ހަކީމީގެ ފަސް ތަރީގެ ކުޅުމަކުން ޕީއެސްޖީ މޮޅުކޮށްދީފި

Oct 31, 2026, 10:35 AM
ޕީއެސްޖީގެ އަޝްރަފް ހަކީމީ ލަނޑު ޖެހުމަށް ފަހު އުފާފާޅުކުރަނީ.

ޕީއެސްޖީގެ އަޝްރަފް ހަކީމީ ލަނޑު ޖެހުމަށް ފަހު އުފާފާޅުކުރަނީ.

ޕެރިސް (އޮކްޓޫބަރު 31) - އަޝްރަފް ހަކީމީ، އާދަޔާހިލާފު ތަފާތު ފޯމެއްގައި ކުޅެ، ފްރެންޗް ލީގުގައި ރޭ ޕީއެސްޖީ އަށް ލެ ހާވްރޭ އަތުން 5-1 އިން މޮޅެއް ހޯދައިދީފި އެވެ. 

މި މެޗުގައި ޕީއެސްޖީން ޖެހި ފަސް ގޯލުގައި ވެސް މޮރޮކޯގެ ކެޕްޓަން، ހަކީމީ ވަނީ އިސް ރޯލެއް އަދާކޮށްފަ އެވެ. ހެޓްރިކެއް ހެދުމުގެ އިތުރުން ދެ ލަނޑު ޖަހަން ފުރުސަތު ހޯދައިދިނެވެ. މިއީ، ކުރިން ރެއާލް މެޑްރިޑާއި ބޮރޫޝިއާ ޑޯޓްމަންޑް އަދި އިންޓަ މިލާނަށް ކުޅުނު ހަކީމީގެ ފުރަތަމަ ހެޓްރިކް އެވެ. 

މި މޮޅާ އެކު، ޕީއެސްޖީ އެއް ވަނައިގައި އޮތީ 9 މެޗުން 20 ޕޮއިންޓް ހޯދައިގެންނެވެ. ދެ ވަނައިގައި އޮތް ލިލް އަށް ނުވަ މެޗުން 18 ޕޮއިންޓް، ތިން ވަނައިގައި އޮތް ރެން އަށް ނުވަ މެޗުން 16 ޕޮއިންޓް ވަނީ ލިބިފަ އެވެ. ލިލް އިން ރޭ ލޯންސް އަތުން 1-0 އިން މޮޅުވިއިރު، ނީސް އަތުން ރެން ވަނީ 5-2 އިން ބަލިވެފަ އެވެ. 

ފްރެންޗް ލީގުގެ ފުލުގައި އޮތް ލެ ހާވްރޭ އިން ވަނީ ރޭގެ މެޗުގައި ޕީއެސްޖީ ހާސްކޮށްލައި ލީޑުނަގައިފަ އެވެ. އެ ގޮތުން، 18 ވަނަ މިނިޓްގައި ލެ ހާވްރޭގެ ލަނޑު ޖެހީ ޖޯޝް މާޖާ އެވެ. އޭނާ މި ލަނޑު ޖަހަން ފުރުސަތު ހޯދައިދިނީ، ރަޔާން ފޮފާނާ އެވެ. 

ލެ ހާވްރޭ އިން އަށް މިނިޓް ވަންދެން މި މެޗުގައި ލީޑުކުރި އެވެ. ޕީއެސްޖީން އެއްވަރުކުރީ، ހަކީމީ ދިން ބޯޅައަކުން 26 ވަނަ މިނިޓްގައި މިކާ ގޯޑްޓްސް ޖެހި ގޯލުންނެވެ. ފުރަތަމަ ލަނޑު ޖެހިތާ ދެ މިނިޓް ފަހުން، ސެނީ މަޔޫލޫ ދިން ބޯޅައަކުން ހަކީމީ ވަނީ ގޯލެއް ޖަހައި ޕީއެސްޖީ އަށް ލީޑުނަގައިދީފަ އެވެ. 

އެއް ގޯލުގެ ލީޑަކާ އެކު ފުރަތަމަ ހާފު ނިންމާލި ޕީއެސްޖީން ދެ ވަނަ ހާފު ފަށައިގެން 10 މިނިޓް ތެރޭ ލީޑުފުޅާކުރި އެވެ، މެޗުގެ 55 ވަނަ މިނިޓްގައި މި ލަނޑު ޖެހީ ހަކީމީ އެވެ. މެޗުގެ 62 ވަނަ މިނިޓްގައި ޕީއެސްޖީގެ ހަތަރު ވަނަ ލަނޑު ޖެހީ ހަކީމީ ދިން ބޯޅައަކުން މަޔޫލޫ އެވެ. 

