ޕެރިސް (އޮކްޓޫބަރު 23) - ފްރެންޗް ލީގުގައި އާދިއްތަ ދުވަހުގެރޭ ކުޅެން އޮތް ޕީއެސްޖީ އާއި ލިޔޯން ބައްދަލުކުރާ މެޗު ފަސްކުރަން ފްރާންސްގެ ފުލުހުން އެދިފައިވާ ކަމަށް މީޑިއާ ރިޕޯޓްތައް ބުނެފި އެވެ.
ފްރާންސްގެ ދެކުނުގެ ސިޓީތައް ކަމަށްވާ މާސޭ، ބޯޑޯ، ނީސް އަދި ލިޔޯންގެ އިތުރުން އުތުރުގެ ލިލް އާއި ޕެރިސް އަދި އެހެނިހެން އަވަށްތަކުގައި ޒުވާނުން ބޭރަށް ނުކުމެ ހަމަނުޖެހުންތައް ހިންގަމުން އަންނަނީ، ތަކެތީގެ އަގުބޮޑުވުމާއި އެކިއެކި ސިޔާސަތަކާ މެދު ހިތްހަަމަނުޖެހިގެންނެވެ. ހާލަތު ގޯސްވަމުން އަންނަ މި ދުވަސްވަރު، ފްރާންސްގެ ސަރުކާރުން ވެސް އަންނަނީ ހަރުކަށި ފިޔަވަޅުތަކެއް އަޅަމުންނެވެ.
ކުރިއަށް އޮތް ދެ ދުވަހަށް، ޒުވާނުންގެ އިތުރު ހަރަކާތްތަކެއް ފްރާންސްގެ އެކި ސަރަހައްދުތަކުގައި ކުރިއަށްގެންދިއުމަށް ރާވަމުން އަންނަ ކަމުގެ މައުލޫމާތު ފުލުހުންނަށް ވަނީ ލިބިފަ އެވެ. އެއާ އެކު، ގިނަ ބަޔަކު އެއްވެ، ކުރިއަށް ގެންދާ އެކި ހަރަކާތްތައް ރީޝެޑިއުލް ކުރަން ފްރާންސް ފުލުހުން އަންނަނީ އިލްތިމާސް ކުރަމުންނެވެ.
އެ ގޮތުން، ފްރާންސްގެ ނޫހެއް ކަމަށް ލެކިއުޕޭ އިން ރިޕޯޓްކޮށްފައިވާ ގޮތުަގައި، ޕެރިހުގެ ފުލުހުންގެ މައި އިދާރާ އިން ވަނީ ޕީއެސްޖީ އާއި ލިޔޯނުން ކުޅެން އޮތް މެޗު ހޯމަ ދުވަހަށް ފަސް ކުރުމަށް ހުށަހަޅައިފަ އެވެ. އެކަމަކު، އެއާ ބެހޭގޮތުން، ރަސްމީކޮށް، ފްރެންޗް ލީގާއި ލިޔޯން އަދި ޕީއެސްޖީން ވެސް ވާހަކަ ދައްކާފައެއްނުވެ އެވެ.
ފްރެންޗް ލީގުގައި މާދަމާ ޓުލޫސް އާއި ޓްރޯޔެސް ކުޅެން އޮތް މެޗު މިހާރު ވަނީ ސަލާމަތީ ސަބަބުތަކަށްޓަކައި، އާދިއްތަ ދުވަހަށް ބަދަލުކޮށްފަ އެވެ.
