެ، ރޮޖާސް ވަނީ ހަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ޔުނައިޓެޑަށް މި މެޗުގައި އެންމެ ބޮޑު މައްސަލަ އެއް ދިމާވީ، 63 ވަނަ މިނިޓްގައި އެ ޓީމުގެ ޑިފެންޑަރު، ލިސަންޑްރޯ މާޓިނޭޒަށް ރަތެއް ދެއްކުމެވެ. އޭނާ އަށް ދެ ވަނަ ރީނދޫ ކާޑާ އެކު ރަތެއް ދެއްކީ ޗެލްސީގެ ވެސްލީ ފޮފާނާ އަށް ނުރައްކާތެރި ފައުލެއް ކުރުމުން، ވީއޭއާރް އިން އަންގައިގެން ދަނޑު ކައިރީގައި ހުރި މޮނީޓަރުން ވެސް ބަލައިފަ އެވެ. އެ ފައުލަށް ދިން ޕެނަލްޓީން ޗެލްސީގެ ލީޑުފުޅާކޮށްދިނީ ކޯލް ޕާމާ އެވެ.
ޗެލްސީ އަށް މެޗުގެ 71 ވަަނަ މިނިޓްގައި، ޕާމާ ދިން ބޯޅައަކުން އެސްޓެވާއޯ ވަނީ ތިން ވަނަ ލަނޑެއް ޖަހައިފަ އެވެ. އެކަމަކު، ވީއޭއާރް އިން ނިންމީ އޮފްސައިޑް ކަމަށެވެ. އޭގެ ފަހުން، އެސްޓެވާއޯ ޖެހި ޝޮޓެއް ޔުނައިޓެޑްގެ ކީޕަރު ސެން ލަމެންސް ވަނީ މަތަކޮށްފަ އެވެ. އަދި، ޔުނައިޓެޑްގެ ބްރަޔަން އެމްބެއުމޯ ޖެހި ބޯޅައެއް ޗެލްސީގެ ކީޕަރު، މައިކް ޕެންޑާސް ވަނީ މަތަކޮށްފަ އެވެ.
މި ސީޒަނުގައި މިހާތަނަށް ޔުަނައިޓެޑުން ކުޅުނު 13 މެޗުގެ ތެރެއިން މޮޅުވީ ދެ މެޗުންނެވެ. އެއީ، ޕްރިމިއާ ލީގުަގައި އިޕްސްވިޗް ޓައުން އަތުންނާއި ޗެމްޕިއަންސް ލީގުގައި އަޒަރުބައިޖާންގެ ސަބާ އަތުންނެވެ.
