ދިވެހި ރައްޔިތުންގެ ހިޔާލެއް މަޝްވަރާއެއް ނުހޯދައި ރަސްމާލެ މަޝްރޫއު ޔޫއޭއީގެ އީގަލް ހިލްސް ކުންފުންޏާ ހަވާލުކުރަން ނިންމައިފި ނަމަ، އެމްޑީޕީގެ ސަރުކާރެއްގައި އެ އެއްބަސްވުން ބާތިލުކުރާނެ ކަމަށް އެ ޕާޓީގެ ކުރީގެ ޗެއާޕާސަން، ފައްޔާޒު އިސްމާއިލް ވިދާޅުވެއްޖެ އެވެ.
އަދަދު ނޫހުން ގެނެސްދޭ "ފެންނަނުފެންނަ" ޕްރޮގްރާމުގައި ވާހަކަ ދައްކަވަމުން ފައްޔާޒު ވިދާޅުވީ ރަސްމާލެ މަޝްރޫއު ކުރިއަށް ގެންދަން ސަރުކާރުން މިހާރު ނިންމާފައިވާ ގޮތަށް ތާއީދު ނުކުރައްވާ ކަމަށެވެ.
"ރައީސް މުއިއްޒު އެބަޖެހޭ ދިވެހިރައްޔިތުންގެ ކައިރީގައި އަހަން، ދިވެހިރައްޔިތުން ބޭނުންވަނީ ކިހިނެއްތޯ؟ އަދި މިކަމަށް ޑިބޭޓުކުރުމުގެ ފުރުސަތު ހުޅުވައިލަން އެބަޖެހޭ މިކަމުގެ ކަންބޮޑުވުން ހުރި ފަރަާތްތަކަށް އެ ކަންބޮޑުވުމުގެ ވާހަކަތައް ގެނެވޭނެ ގޮތެއް އެބަ ގެންނަންޖެހޭ. އެ ހުރިހާ ކަމެއް ކޮށްފައި ނޫނިއްޔާމުން ގާނޫނުއަސާސީއަށް ބަދަލު ގެނެސްގެން ނުވާނެ، މިކަން ކުރިއަށް ގެންގޮސްގެން ނުވާނެ،" ފައްޔާޒް ވިދާޅުވި އެވެ.
"އަޅުގަނޑު މި ދަންނަވާ ވާހަކައަކީ އެފަދަ ގޮތަކަށް ރައްޔިތުންގެ ބަހެއް ނުހޯދައި މިކަންކޮށްފި ކަމަށްވަންޏާމުން އަޅުގަނޑުމެންގެ ސަރުކާރެއް އުފެދިއްޖެ ކަމަށްވަންޏާމުން އޭތި ރިވޯކު ކުރާނެ ވާހަކަ ވަރަށް ސާފުކޮށް މި ދަންނަވަނީ."
ފައްޔާޒް ވިދާޅުވީ ފޮރިން އިންވެސްޓްމެންޓުތަކާ ވެސް އަދި، ޔޫއޭއީއާ ވެސް އޭނާގެ އެއްވެސް މައްސަލައެއް ނެތް ކަމަށެވެ. ނަމަވެސް، އެއްވެސް އެކުއިޒިޝަން ކޮސްޓެއް ނެތި، ބޭރުގެ ބަޔަކަށް ރާއްޖޭގެ ބިން ދާއިމަށް ދޭން ސަރުކާރުން ނިންމާފައިވާ ނިންމުމާ ދެކޮޅުކަމަށް ފައްޔާޒް ވިދާޅުވި އެވެ.
