ދިވެހިރައްޔިތުންގެ ބަހެއް ނެތި ޣައިރު ދީންތަކުގެ މީހުން ރަސްމާލޭގައި ވަޒަންވެރިކުރުވަން ސަރުކާރުން މަސައްކަތްކުރާތީ އެކަމާ ދެކޮޅު ޝުއޫރުތައް ލިޔެ މާލޭގެ މަގުތަކުގައި ދަމާފައިވާ ބެނާތައް ކަނޑަމުން ދިޔަ ދެ ފިރިހެނަކު، އާންމުންގެ އެހީތެރިކަމާއެކު ފުލުހުންގެ ބެލުމުގެ ދަށަށް ގެންގޮސްފި އެވެ.
މައުލޫމާތު ލިބިފައިވާ ގޮތުގައި، އެ ދެ މީހުން ބެނާތައް ކަނޑަމުން ދިޔައީ ދަނޑިއެއްގައި ތޫނު އެއްޗެއް ހަރުކޮށްގެންނެވެ. އެ މަންޒަރު ފެނުނު އާންމުންގެ ބަޔަކު ސައިކަލުގައި އެ މީހުންގެ ފަހަތުން ގޮސް، ފުލުހުންގެ އެހީތެރިކަމަށް އެދުމުން އެ ދެ މީހުން ހައްޔަރުކުރީ ރޭގެ މެންދަމުގެ ވަގުތެއްގައި ކަމަށް މަންޒަރު ފެނުނު ބައެއް މީހުން އަދަދު ނޫހަށް ބުންޏެވެ.
މި މައްސަލައާ ގުޅޭ ގޮތުން ފުލުހުންގެ ރަސްމީ ބަހެއް ނުބުނެ އެވެ.
ނަމަވެސް، ކުރީގެ މިނިސްޓަރު އަދި ޕީއެންއެފްގެ ސެކްރެޓަރީ ޖެނެރަލް މުހައްމަދު މަލީހު ޖަމާލު 'އެކްސް' ގައި ކުރެއްވި ޕޯސްޓެއްގައި ވިދާޅުވީ، ރަސްމާލެ ވިއްކުމާ ދެކޮޅު ބެނާތައް ކެނޑި ދެ މީހުން އަތުލައިގެންފައިވާ ކަމަށާއި، ބެނާތައް ކަނޑަން ގެންގުޅުނު ދަނޑި ވެސް ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.
ފުލުހުންނަށް ޝުކުރު އަދާކުރައްވަމުން މަލީހު ވަނީ، އެ މީހުން ލައްވައި ބެނާތައް އަލުން ދަމައިދިނުމަށާއި، އެކަމަށް ފަންޑުކުރި ސަރުކާރުގެ އިސްވެރިން ހޯދައިދިނުމަށް ފުލުހުންގެ ކިބައިން އެދިވަޑައިގެންފަ އެވެ.
މީގެ އިތުރުން، ސޮބާހު ރަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، ރަސްމާލެ އަލައްބާރަށް ދިނުމާ ދެކޮޅަށް ރައްޔިތުން އަޑުއުފުލުމަށް ދެމި ބެނާތައް ކަނޑާ ވައްޓާލާފައިވާ ކަމަށެވެ. އަދި 500 ހެކްޓަރު ދޭ ގާނޫނު ފާސްނުވެ، އެއްބަސްވުމުގައި ސޮއިނުކުރެވި އުޅެނިކޮށް ނުފޫޒު ފޯރާފައި އޮތް މިންވަރު މިކަމުން ހާމަވާ ކަމަށާއި، ވަޒަންވެރިވުމުން ކަންތައް ކުރާނެ ގޮތާ މެދު ވިސްނާލުމަށް އޭނާ ގޮވާލެއްވި އެވެ.
މީގެ އިތުރުން ވެސް ބައެއް މީހުން މިކަމަށް ފާޑުކިޔާފައިވެ އެވެ.
ރަސްމާލެ ވިއްކާލާތީ އާންމު ރައްޔިތުންގެ އޮތް ނުރުހުން ފާޅުކުރުމަށާއި، ހިޔާލު ހޯދުމުގެ ވޯޓަކަށް ނުގޮސް ރަސްމާލެ ވިއްކާލުމާ ދެކޮޅަށާއި ގައިރު ދީންތަކުގެ މީހުން ވަޒަންވެރިކުރުވުމާ ދެކޮޅަށް އަޑުއުފުލަމަށް ބާއްވާ ސުލުހަވެރި އެއްވުން މިރޭ 8:30 ގައި އާޓިފިޝަލް ބީޗުގައި އޮންނާނެ އެވެ.
މި އެއްވުމުގައި ކުރީގެ ރައީސް އަބްދުﷲ ޔާމީން އާއި އެމްޑީޕީގެ ރިޔާސީ ޕްރައިމަރީގައި ވާދަކުރައްވާނެކަން އިއުލާނު ކުރައްވާފައިވާ ކުރީގެ އިކޮނޮމިކް މިިނިސްޓަރު ފައްޔާޒު އިސްމާއީލް އަދި ކުރީގެ ނައިބު ރައީސް ފައިސަލް ނަސީމް ބައިވެރިވެވަޑައިގަންނަވާނެކަން އިއުލާނު ކުރައްވާފައިވެ އެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. ދާއިމީ އެއްބަސްވުމުގައި މި ނޮވެމްބަރު މަހު ސޮއިކުރާނެ ކަމުގެ އަޑުތައް ވަނީ ފެތުރިފަ އެވެ.
