ލިވަޕޫލް (އޮކްޓޫބަރު 25) - އިނގިރޭސި ޕްރިމިއާ ލީގުގައި މިރޭ ލިވަޕޫލުން 2-0 އިން ބްރައިޓަން ހޯލްވް އެންޑް އަލްބިއަން އަތުން މޮޅުވިއިރު، ބޯންމައުުތުން މެންޗެސްޓާ ޔުަނައިޓެޑް ދަނޑުގައި 3-0 އިން އެ ޓީމު ބަލިކޮށްފި އެވެ.
މިއީ، މި ފަހަރު ޕްރިމިއާ ލީގުގައި ލިވަޕޫލުން އަމިއްލަ ދަނޑުގައި މޮޅުވި ފުރަތަަމަ މެޗެވެ. މި މެޗުގައި ލިވަޕޫލުން ޖެހި ދެ ގޯލު ވެސް ކާމިޔާބުކުރީ ފުރަތަަމަ ހާފުގަ އެވެ.
އެންފީލްޑް ސްޓޭޑިއަމްގައި ކުޅުނު މެޗުގައި ބްރައިޓަން އަށް ލީޑުނަގައިދޭން އެ ޓީމުގެ ޔާސީން އަޔާރީ އަށް ހުސްކޮށް ލިބުނު ފުރުސަތެއްގައި ފޮނުވާލި ޝޮޓް ދިޔައީ ހުރަސްދަނޑިމަތިންނެވެ. ބްރައިޓަން އިން ލިބުނު ފުރުސަތު ނަގާލުމުގެ ނަތީޖާ ފެނުނީ ހިތިކޮށެވެ. މެޗުގެ 17 ވަނަ މިނިޓްގައި ލަނޑު ޖަހައި ލިވަޕޫލުން ލީޑުނެގީ އެވެ. މި ލަނޑަކީ ބްރައިޓަންގެ ޕަސްކާލް ގްރޮސް އަތުން ބައިކޮޅަށް ވަން ގޯލެކެވެ. ބްރައިޓަން އޭރިއާތެރެއިން ލިވަޕޫލްގެ ފްލޯރިއަން ވާޓްޒް ޖެހި ޝޮޓެއް ގޯލަށް ވަނީ ގްރޮސް ފައިގައި ޖެހިފަ އެވެ.
ފުރަތަމަ ގޯލު ޖެހުމަށް ފަހު ލިވަޕޫލުން ފަހަތަށް ނުޖެހި އެޓޭކްކުރުމުގެ ފައިދާ އެ ޓީމަށް ކުރި އެވެ. މެޗުގެ 21 ވަނަ މިނިޓްގައި ލިވަޕޫލުން ދެ ވަނަ ލަނޑު ޖެހި އެވެ. މިއީ، ބްރެޑްލީ ބާކޮލާ ދިން ބޯޅައަކުން އަލެކްސަންޑަ އިސާކް ޖެހި ގޯލެކެވެ. މިއީ، މި ފަހަރު ލީގުގައި އިސާކްގެ ހަ ވަނަ ގޯލެވެ.
މި ނަތީޖާއާ އެކު، ލިވަޕޫލުން ވަނީ ލީގުގެ ހަތަރަކަށް ޖެހިލައިފަ އެެވެ. ހަތަރެއްގައި އޮތް ލިވަޕޫލަށް އަށް މެޗުން ވަނީ 15 ޕޮއިންޓް ލިބިފަ އެެވެ. ބްރައިޓަން، ތިން ވަނައިގައި އޮތީ އަށް މެޗުން 16 ޕޮއިންޓް ހޯދައިގެންނެވެ.
ޕްރެޝަރު ބޮޑުވެފައިވާ ޔުނައިޓެޑުން މިރޭގެ މެޗަށް އަމިއްލަ ދަނޑުގައި ނުކުތީ އެ ޓީމުގެ ކެޕްޓަން، ބްރޫނޯ ފެނާންޑޭސް ނުލަ އެވެ. ފެނާންޑޭސް، ފުރަތަމަ އެގާރަ އަށް ނުލައި ފެށީ، އެ ޓީމުގެ ކޯޗު މައިކަލް ކެރިކްގެ ރޭވުންތެރިކަމަށް ފާޑުކިޔުމަށް ފަހު، ކްލަބްގެ އެކި ފަރާތްތަކަށް ނިސްބަތްވާ ގޮތަށް ދިން އިންޓަވިއުއެއްގެ މައްސަލައިގަ އެވެ.
މި މެޗަށް ނުކުތްއިރު، ލީގުގެ ރެލިގޭޝަނުގައި އޮތް ބޯންމައުތުން ވަނީ ފުރަތަމަ ހާފުގައި ވެސް ޔުނައިޓެޑް ކޮޅަށް ދެ ގޯލުގެ ލީޑެއް ނަަގައިފަ އެވެ. މެޗުގެ 38 ވަނަ މިިނިޓްގައި ޖަސްޓިން ކްލައިވަޓް ދިން ބޯޅައަކުން ބޯންމައުތަށް ލީޑުނަގައިދިނީ ރަޔާން އެވެ. އަދި، އޭގެ ފަސް މިނިޓް ފަހުން، ބޯންމައުތުން ދެ ވަަނަ ލަނޑު ޖެހި އެވެ. މިއީ، ޔުނައިޓެޑްގެ ޑިފެންޑަރު، ލެނީ ޔޯރޯ ހެދި ގޯހެއްގެ ފައިދާނަގައިގެން ތަނަވަސްކުރި ފުރުސަތެއްގައި އެޑްރިއަން ޓްރުފެއާ ދިން ބޯޅައަކުން މި ލަނޑު ޖެހީ މާކަސް ޓަވެނިއާ އެވެ.
ދެ ވަނަ ހާފުގައި ޔުނައިޓެޑްގެ ކީޕަރު، ސެން ލަމެންސް ހެދި ގޯހެއްގެ ފައިދާނަގައި، ޔުނައިޓެޑް ކޮޅަށް ބޯންމައުތުގެ ތިން ވަަނަ ލަނޑު ޖެހީ އެވަނިލްސަން އެވެ. މި މެޗުން ބަލިވެ، ޔުނައިޓެޑް މި ވަނީ މޮޅެއް ނުލިބި ޖެހިޖެހިގެން އަށް ވަަނަ މެޗު ނިންމާލަން ޖެހިފަ އެވެ. މިއީ، 1986 ގެ ފަހުން، ޔުނައިޓެޑްގެ އެންމެ ދަށް ފޯމެވެ.
މި ނަތީޖާއާ އެކު، ޔުނައިޓެޑް އޮތީ އަށް މެޗުން ހަތް ޕޮއިންޓާ އެކު ލީގުގެ 16 ވަނައިގަ އެވެ. ބޯންމައުތު ވަނީ މި މެޗުން ތިން ޕޮއިންޓް ހޯދައި، އަށް މެޗުން ނުވަ. ޕޮއިންޓާ އެކު، 13 ވަނަ ހޯދައިފަ އެވެ.
ލީގުގައި މިރޭ ކްރިސްޓަލް ޕެލަސް ދަނޑުގައި ނިއުކާސަލް ޔުނައިޓެޑް ވަނީ 2-0 އިން މޮޅުވެފަ އެވެ. އަދި، ބްރެންޓްފޯޑް ވަނީ 1-1 އިން ހަލް ސިޓީއާ އެއްވަރުކޮށްފަ އެވެ.