ހަކީމީ، އޭނާގެ ހެޓްރިކް ފުރިހަމަ ކުރި ލަނޑު ޖެހީ، މެޗުގެ 69 ވަނަ މިނިޓްގަ އެވެ. މި މެޗުގައި ޕީއެސްޖީ އަށް ލަނޑު ޖަހާނެ އިތުރު ފުރުސަތުތަކެއް ލިބި ބޭނުމެއް ނުކުރެވުނެވެ.

ރޭގެ މެޗަކީ، ހަކީމީގެ އިތުރުން ޕީއެސްޖީގެ ކޯޗު ލުއިސް އެންރީކޭ އަށް ވެސް ހާއްސަ މެޗެކެވެ. އޭނާ ވަނީ، ޕީއެސްޖީގެ ތާރީހުގައި އެންމެ ގިނަ މެޗުން މޮޅުވި ކޯޗުގެ ޝަރަފް ހޯދައިފަ އެވެ. އެންރީކޭ، ޕީއެސްޖީ ގޮވައިގެން ނުކުތް 188 މެޗުގެ ތެރެއިން 127 މެޗުން މޮޅުވި އެވެ. މީގެ ކުރިން، ޕީއެސްޖީގެ ކޯޗަކަށް ހުރެ އެންމެ ގިނަ މެޗުން މޮޅުވީ ލޯރެންޓް ބްލޮންކް އެވެ. އޭނާ ވަނީ 126 މެޗުން މޮޅުވެފަ އެވެ. 

ކޮމެންޓް

ފަހުގެ ޚަބަރު

ބްރޭކްތައް އަންނަ ގޮތުން "ލީގުގެ ފީލްއެއް ނީނދޭ": އާތީ

ދިވެހި ޕްރިމިއާ ލީގު މެދުކަނޑާލަން ޖެހުމުން ކުޅުންތެރިންގެ ފިޓްނަސް އާއި ޕާފޯމަންސަށް އަސަރުކޮށް، ލީގުގެ އަސްލު ފޯރި ނުލިބޭ ކަމަށް ޓީސީގެ ކޯޗު އާތީ ބުނެފި. އާތީ ފާހަގަކުރި ގޮތުގައި ގިނަ ދުވަސްތަކެއްގެ ބްރޭކްތަކުގެ ސަބަބުން ޓީމުތަކުގެ ކޮންޓިނިއުޓީ ގެއްލި، މެޗުތަކަށް ތައްޔާރުވުމުގައި ބޮޑެތި ގޮންޖެހުންތަކެއް ކުރިމަތިވޭ

ފީފާގެ އިންތިހާބުގައި އަރަބިންގެ ތާއީދު އިންފަންޓީނޯ އަށް

އަންނަ އަހަރު ބާއްވާ ފީފާގެ އިންތިހާބުގައި މިހާރުގެ ރައީސް ޖިއާނީ އިންފަންޓީނޯއަށް ތާއީދުކުރުމަށް 22 ގައުމު ހިމެނޭ އަރަބް ފުޓްބޯޅަ ޔޫނިއަން (ޔޫއޭއެފްއޭ) އިން ނިންމައިފިއެވެ. އިންފަންޓީނޯއާ އެކު ޖުމްލަ ތިން ކެންޑިޑޭޓުން ވާދަކުރާ މި އިންތިހާބުގައި، އޭޝިއާ އާއި އެފްރިކާގެ ގައުމުތަކުގެ ބޮޑު ތާއީދަކާއެކު އޭނާއަށް މަގާމު ދިފާއުކުރުމުގެ ފުރުސަތު ބޮޑުކަމަށް ބެލެވެއެވެ. ފީފާގެ އާ ރައީސަކު ހޮވުމަށް ވޯޓުލުން އޮންނާނީ އަންނަ އަހަރުގެ މާޗް މަހު މޮރޮކޯގައި ބާއްވާ ފީފާ ކޮންގްރެސްގައެވެ.

