މެންޗެސްޓާ (އޮކްޓޫބަރު 14) - މެންޗެސްޓާ ސިޓީން ކްލަބްގެ މާލީ ކަންތައްތައް ހަމަޖެއްސުމުގައި މަކަރު ހެދިކަމަށް ޕްރިމިއާ ލީގުގެ މިނިވަން ކޮމިޓީ އަކުން މައްސަލަ ބެލުމަށް ފަހު ނިންމާފައިވާއިރު، އެކަމާ ދެކޮޅަށް ސިޓީން ކުރި އެޕީލް ކާމިޔާބުވާން އެދޭ ކަމަށް ޕީއެސްޖީގެ ކޯޗު، ލުއިސް އެންރީކޭ ބުނެފި އެވެ.
އެންރީކޭ މިހެން ބުނެފައިވަނީ، ޗެމްޕިއަންސް ލީގުގެ މިރޭ ސިޓީ ދަނޑުގައި ޕީއެސްޖީން ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގަ އެވެ.
ފައިނޭންޝިއަލް ފެއާޕްލޭ (އެފްއެފްޕީ)ގެ ގަވާއިދުތަކާ ހިލާފަށް މާލީ ކަންކަމުގައި މަކަރު ހެދުމުގެ 100 އަށް ވުރެން ގިނަ މައްސަލައެއް މެންޗެސްޓާ ސިޓީގެ މައްޗަށް ސާބިތުވުމާ އެކު، އެ ޓީމުން މިދިޔަ އަހަރުތަކުގައި ހޯދާފައިވާ ތަށިތައް އަތުލުމުގެ އަޑުތައް އަންނަނީ ގަދަވަމުންނެވެ.
ކޮރަޕްޝަން ހިމެނޭ ގޮތަށް މަކަރު ހަދާފައިވާ 115 މައްސަލައިގެ ތެެރެއިން 114 މައްސަލައެއް ސިޓީގެ މައްޗަށް ވަނީ ސާބިތުވެފަ އެވެ. އެކަމަކު، ސިޓީއާ މެދު އަޅާނެ ފިޔަވަޅެއް އަދި ނިންމާފައިނުވާއިރު، އެ ޓީމުގެ ޕޮއިންޓު އުނިކުރުމާއި ލީގުން ބޭރުކުރުމާއި ހޯދާފައިވާ ތަށިތައް އަތުލުން ފަދަ ފިޔަވަަޅުތައް ވެސް ހިމެނެ އެެވެ. ސިޓީން ވަނީ މި މައްސަަލައިގައި އެޕީލް ކުރުމަށް ލިބުނު ފުރުސަތުގެ ބޭނުންހިފައިފަ އެވެ.
"ވަރަށް ގިނަ އަޑުތަކެއް އެބަ އެނބުރޭ ސިޓީގެ ވަށައިގެން، ހަގީގަތަކީ ބޮޑެތި ޓީމުތައް ވަށައިގެން އަބަދުވެސް އަޑުތަކެއް އިވެމުންދާނެ އެކި ކަހަލަ ގޮތްގޮތަށް،" އެންރީކޭ ބުންޏެވެ.
އޭނާ ބުނީ އެންމެ ބުއްދިވެރި ގޮތަކީ، މި މައްސަަލަ އެއްކޮށް ބަލައިނިމެންދެން ހަމަޖެހިގެން ތިބުން ކަމަށާއި އުންމީދަކީ ސިޓީ އަށް މި ކަމުން އަދަބެއް ނުލިބި ސަލާމަތްވުން ކަމަށެވެ.
"ދަނޑުމަތީގައި ސިޓީން ވަރަށް އާދަޔާހިލާފު މަސައްކަތްތަކެއް މިދިޔަ އަހަރުތަކުގައި ވަނީ ކޮށްފައި، ދެން، އެ ޓީމުން ހޯދި ތަށިތަކަކީ އެ ކަމަށް ބާރު ލިބޭ، އެ މީހުންނަށް (ސިޓީ އަށް) ހައްގުވާ ކާމިޔާބެއް،" އެންރީކޭ ބުންޏެވެ.
ފުޓްބޯޅައިގެ ވާހަކަ އެކި ގޮތްގޮތަށް ދެއްކޭނެ ކަމަށާއި އަދި ދަނޑުމަތީގައި ހިނގާ ކަންކަމުގެ ވާހަކަ ދެކެވެން ޖެހޭނީ ދަނޑުމަތީގައި އެ ފެންނަ ކަންތައްތަކަށް ބަަލައިގެން ކަމަށް އެންރީކޭ ވަނީ ބުނެފަ އެވެ. އަދި، ސިޓީ މައްސަލައިގައި މިހާރު އެޕީލް މަރުހަލާގައި އޮތްއިރު، މިއީ ސިޓީ އަށް ފަސޭހަ ވަގުތެއް ނޫން ކަމަށް އެންރީކޭ ގަބޫލުކުރެ އެވެ.
ސިޓީ އަކީ ޔޫއޭއީގެ މަހުޖަނުން ހިންގާ ކްލަބެެކެވެ. އަދި، ޕީއެސްޖީ އަކީ ގަތަރުގެ ސަރުކާރާ ގުޅުން އޮތް ފަރާތްތަކުގެ ބައިވެރިވުން ބޮޑު ޓީމެކެވެ.
