ޕެރިސް (އޮކްޓޫބަރު 18) - ފްރެންޗް ލީގުގައި ރޭ ފަހަތުން އަރައި 3-1 އިން ސްޓްރާސްބޯ ބަލިކޮށް ޕީއެސްޖީން ޖެހިޖެހިގެން ހަ ވަނަ މެޗުން މޮޅުވެއްޖެ އެވެ.
މި ސީޒަން ފަށައިގެން ޕީއެސްޖީގެ ފޯމަށް ވަރަށް ބޮޑަށް އަސަރުކޮށް، އެ ޓީމަށް ގިނަ މެޗުތަކުގައި ނަތީޖާ ނެރުމަށް އުނދަގޫތަކާ ކުރިމަތިވި އެވެ. އެކަމަކު، މަޑުމަޑުން ފޯމަކަށް އައިސް އެ ޓީމުން މި ވަނީ ރޭގެ މެޗު ހިމަނައިގެން އެންމެ ފަހުން ހުރިހާ މުބާރާތެއްގައި ކުޅުނު ހަ މެޗުން ވެސް މޮޅުވެފަ އެވެ.
ޗެމްޕިއަންސް ލީގުގައި މި ހަފްތާގައި މެންޗެސްޓާ ސިޓީ އަތުން މޮޅުވި މެޗުގައި ނެރުނު ފުރަތަމަ އެގާރަ އަށް އަށް ބަދަލެއް ގެނެސްގެން ޕީއެސްޖީން ރޭގެ މެޗަށް ނުކުތްއިރު، މި މެޗުގައި ފުރަތަމަ ލީޑުނެގީ އަމިއްލަ ދަނޑުގައި ކުޅުނު ސްޓްރާސްބޯ އިންނެވެ.
މެޗުގެ 17 ވަނަ މިނިޓްގައި ސްޓްރާސްބޯ އަށް މި ލަނޑު ޖަހައިދިނީ، އެމެރިކާ ގައުމީ ޓީމުގެ މިޑްފީލްޑަރު، ޖިއޯ ރޭނާ އެވެ. އޭނާ ފޮނުވާލި ބޯޅަ ގޯލަށް ވަނީ ކުޅުންތެރިއަކު ފައިގައި ޖެހިފަ އެވެ. މެޗުގެ ބޮޑުބައި ސްޓްރާސްބޯ އިން މި ލަނޑާ އެކު، ލީޑުގައި އޮތެވެ. އެކަމަކު، ޕީއެސްޖީން ނަތީޖާ އަނބުރާލީ މެޗުގެ ފަހު 15 މިނިޓް ތެރޭގަ އެވެ. އެއީ، ބަދަލަކަށް ކުޅެން އެރި ކުޅުންތެރިންގެ ބައިވެރިވުމާ އެކުގަ އެވެ.
އެ ގޮތުން، ޕީއެސްޖީން އެއްވަރުކުރި ލަނޑު ޖެހީ، މެޗުގެ 77 ވަނަ މިނިޓްގައި އޮސްމާން ޑެމްބެލޭ ދިން ބޯޅައަކުން ޔޫކްރެއިންގެ ޑިފެންޑަރު، އިލާ ޒަބާނިއޭ އެވެ. ޕީއެސްޖީން ލީޑުނެގި ގޯލު، 85 ވަނަ މިނިޓްގައި ކާމިޔާބުކުރީ ޑެމްބެލޭ އެވެ. އަދި، މެޗުގެ ތިން ޕޮއިންޓް ކަށަވަރުކޮށްދިން ލަނޑު ޕީއެސްޖީން ޖެހީ އިތުރު ވަގުތުގެ ތިން ވަނަ މިނިޓްގަ އެވެ. މި ލަނޑު އެ ޓީމަށް ޖަހައިދިނީ ފެރަން ޓޮރޭޒް ދިން ބޯޅައަކުން ޑެޒީރޭ ޑޫއޭ އެވެ.
މި ފަހަރުގެ ފްރެންޗް ލީގުގެ ފުރަތަމަ ތިން މެޗު ނިމުނުއިރު، 13 ވަނައިގައި އޮތް ޕީއެސްޖީ، މި ވަގުުތު އޮތީ އެއް ވަނައިގަ އެވެ. އެއީ، ދެ ވަަނައިގައި އޮތް ލިލްއާ އެއްވަރަށް ހަތް މެޗުން 14 ޕޮއިންޓް ހޯދައިގެންނެވެ. ތިން ވަނައިގައި އޮތް މޮނާކޯ އަށް ހަ މެޗުން 14 ޕޮއިންޓް ވަނީ ލިބިފަ އެވެ. އަދި، ހަތަރެއްގައި އޮތް ރެން އަށް ވަނީ ހަ މެޗުން 13 ޕޮއިންޓް ލިބިފަ އެވެ.