އިންޑިއާގެ ލެޖެންޑުން ފުޓްބޯޅަ ރައީސްގެ ޝަކުވާ ސަރުކާރަށް

އިންޑިއާގެ ފުޓްބޯޅަ ފެޑެރޭޝަންގެ ރައީސް ކަލްޔާން ޗޯބޭގެ އިތުބާރު ނެތްކަމުގެ މައްސަލަ، ބައިޗުން ބުޓިއާ ހިމެނޭހެން އެ ގައުމުގެ 14 ލެޖެންޑުން ސްޕޯޓްސް މިނިސްޓަރަށް ހުށަހަޅައިފި. މި ސިޓީގައި ފާހަގަކޮށްފައިވަނީ ފެޑެރޭޝަންގެ މާލީ ހާލަތު ގޯސްވެ ބަނގުރޫޓުވަމުންދާ ކަމަށް

ސުޒޭނާއި މޯހަންގެ ދުލުން: ބަދުނަސީބާއި ހައްލެއްގެ ވާހަކަ!

ސަރަހައްދުގެ އެހެން ގައުމުތަކުން ބޭރުގައި އުޅޭ އެ ގައުމުތަކުގެ ދަރިފަސްކޮޅުގެ ކުޅުންތެރިންނަށް ރަށްވެހިކަން ދީގެން ގައުމީ ޓީމުތައް ވަރުގަދަކުރަމުންދާއިރު، ރާއްޖެއަށް އެ ފުރުސަތު ކުޑަކަމަށް ކުރީގެ ކޯޗުން ފާހަގަކުރެއެވެ. މިކަމުގެ ސަބަބުން ރާއްޖޭގެ ފުޓްބޯޅައަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދުމަށް އެކަށީގެންވާ ނިޒާމެއް ނެތްކަމުގެ ކަންބޮޑުވުން ވަނީ ފާޅުކޮށްފައެވެ.

ވޭގާގެ ނަމެއް ނެތް، ފީފާ އިންތިހާބުގައި ތިން ކެންޑިޑޭޓުން!

އަންނަ އަހަރު ބާއްވާ ފީފާގެ އިންތިހާބުގައި ވާދަކުރާ ތިން ކެންޑިޑޭޓުންގެ ނަން އިއުލާނުކުރިއިރު، ކުރީގެ ކުޅުންތެރިޔާ ރަމޮން ވޭގާގެ ނަން ޝަރުތު ހަމަނުވުމުގެ ސަބަބުން ވަނީ ބާކީވެފައި. މި އިންތިހާބުގައި ވާދަކުރައްވަނީ މިހާރުގެ ރައީސް އިންފަންޓީނޯގެ އިތުރުން ފްރާންސްގެ ފިލިޕޭ ޑިއާލޯ އަދި ޖަޕާނުގެ ކޯޒޯ ޓަޝީމާ

އަނިޔާއިން ރަނގަޅުވެ އިލާން އެނބުރި އަންނަން ތައްޔާރު

ކަކުލަށް ލިބުނު އަނިޔާއަކާ ގުޅިގެން ދެ މަހެއްހާ ދުވަހު ކުޅުމާ ދުރުގައި ހުރުމަށްފަހު، މާޒިޔާގެ ފޯވާޑް މުހައްމަދު އިލާން އިމްރާން އަލުން ކުޅުމަށް އެނބުރި އަންނަން ތައްޔާރުވެއްޖެ. މި އަނިޔާގެ ސަބަބުން އިލާނަށް ސާފް ޗެމްޕިއަންޝިޕާއި ލީގުގެ މުހިންމު މެޗުތަކެއް ގެއްލުނު ނަމަވެސް، އޭނާ މިހާރު ވަނީ ފަރިތަކުރުންތަކުގައި ބައިވެރިވާން ފަށާފައި

ފީފާ އިން ނޭޕާލްގެ ސަސްޕެންޝަން އުވާލަނީ؟

ފީފާގެ އެންގުންތަކަށް ބޯނުލެނބުމުގެ ސަބަބުން ނޭޕާލް ފުޓްބޯޅަ ފެޑެރޭޝަނަށް ދީފައިވާ ސަސްޕެންޝަން، ކުރިއަށް އޮތް މަހެއްހާ ދުވަސް ތެރޭގައި އުވާލާނެ ކަމަށް ނޭޕާލުން ވަނީ ބުނެފައި. މި ސަސްޕެންޝަން އުވާލުމަށް ނޭޕާލް ސަރުކާރުގެ މަންދޫބުން ފީފާ އާއި އޭއެފްސީއާ އެކު މަޝްވަރާކޮށްފައި

Newsletter

Get the latest news delivered straight to your inbox