ރަސްމާލޭގެ ބިމުން އީގަލް ހިލްސްއަށް ދޭ ބައިގައި ތަރައްގީކުރާ ޕްރޮޕާޓީތައް ދެވަނަ ނުވަތަ ތިންވަނަ ފަރާތަކަށް ވިއްކާއިރު، 99 އަހަރު އަލުން ގުނަން ފަށާ ގޮތަށް އޮތް އޮތުމަކީ ސަރުކާރުން ކިތަންމެ ބޭނުންވީ ނަމަވެސް، އެގްރީމެންޓުގައި ބަޔާންކުރާ ވަކި ހަމަތަކެއްގެ މަތިން ނޫނީ ހުއްޓުވޭނެކަމެއް ނޫންކަމަށް އޭނާ ވިދާޅުވި އެވެ.
ފައްޔާޒް ވިދާޅުވީ ރަސްމާލެ މަޝްރޫއު މިހާރު ކުރިއަށް ގެންދަން ނިންމާފައިވާގޮތުން، ރާއްޖޭގެ ސިޓިޒަންޝިޕް ނުލިބޭ ބަޔަކަށް، މި ތަނުގެ ރަށްވެހިކަމުގެ ހައްގުތަކެއް އުފަންވުމުގެ ފުރުސަތު އެބަ އޮތް ކަމަށާއި އެއީ ވަރަށް ބޮޑު ކަންބޮޑުވުމެއް ކަމަށެވެ.
"މަޑުމަޑުން އެ މީހުން މި ތަނުގައި ދިރިއުޅެމުންދާއިރުގައި އެ އެމީހުންގެ ހައްގުތަކެއް އެ ބިމަށް އެއޮއް އުފެދެމުން ދަނީ، ދުނިޔޭގެ ބޮޑެތި ގައުމުތަކަށް ނިސްބަތްވާ އެތައް ބަޔަކު އެ ތަނުގައި ވަޒަންވެރިވެ ތިބޭއިރުގައި ވަރަށް ފަސޭހަވާނެ އަޅުގަނޑުމެން ކަހަލަ ކުޑަކުޑަ ގައުމެއްގެ މައްޗަށް މަޖުބޫރުުކުރަން، އެ މީހުންގެ ހައްގުތަކެއް މިތަނަށްވެޔޭ، އެ މީހުންގެ ދީން މި ތަނުގައި އެ މީހުންނަށް ޕްރެކްޓިސް ކުރެވެންޖެހެޔޭ،" ފައްޔާޒް ވިދާޅުވި އެވެ.
"މިހާރު އެ ބުނާ ގޮތަށް އެކަންވެއްޖެއްޔާ އެއީ ޔަގީނުން ވެސް ވާނެކަމެއް."
ރަސްމާލެ މަޝްރޫއުއާ ދެކޮޅު ވަނީ އެ ސަބަބުތައް އެހެން ހުރުމުން ކަމަށް ފައްޔާޒް ވިދާޅުވި އެވެ. އަދި، އެފަދަ މައްސަލަތަކެއް ފެންނާން ހުއްޓައި، އެ މަޝްރޫއު ކުރިއަށް ގެންދަން ސަރުކާރުން ނިންމަންޖެހޭނީ އާންމު ރައްޔިތުންގެ ހިޔާލު ހޯދައިގެން ކަމަށް އޭނާ ވިދާޅުވި އެެވެ.
"އީގަލް ހިލްސްއަށް ވެސް އަޅުގަނޑުމެން މިކަން އަންގާނަން، މިއޮތް ބާކީ ދެ އަހަރު އެއްވެސް މަގުބޫލުކަމެއް ނެތް ސަރުކާރަކުން އެ ކުރާކަމުގައި އެ ބޭފުޅުން ބައިވެރިވެއްޖެކަމަށްވަންޏާމުން ދިވެހިރައްޔިތުން ތިބި ގޮތް އެނގެޔޭ ތި ކުރަނީ ބަދަލުދިނުމުގައި ވެސް، ބަދަލެއް ވެސް ނުލިބޭނެޔޭ އަސްލުގައި،" ފައްޔާޒް ވިދާޅުވި އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 11، ގަ އެވެ. އެއީ ރާއްޖޭގެ ޖުމްހޫރީ ދުވަހެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
